लखनऊ, 25 जूनमासः (हि.स.)।उत्तरप्रदेशस्य उपमुख्यमन्त्री केशवप्रसादमौर्यः उक्तवान् यत् आपत्कालः काङ्ग्रेसदलस्य तानाशाहीमानसिकतायाः परिणामः आसीत्। केशवप्रसादमौर्यः गुरुवासरे स्वसामाजिकमाध्यमे प्रकाशिते संदेशे अलिखत् यत् भारतीयलोकतन्त्रस्य इतिहासे पञ्चविंशतितमे जूनमासस्य दिने वर्षे १९७५ सः कृष्णदिवसः आसीत् यदा काङ्ग्रेसदलस्य तदानीन्तनी प्रधानमन्त्री इन्दिरागान्धी सत्ताया अहङ्कारवशात् देशे आपत्कालम् आरोपितवती। अनेन सा संविधानं स्वनियन्त्रणे स्थापयित्वा जनानां मूलभूताधिकारान् लोकतान्त्रिकसंस्थानां स्वतन्त्रतां च तीव्रतया आहतवती। ताभ्यः गम्भीरक्षतिं च अकरोत्।

उपमुख्यमन्त्री अलिखत् यत् संविधानहत्यादिवसः अस्मान् तस्य कृष्णकालस्य स्मरणं कारयति यस्मिन् असहमतिस्वराः निर्दयतया दमिताः, पत्रकारितायाः स्वतन्त्रतायाः उपरि कठोरनियन्त्रणं स्थापितम्, लोकतन्त्रसेनानिनः च निर्दयतया कारागारस्य शृङ्खलासु निरुद्धाः। अयम् आपत्कालः काङ्ग्रेसदलस्य तानाशाहीमानसिकतायाः प्रत्यक्षः परिणामः आसीत्।

केशवप्रसादमौर्यः अलिखत् यत् लोकतन्त्रस्य रक्षणार्थं तासु प्रतिकूलपरिस्थितिषु अपि अचलतया स्थित्वा संघर्षं कृतवन्तः लोकतन्त्रसेनानिनः तेषां साहसम्, त्यागः, राष्ट्रहिते समर्पणभावः च सदा स्मरणीयः भविष्यति। तं कृष्णकालं धैर्येण प्रतिरुद्धवन्तः सर्वे लोकतन्त्रसेनानिनः पुनः पुनः कोटिशः प्रणम्यन्ते।

-----------

Hindusthan Samachar / Dheeraj Maithani