नवदेहली, २३ जूनमासः (हि.स.)। द्वादशतमस्य अन्ताराष्ट्रिययोगदिवसस्य अवसरे अस्मिन् वर्षे देशे विश्वे च अभिलेखीयः जनसहभागः दृष्टः। आयुषमन्त्रालयस्य अनुसारं देशस्य ३६ राज्येषु केन्द्रशासितप्रदेशेषु च स्थितेषु ७८० जनपदेषु ३.०७ कोट्यधिकैः जनैः योगकार्यक्रमेषु सहभागिता कृता। अपरञ्च ७.६४ लक्षाधिकैः संस्थाभिः अस्मिन् राष्ट्रव्यापि-अभियाने सहभागिता प्रदर्शिता। अस्य वर्षस्य योगदिवसस्य विषयः “स्वस्थायुषे योगः” इति आसीत्।

मङ्गलवासरे आयुषमन्त्रालयेन प्रकाशितायां विज्ञप्तौ उक्तं यत् प्रधानमन्त्री नरेन्द्रमोदी कोलकातानगरस्य ऐतिहासिके रेड्-रोड्-स्थले आयोजितस्य मुख्यकार्यक्रमस्य योगसत्रस्य नेतृत्वम् अकरोत्, यस्मिन् प्रायः ३५ सहस्रजनाः सहभागी अभवन्। योगदिवसस्य उत्साहः भारतस्य सीमाभ्यः परम् अपि दृष्टः। अमेरिका, फ्रान्स, जर्मनी, मिस्रदेशः इत्यादिषु बहुषु देशेषु योगकार्यक्रमाः आयोजिताः। न्यूयॉर्कस्थिते संयुक्त-राष्ट्रसङ्घस्य मुख्यालये तथा विश्वस्य प्रमुखनगरेषु अपि जनाः योगाभ्यासं कृत्वा स्वास्थ्यस्य सद्भावस्य च सन्देशं प्रसारितवन्तः। देशेऽपि ऐतिहासिक-सांस्कृतिकस्थलेषु विशेष-योगसत्राणि आयोजितानि। तेषु लालकिला, कोणार्कस्य सूर्यमन्दिरम्, हम्पी, गेटवे-ऑफ्-इण्डिया, चारमीनारः तथा नालन्दा-महाविहारः इत्यादीनि प्रतिष्ठितस्थलानि समाविष्टानि आसन्।

आयुषमन्त्रालयेन उक्तं यत् योगसङ्गम-पटले देशस्य विभिन्नभागेभ्यः ७.४६ लक्षाधिकाः छायाचित्राणि उपारोपितानि तथा २.६६ लक्षाधिकानि सहभागिता-प्रमाणपत्राणि निर्गतानि। सङ्घटनात्मक-सहभागितायां पश्चिमबङ्गः, राजस्थानम्, मध्यप्रदेशः, असमः तथा उत्तरप्रदेशः अग्रस्थानं प्राप्तवन्तः। रक्षामन्त्रालयेन अपि सियाचिन-हिमनदात् आरभ्य कन्या-कुमारीपर्यन्तं समुद्रीयक्षेत्रेषु च योगकार्यक्रमाः आयोजिताः। अपरञ्च राष्ट्रिय-कैडेट्-कोर ८३ लक्षाधिकैः कैडेटछात्रै: ५,००० अधिकेषु स्थलेषु सामूहिकयोगसत्रेषु सहभागिता कृता।

Hindusthan Samachar / Divya Ranjan