जौनपुरम्, २२ जूनमास: (हि.स.)। उत्तरप्रदेशस्य जौनपुरजनपदस्य प्रभारिमन्त्रिणः ए.के. शर्मा महोदयस्य निर्देशानुसारं रविवासरे विकासखण्डस्य रामपुरस्य पट्टीकीरतराय-ग्रामपञ्चायते स्थिते अटल-आवासीय-परिसरे रात्रिजन-चौपालस्य आयोजनम् अभवत्।

अस्मिन् कार्यक्रमे विधायकः डॉ. आर.के. पटेलः, ब्लॉकप्रमुखः राहुलसिंहः, भाजपाजनपदाध्यक्षः डॉ. अजयसिंहः, पूर्वगृहराज्यमन्त्री कृपाशङ्करसिंहः, पूर्वविधायिका सुषमापटेलः, जनपदाधिकारी सैमुअलपॉल: एन. तथा मुख्यविकासाधिकारी ध्रुवखाडिया च उपस्थिताः आसन्।

आभासीयमाध्यमेन सम्बद्धः प्रभारिमन्त्री अधिकारिणः निर्देशितवान् यत् पात्रपरिवारेभ्यः आवासयोजना, राशनपत्रम्, आयुष्मानपत्रम् तथा निवृत्ति-वेतनयोजनानां लाभः शीघ्रं प्रदीयताम्। सः सर्वाः जनकल्याण-कारीयोजनाः अन्तिम-जनपर्यन्तं प्राप्नुयुः तथा ग्रामेषु मूलभूतसुविधाः सुनिश्चिताः भवन्तु इति विशेषं बलम् अददात्।

विधायकः डॉ. आर.के. पटेलः अवदत् यत् रात्रिजनचौपालस्य मुख्योद्देश्यं विविध-योजनानां प्रभावीकार्यन्वयनस्य समीक्षणम् अस्ति। अन्यैः वक्तृभिरपि पात्रजनानां समीपे योजनानां लाभप्रदानस्य आवश्यकता प्रतिपादिता।

कार्यक्रमे विविधविभागानां प्रदर्शिनी-कक्षाणां निरीक्षणं कृतम्, वृक्षारोपणं सम्पन्नम्, तथा मुख्यमन्त्री-युवोद्यमि-विकासयोजनायाः अन्तर्गतं द्वाभ्यां लाभार्थिभ्यां ई-रिक्शायानद्वयं वितरितम्। विविधसर्वकारीयोजनानां लाभार्थिभ्यश्च प्रमाणपत्राणि प्रदत्तानि। जनपदाधिकारी आश्वासनं दत्तवान् यत् अवशिष्टाः सर्वे पात्रजनाः अपि शीघ्रमेव योजनानां लाभं प्राप्स्यन्ति। अस्मिन् कार्यक्रमे जनप्रतिनिधयः, अधिकारिणः, कर्मचारीणः तथा बहुसंख्यकाः ग्रामवासिनः उपस्थिताः आसन्।

Hindusthan Samachar / Divya Ranjan