नवदेहली, २३ जूनमासः (हि.स.)। प्रधानमन्त्री नरेन्द्रमोदी मङ्गलवासरे डॉ.श्यामाप्रसादमुखर्जी-महोदयस्य बलिदान-दिवसे तस्मै श्रद्धाञ्जलिम् अर्पयन् अवदत् यत् राष्ट्रहिताय तस्य समर्पणम्, साहसम्, विचाराश्च अद्यापि देशवासिनः प्रेरयन्ति।

प्रधानमन्त्री सामाजिक-माध्यम-मञ्चे एक्स् इति माध्यमे प्रकाशिते सन्देशे उक्तवान् यत् डॉ.श्यामाप्रसादमुखर्जी महान् राष्ट्रभक्तः, विद्वान्, दूरदर्शी राजनीतिज्ञश्च आसीत्, यस्य सम्पूर्णं जीवनं भारतस्य विकासाय राष्ट्रियैक्याय च समर्पितम् आसीत्। सः अवदत् यत् सार्वजनिकजीवने तस्य अटुटा निष्ठा, साहसम्, राष्ट्रहिते दृढा प्रतिबद्धता च अग्रिमवंशं अपि निरन्तरं प्रेरयिष्यन्ति।

प्रधानमन्त्री अवदत् यत् डॉ.मुखर्जी-महोदयस्य बलिदानं राष्ट्रस्य सामूहिक-स्मृतौ सदा अङ्कितं भविष्यति। विकसितस्य सशक्तस्य च भारतस्य निर्माणाय तस्य आदर्शान् अनुसर्तुं पुनः सङ्कल्पः कर्तव्यः।

अन्यस्मिन् सन्देशे प्रधानमन्त्री संस्कृत-सुभाषितम् अपि समभागीकृतवान्। सः अवदत् यत् राष्ट्रस्य समाजस्य च निःस्वार्थ-सेवायै आजीवनं समर्पितस्य डॉ.मुखर्जी-महोदयस्य प्रखर-विचाराः आदर्शाश्च देशस्य प्रत्येकं वंशं मातृभूमेः सेवायै निरन्तरं प्रेरयिष्यन्ति।

प्रधानमन्त्रिणा एतत् संस्कृत-सुभाषितम् अपि उद्धृतम्—

न कर्मणा न प्रजया धनेन त्यागेनैके अमृतत्वमानशुः।परेण नाकं निहितं गुहायां विभ्राजते यद्यतयो विशन्ति॥

अस्य सुभाषितस्य भावार्थः अस्ति यत् मनुष्यः न केवलैः कर्मभिः, न सन्ततिभिः, न च धनसम्पत्त्या अमरत्वं परमगौरवं वा प्राप्नोति, अपितु त्यागेनैव उच्चतम-आदर्शानां प्राप्तिः सम्भवति। ये निःस्वार्थभावेन त्यागस्य तपस्यायाश्च मार्गम् अनुसरन्ति, ते सत्यस्य परमकल्याणस्य च परमां स्थितिं प्राप्नुवन्ति।

प्रधानमन्त्री पुनरपि अवदत् यत् डॉ.श्यामाप्रसादमुखर्जी-महोदयस्य जीवनं त्यागस्य, राष्ट्रसेवायाः, समर्पणस्य च अनुपमम् उदाहरणम् अस्ति, यत् देशवासिनः सदा प्रेरयिष्यति।

Hindusthan Samachar / Divya Ranjan