चेन्नई, 24 जूनमासः (हि.स.)। तमिलनाडुराज्यस्य विभिन्नविभागेषु चयनितानां ४०१ अभ्यर्थिनां नियुक्तिपत्रवितरणार्थं चेन्नैनगरे आयोजितः समारोहः तदा भावनापूर्णक्षणस्य साक्षी अभवत्, यदा मुख्यमन्त्री सी जोसेफ विजयः पूर्णगर्भिण्याः एकस्याः महिलायाः सुविधां प्राधान्येन स्वीकृत्य स्वयं मञ्चात् अवतीर्य तस्यै नियुक्तिपत्रम् अर्पितवान्। मुख्यमन्त्रिणः अस्य मानवीयव्यवहारस्य प्रभावेण उपस्थितजनानां हृदयानि स्पृष्टानि, सम्पूर्णे सभागारे च भावुकः वातावरणः अभवत्।

शासकीयसेवायां चयनितेषु ४०१ अभ्यर्थिषु अक्षयलक्ष्मी नाम्नी एका महिला अपि आसीत्, या गर्भावस्थायाः अन्तिमचरणे वर्तते। तस्याः प्रसवदिनाङ्कः २८ जून इति निर्धारितः अस्ति। जीवनस्य महत्त्वपूर्णेषु स्वप्नेषु गण्यमानां शासकीयनियुक्तिं प्राप्तुम् इच्छन्ती सा स्वकीयां शारीरिकस्थितिं न विचार्य समारोहम् उपस्थितवती।

कार्यक्रमस्य समये यदा चयनिताः अभ्यर्थिनः क्रमशः मञ्चे आहूय नियुक्तिपत्राणि प्रदीयमानानि आसन्, तदा मुख्यमन्त्रिणः विजयस्य दृष्टिः अक्षयलक्ष्म्यां पतिता। तेन तत्क्षणमेव तस्याः स्थितिं ज्ञात्वा अधिकारिणः निर्देशिताः यत् तस्यै मञ्चम् आरोढुं सोपानानि न आरोहणीयानि। ततः मुख्यमन्त्री परम्परागतप्रोटोकॉलम् एकतः स्थापयित्वा स्वयं मञ्चात् अवरोहितुं निर्णयम् अकरोत्।

मुख्यमन्त्री साक्षात् तस्मिन् स्थाने गतवान् यत्र अक्षयलक्ष्मी उपविष्टा आसीत्। तत्र तेन स्वहस्ताभ्यां तस्यै नियुक्तिपत्रम् अर्पितम्। अस्मिन् अवसरे अक्षयलक्ष्मी भावुकतया परिपूर्णा दृश्यते स्म। मुख्यमन्त्री तस्यै केवलं नूतनदायित्वस्य शुभकामनाः न दत्तवान्, अपितु भाविशिशोः स्वस्थस्य उज्ज्वलस्य च भविष्यस्य अपि कामनाम् अकरोत्।

एतत् दृश्यं दृष्ट्वा समारोहे उपस्थिताः अन्ये अभ्यर्थिनः, अधिकारिणः, अतिथयः च अपि भावविह्वलाः अभवन्। मुख्यमन्त्रिणः एषः कदमः महिलासम्मानस्य, संवेदनशीलतायाः, समावेशिप्रशासनस्य च उत्कृष्टम् उदाहरणम् इति कथितम्। कार्यक्रमे वक्तारः अवदन् यत् तमिलनाडुसरकारः महिलानां शिक्षायै, रोजगाराय, सशक्तीकरणाय च प्रोत्साहनं दातुं प्रतिबद्धः अस्ति। ते अवदन् यत् नवजीवनस्य जननीं महिलां स्वकीयजीवनस्य नूतनारम्भेन सह सम्मानयितुं शासनस्य जनकल्याणपरायणदृष्टिः प्रकटते।

समारोहे मुख्यमन्त्री अक्षयलक्ष्मीसहितान् लोकराजनम्, भूमुगईम्, मार्टिनम्, जेनिफाशेरिनम्, अरुणकुमारम्, भरतवरुणम्, खदीजापरवीनम्, उषाम्, सुकन्याम् च समावेश्य कुलम् ४०१ चयनिताभ्यर्थिभ्यः नियुक्तिपत्राणि वितरितवान्। सः सर्वान् नवनियुक्तकर्मचारिणः अभिनन्द्य तान् प्रार्थितवान् यत् ते ईमानदारितया, समर्पणभावेन, जनसेवायाः च भावनया स्वकर्तव्यानि निर्वहेयुः।

मुख्यमन्त्रिणः विजयस्य एषः संवेदनशीलः व्यवहारः अधुना सम्पूर्णे राज्ये चर्चाविषयः जातः अस्ति। जनाः मन्यन्ते यत् प्रशासनिकऔपचारिकताभ्यः उपरि उत्थाय गर्भिण्याः महिलायाः सुविधा तथा सम्मानः प्राधान्येन स्वीकृतः इति सुशासनस्य मानवीयमूल्यानां च उत्कृष्टम् उदाहरणम् अस्ति। एषा घटना न केवलम् अक्षयलक्ष्म्याः कृते स्मरणीया अभवत्, अपितु तत्र उपस्थितानां शतशः जनानामपि कृते प्रेरणाप्रदा सन्देशवाहिनी अभवत्।----------------

Hindusthan Samachar / Dheeraj Maithani