कटिहारनगरम्, 23 जूनमास: (हि.स.)।

बिहारकृषिविश्वविद्यालयस्य सबौरस्य कुलपतिः डॉ.दुनियारामसिंहः मंगलवासरे कृषि विज्ञान केन्द्रस्य (केवीके), कटिहारस्य आकस्मिकनिरीक्षणम् अकरोत्। अस्मिन् अवसरे सः अवदत् यत् कृषि-क्षेत्रे नवीन-प्रविधीनाम् अवलम्बनेन एव कृषकाः आर्थिकतया सामाजिकतया च सशक्ताः भविष्यन्ति। कुलपतिना कृषकहिताय केन्द्रेण सञ्चाल्यमानानां विविधकार्यक्रमाणां नवस्थापितस्य सामुदायिक-रेडियो-केन्द्रस्य च कार्येषु गाढा सन्तुष्टिः व्यक्ता।

कृषि-विकास-कार्यक्रमाणां समीक्षणम् अकरोत्

निरीक्षणस्य समये कृषि विज्ञान केन्द्रस्य वरिष्ठवैज्ञानिकः डॉ.मृणालवर्मा कुलपतिम् केन्द्रस्य गतिविधिभिः अवगतवान्। डॉ. वर्मा अवदत् यत् केन्द्रेण कृषकाणां कृते विविधप्रशिक्षण-कार्यक्रमाः, अग्रिम-पङ्क्ति-प्रदर्शनानि (फ्रण्टलाइन डेमोन्स्ट्रेशन), कृषक-क्षेत्रेषु परीक्षणकार्याणि, ‘क्षेत्र-रक्षण-अभियानम्’ तथा सन्तुलित-उर्वरक-कार्यक्रमः सफलतया सञ्चाल्यन्ते। एतेषां सर्वेषां क्रियाकलापानां कार्यप्रणालीम् अवलोक्य माननीयः कुलपतिः केन्द्रस्य प्रयत्नानां प्रशंसाम् अकरोत्।

सामुदायिक-रेडियो-केन्द्रस्य कार्यक्रमान् अशृणोत्

कुलपतिः डॉ. दुनियारामसिंहः केन्द्रे नवस्थापितस्य सामुदायिक-रेडियो-केन्द्रस्य अपि निरीक्षणम् अकरोत्। तेन रेडियो-केन्द्रेण कृषकेभ्यः प्रेष्यमाणाः कृषिसम्बद्धाः सामयिकाः सूचनाः तथा प्रसार्यमाणाः विविधकार्यक्रमाः श्रुताः, तेषां विषये च प्रसन्नता व्यक्ता। अस्मिन्नेव अवसरे आगामी २७-२८ जून-दिनाङ्कयोः बीएयू, सबौरमध्ये आयोज्यमानस्य ‘आम-समागम’-कार्यक्रमस्य व्यापक-प्रचार-प्रसारार्थं रेडियो-माध्यमेन विशेष-जिङ्गलस्य अपि प्रसारणम् अभवत्।

अन्ये अधिकारिणः अपि उपस्थिताः आसन्

अस्य आकस्मिकनिरीक्षणस्य अवसरे विश्वविद्यालयस्य अन्ये वरिष्ठ-अधिकारिणः अपि उपस्थिताः आसन्। तेषु मुख्यतया विश्वविद्यालयस्य प्रसार-शिक्षा-निदेशकः डॉ.सुशीलकुमारपाठकः, प्रशासन-निदेशकः डॉ.राजेशकुमारः, छात्र-कल्याण-निदेशिका डॉ.श्वेताशाम्भवी च उपस्थिताः आसन्।

---------------

Hindusthan Samachar / Dheeraj Maithani