२०१७तः पूर्वम् उत्तरप्रदेशे एकजनपदः एकः लुण्टकगणाध्यक्षः भवति स्म : मुख्यमन्त्री

मुख्यमन्त्रिणा उक्तम् यत् अधुना द्वियन्त्रसर्वकारे उत्तरप्रदेशस्य परिचयः वन डिस्ट्रिक्ट वन प्रोडक्ट इति रूपेण भवति

उत्तरप्रदेशे न कर्फ्यू न दङ्गा अधुना उत्तरप्रदेशे सर्वं कुशलम् अस्ति : मुख्यमन्त्री

फिरोजाबादः, २२ जून (हिन्दुस्थान समाचारः)। उत्तरप्रदेशस्य मुख्यमन्त्री योगी आदित्यनाथः सोमवासरे फिरोजाबादे उक्तवान् यत् २०१७ वर्षात् पूर्वम् उत्तरप्रदेशे वन डिस्ट्रिक्ट वन माफिया इति स्थितिः आसीत्, किन्तु अधुना द्वियन्त्रसर्वकारे उत्तरप्रदेशस्य परिचयः वन डिस्ट्रिक्ट वन प्रोडक्ट इति रूपेण प्रसिद्धः अस्ति। तेन फिरोजाबादस्य जनान् पूर्ववत् भारतीयजनतापक्षाय समर्थनं दातुम् आहूतम्। विकासस्य पर्यायरूपेण द्वियन्त्रसर्वकारस्य उल्लेखं कुर्वन् तेन टूण्डला तथा शिकोहाबाद विधानसभयोः ६५८ कोटिधनराशेः ८१ परियोजनानां लोकार्पणं शिलान्यासं च कृतम्। अन्ययोजनानां लाभार्थिभ्यः चेकपत्राणि प्रमाणपत्राणि च वितरितानि।

मुख्यमन्त्री योगी आदित्यनाथः सोमवासरे फिरोजाबादे टूण्डला विधानसभाक्षेत्रस्य उसायनी ग्रामे प्रधानमन्त्र्यावासयोजनायाः नवनिर्मितानां ५६८ गृहाणां लाभार्थिभ्यः गृहकुञ्चिकाः प्रदत्तवान्। तेन सह टूण्डला तथा शिकोहाबाद विधानसभयोः ६५८ कोटिधनराशेः ८१ परियोजनानां लोकार्पणं शिलान्यासं च कृतम् तथा अन्ययोजनानां लाभार्थिभ्यः चेकपत्राणि प्रमाणपत्राणि च प्रदत्तानि। अस्मिन् अवसरे मुख्यमन्त्री योगी आदित्यनाथः फिरोजाबादस्य उद्योगिनां श्रमिकाणां च प्रशंसां कृत्वा उक्तवान् यत् अद्य विश्वपटलस्य उपरि फिरोजाबादस्य लोकलतः ग्लोबलपर्यन्तं प्रतिष्ठापने एतेषां महत्त्वपूर्णा भूमिका वर्तते। तेन उक्तम् यत् द्वियन्त्रसर्वकारस्य प्रधानमन्त्रिणः मार्गदर्शनस्य च कारणेन एव फिरोजाबादाय ५६८ कोटिधनराशेः परियोजनानां लाभः प्राप्तः, किन्तु अस्य श्रेयः फिरोजाबादस्य जनतायै एव गच्छति। यतः यदा भवन्तः स्वमतं समुचितस्थाने प्रयुञ्जते तथा ईवीएम यन्त्रस्य समुचितं बटनं निपीडयन्ति तदा फिरोजाबादस्य यात्रा लोकलतः ग्लोबलपर्यन्तं भवति।

तेन उक्तम् यत् अद्य फिरोजाबादस्य काचनिर्माणोद्योगः चीनदेशं पराजितवान्। पूर्वं दीपावली होली रक्षाबन्धनादिषु पर्वसु अथवा अतिथिभ्यः चीननिर्मिताः उत्पादाः उपहाररूपेण दीयन्ते स्म, यतः विपण्यां ते एव उपलब्धाः आसन्। किन्तु फिरोजाबादस्य काचशिल्पिभिः नूतना प्रौद्योगिकी विकसिताऽभवत्। काचनिर्मिताः उत्पादाः विपण्यां प्रापिताः। अधुना सर्वेषु पर्वसु अथवा अतिथीनाम् आगमने काचनिर्मिता सुन्दरी प्रतिमा उपहाररूपेण प्रदीयते चेत् अतिथिः अपि सन्तुष्टः भवति। तेन उक्तम् यत् रामदरबारस्य गणेशस्य भगवान् शिवस्य बुद्धस्य च सुन्दराः प्रतिमाः काचेन निर्मीयन्ते। एषा श्रमिकाणां कला अस्ति। एषा कला पूर्वमपि आसीत्, किन्तु २०१७ वर्षात् पूर्वं श्रमिकाणाम् अस्याः कलायाः प्रोत्साहनं न प्राप्तम्। कारखानेभ्यः गैस आपूर्तिः अपि न लब्धा। अतः फिरोजाबादः २०१७ वर्षात् पूर्वं लोकलतः ग्लोबलपर्यन्तं न गन्तुं अशकत्।

समाजवादीपक्षम् उद्दिश्य तेन उक्तम् यत् तस्य पक्षस्य कार्यसूच्यां विकासस्य स्थानं नास्ति। समाजस्य विभाजनम्, सामाजिकैक्यस्य विनाशः, गुण्डागर्द्याः प्रोत्साहनम्, विकासपरियोजनासु विघ्नसृष्टिः, पर्वपूर्वं तेषां उत्सवानाम् उपद्रवरूपेण परिवर्तनम् इत्येतदेव समाजवादीपक्षस्य कार्यम् अस्ति। २०१७ वर्षात् पूर्वम् वन डिस्ट्रिक्ट वन माफिया इति व्यवस्था आसीत्। प्रत्येकस्मिन् जनपदे एकः निर्दिष्टः माफिया भवति स्म, यस्य कार्यं दरिद्राणां तथा सर्वकारीयभूमीनां बलात् अधिग्रहणम्, गुण्डागर्दी, वणिजां प्रति चतुर्थांशधनस्य वसूली, प्रदेशे अराजकतायाः प्रसारणं च आसीत्। किन्तु अधुना उत्तरप्रदेशे वन डिस्ट्रिक्ट वन प्रोडक्ट इति व्यवस्था अस्ति।

तेन उक्तम् यत् अधुना उत्तरप्रदेशः माफियामुक्तः अस्ति। उत्तरप्रदेशे न कर्फ्यू न दङ्गा, अधुना उत्तरप्रदेशे सर्वं कुशलम् अस्ति। उत्सवेषु पर्वसु च उपद्रवः न भवति, अपितु उत्सवः एव भवति। तेन आरोपः कृतः यत् समाजवादीसर्वकारे कावडयात्रा श्रीकृष्णजन्माष्टमी इत्यादीनाम् उत्सवानाम् अपि निरोधनं कृतम्। दरिद्रेभ्यः राशनं न लभ्यते स्म, विद्युत् अपि न आगच्छति स्म, यतः कांग्रेस समाजवादीपक्ष बहुजनसमाजपक्षस्य जनाः अन्धकारे निवासस्य अभ्यस्ताः आसन्। अन्धकारे एव दस्युकर्माणि भवन्ति स्म। किन्तु अधुना उत्तरप्रदेशे सर्वेभ्यः विद्युत् जलं शिक्षा स्वास्थ्यसेवा इत्यादयः सुविधाः प्रदीयन्ते तथा सर्वासां योजनानां लाभः अपि प्राप्यते।

अस्मात् पूर्वं पर्यटनमन्त्री जयवीरसिंहः प्रदेशसर्वकारस्य विधिव्यवस्थायाः प्रशंसां कुर्वन् उक्तवान् यत् उत्तरप्रदेशे विधेः शासनम् अस्ति। प्रदेशसर्वकारस्य परिचयः सम्पूर्णविश्वे बुलडोजर बाबा सर्वकार इति नाम्ना प्रसिद्धः अस्ति।

अस्मात् पूर्वं मुख्यमन्त्री विधायकः प्रेमपाल धनगरः मनीष असीजा च स्वविचारान् अपि व्यक्तवन्तौ।

अस्मिन् अवसरे महापौरा कामिनी राठौरः, जिलापञ्चायताध्यक्षः हर्षिता सुमितप्रतापः, जिलाधिकारी सन्तोषकुमार शर्मा, पक्षस्य पूर्वविधायकाः नेतारः च उपस्थिताः आसन्।

Hindusthan Samachar / Dheeraj Maithani