Enter your Email Address to subscribe to our newsletters
• मुख्यमन्त्रिणा बेङ्गलूरुनगरे “उत्तरप्रदेश ग्लोबल ग्रोथ डायलॉग २०२६” इत्यस्मिन् कार्यक्रमे उद्योगनेतारः सम्बोधिताः
• मुख्यमन्त्री योगी आदित्यनाथः उक्तवान् यत् भारते सुरक्षा स्थिरता वेगश्च इति त्रिसूत्रीय आदर्शरूपेण उत्तरप्रदेशः प्रतिष्ठितः
बेङ्गलूरुः, २४ जूनमासः (हि.स.)।
मुख्यमन्त्री योगी आदित्यनाथः उक्तवान् यत् उत्तरप्रदेशः भारतस्य कृते सुरक्षा स्थिरता वेगश्च इति त्रिसूत्रीय आदर्शरूपेण विकसितः अस्ति। उद्योगक्षेत्रस्य कृते एते त्रयः आयामाः अत्यन्तं महत्त्वपूर्णाः सन्ति। सुदृढा विधिव्यवस्था, विश्वस्तरीयम् आधारभूतसंरचनाजालम्, अनुपमा सम्पर्कव्यवस्था, पारदर्शी प्रशासनव्यवस्था तथा संस्थानां सुदृढं जालं नूतनस्य उत्तरप्रदेशस्य परिचायकम् अस्ति। कौशलसम्पन्नाः मानवसंसाधनाः, अत्याधुनिकप्रौद्योगिकी, निवेशमैत्री नीतयः च समग्ररूपेण औद्योगिकपरितन्त्रं निर्मितवन्तः सन्ति। अद्य नूतने भारते नूतनस्य उत्तरप्रदेशस्य एषा विशिष्टा पहचान अस्ति।
मुख्यमन्त्री बुधवासरे बेङ्गलूरुनगरे “उत्तरप्रदेश ग्लोबल ग्रोथ डायलॉग २०२६” इत्यस्य अन्तर्गतं आयोजिते रोडशो कार्यक्रमे उद्योगनेतॄन् सम्बोधयन् आसीत्। सः उक्तवान् यत् अद्य सम्पूर्णदिनं विविधक्षेत्रेषु कार्यरतैः निवेशकैः उद्योगनेतृभिः सह संवादस्य अवसरः प्राप्तः। वयम् अपश्याम यत् कथं बेङ्गलूरुनगरं उद्याननगरीरूपात् विकसित्य वैश्विकप्रौद्योगिकीशक्तिकेन्द्ररूपेण प्रतिष्ठितम् अभवत्। बेङ्गलूरोः विकासकथां भवन्तः दृष्टवन्तः श्रुतवन्तश्च। नूतनस्य भारतस्य नूतनस्य उत्तरप्रदेशस्य या विकासकथा अत्र श्रूयते, तां भवन्तः उत्तरप्रदेशं गत्वा स्वयम् अनुभूय शक्नुवन्ति। तदेव निमन्त्रणं दातुमहम् अत्र आगतः अस्मि।
प्रधानमन्त्रिणः मोदीमहाभागस्य नेतृत्वे विकासस्य नूतनाः प्रतिमानाः
मुख्यमन्त्री उक्तवान् यत् अस्माकं गौरवस्य विषयः अस्ति यत् गतद्वादशवर्षेषु प्रधानमन्त्री नरेन्द्रमोदीमहाभागस्य नेतृत्वे भारतेन विकासस्य नूतनाः प्रतिमानाः स्थापिताः। भारतं विश्वस्य तीव्रतमविकासशीलार्थव्यवस्थारूपेण तथा निवेशस्य श्रेष्ठतमगन्तव्यरूपेण प्रतिष्ठापितम् अस्ति। गतनववर्षेषु उत्तरप्रदेशः अपि अस्य विकासगाथायाः महत्त्वपूर्णः सहभागी अभवत्। पूर्वं उत्तरप्रदेशस्य छविः उत्तमा नासीत्। दुष्टा विधिव्यवस्था, नीतिनिर्णयेषु जडता, प्रशासनाभावः तथा बीमारूराज्यस्य संज्ञा अस्य परिचयः आसीत्। जनानां पलायनं नियतिः अभवत्। कृषिक्षेत्रे लघुमध्यमोद्योगक्षेत्रे च जनानां सम्बन्धः शनैः शनैः क्षीणः अभवत्।
उत्तरप्रदेशे भारतस्य अपेक्षानुसारं सर्वं उपलब्धम्
मुख्यमन्त्री उक्तवान् यत् अधुना उत्तरप्रदेशे तत्सर्वम् उपलब्धम् अस्ति यत् भारतः अपेक्षते। उत्तमा विधिव्यवस्था, विश्वस्तरीयम् आधारभूतसंरचनाजालम्, देशस्य षष्टिप्रतिशताधिकाः द्रुतमार्गाः, षोडशसहस्रकिलोमीटरपरिमितं रेलजालम् तथा चतुःलक्षाधिककिलोमीटरपरिमितं मार्गजालम् उत्तरप्रदेशस्य समीपे वर्तते। वाराणसी हल्दिया राष्ट्रीयजलमार्गः, दिल्ली मेरठ तीव्ररेलसेवा, सप्तसु नगरेषु मेट्रोसेवा, पूर्वीयपश्चिमीयसमर्पितमालवाहकमार्गयोः संगमस्थलम्, पञ्च अन्तर्राष्ट्रीयविमानस्थानकानि तथा एकादश घरेलुविमानस्थानकानि च अनुपमसम्पर्कव्यवस्थायाः प्रतीकानि सन्ति। पञ्च नूतनविमानस्थानकानां निर्माणकार्यं प्रचलति। नोएडा अन्तर्राष्ट्रीयविमानस्थानके गतपञ्चदशजूनदिनाङ्कात् वाणिज्यविमानसेवा प्रारब्धा अस्ति।
स्थिरतया सुरक्षया च देशस्य शीर्षत्रये अर्थव्यवस्था
मुख्यमन्त्री उक्तवान् यत् स्थिरतायाः सुरक्षायाश्च परिणामस्वरूपम् उत्तरप्रदेशः बीमारूराज्यस्य स्थितेः निर्गत्य देशस्य शीर्षत्रयेषु अर्थव्यवस्थासु स्थानं प्राप्तवान्। गतषड्वर्षेभ्यः राज्यं राजस्वाधिक्ययुक्तराज्यरूपेण स्थितम् अस्ति। गतनववर्षेषु राज्यस्य अर्थव्यवस्था प्रति व्यक्त्यायश्च त्रिगुणितौ अभवताम्। अस्माकं समीपे षट्त्रिंशत् क्षेत्रविशिष्टनीतयः तथा पञ्चसप्ततिसहस्रएकडपरिमितः भूमिभाण्डारः उपलब्धः अस्ति। द्रुतमार्गाणां पार्श्वेषु सप्तविंशतिस्थानेषु औद्योगिकलॉजिस्टिकसमूहाः विकसिताः भवन्ति। बीडा नाम्ना देशस्य महान् औद्योगिकनगरपरियोजना अपि विकसिताभवत्।
निवेशकानां कृते कौशलसम्पन्नं मानवबलम्
निवेशकान् कौशलसम्पन्नमानवबलस्य विषये आश्वासयन् मुख्यमन्त्री उक्तवान् यत् उत्तरप्रदेशः प्रतिवर्षं द्विलक्षाधिकान् विज्ञानप्रौद्योगिकीअभियान्त्रिकीगणितविषयकस्नातकान् उत्पादयति। द्वौ भारतीयप्रौद्योगिकीसंस्थानौ, एकम् भारतीयप्रबन्धनसंस्थानम्, तिस्रः राज्यप्राविधिकविश्वविद्यालयाः तथा विशालं प्राविधिकव्यावसायिकशिक्षाजालं युवानः सर्वेषु क्षेत्रेषु दक्षान् करोति। उद्योगानां आवश्यकतानुसारम् उद्भवमानप्रौद्योगिकीक्षेत्रेषु कौशलसम्पन्नमानवबलस्य निर्माणं क्रियते।
कृषिक्षेत्रे उद्योगक्षेत्रे च उल्लेखनीया सफलता
कृषिक्षेत्रस्य लघुमध्यमोद्योगक्षेत्रस्य च विषये चर्चां कुर्वन् मुख्यमन्त्री उक्तवान् यत् गतनववर्षेषु कृषिविकासदरः अष्टप्रतिशततः वर्धित्वा अष्टादशप्रतिशतं प्राप्तवान्। पञ्च कृषिविश्वविद्यालयानां नवाशीतिकृषिविकासकेन्द्राणां च माध्यमेन कृषकाः प्रशिक्षिताः विपणिसम्पर्केण च सम्बद्धाः सन्ति। उत्तरप्रदेशे देशस्य सर्वाधिकं षडशीतिप्रतिशतं सिंचितकृषिक्षेत्रम् अस्ति। राज्ये षण्णवतिलक्षाधिकाः लघुमध्यमोद्योगएककाः सञ्चालिताः सन्ति, येषां एकजनपदएकोत्पादयोजनया महत् प्रोत्साहनं प्राप्तम्। अस्याः योजनायाः माध्यमेन प्रत्येकस्य जनपदस्य विशिष्टोत्पादः ब्राण्डरूपेण प्रतिष्ठितः। गतनववर्षेषु अष्टादशसहस्राधिकानि वृहद्योगिकसंस्थानानि उत्तरप्रदेशे स्थापितानि। नववर्षपूर्वं राज्ये केवलं चतुर्दशसहस्राणि वृहद्योगकारखानानि आसन्, तेषां संख्या अद्य त्रयस्त्रिंशत्सहस्राधिकां प्राप्तवती।
निवेशकानां कृते सुरक्षा सुविधा नीतिस्थैर्यं च
मुख्यमन्त्री उद्योगनेतॄन् आश्वासयन् उक्तवान् यत् उत्तरप्रदेशस्य द्वियन्त्रसरकारः प्रत्येकं निवेशकं सुरक्षा, एकद्वारसेवा तथा नीतिस्थैर्यं प्रदास्यति। उत्तरप्रदेशस्य विषये याः सम्भावनाः भवन्तः श्रुतवन्तः, ताः स्वनिवेशेन प्रत्यक्षतया अनुभोक्तुं शक्नुवन्ति। मम विश्वासः अस्ति यत् भवन्तः सर्वे उत्तरप्रदेशस्य विकासगाथायाः सहभागीभूत्वा विकसितभारतस्य संकल्पं साकारयिष्यन्ति।
मुख्यमन्त्री रोडशो कार्यक्रमे उपस्थितानां सर्वेषां उद्योगनेतॄणां मुख्यकार्यपालकाधिकारिणां च प्रति आभारं व्यक्तवान्।
अस्मिन् अवसरे उत्तरप्रदेशस्य वित्तमन्त्री सुरेशकुमारखन्ना, आधारभूतसंरचना तथा औद्योगिकविकासायुक्तः दीपककुमारः, अपरमुख्यसचिवः उद्योगविभागस्य आलोककुमारः, प्रमुखसचिवः सूचना प्रौद्योगिकी तथा इलेक्ट्रॉनिक्स विभागस्य आलोककुमारः, यीडा संस्थायाः मुख्यकार्यपालकाधिकारी आर के सिंहः तथा उद्योगजगतः अनेके नेतारः मुख्यकार्यपालकाधिकारिणश्च उपस्थिताः आसन्।
Hindusthan Samachar / Dheeraj Maithani