सीवाननगरम्, २५ जूनमास: (हि.स.)। भारतीयजनतापक्षेण १९७५ तमवर्षस्य जूनमासस्य २५ दिनाङ्के प्रवर्तितस्य आपत्कालस्य वर्षग्रन्थि: कृष्णदिवसः इति रूपेण आचरिता। अस्मिन् निमित्ते गुरुवासरे विशालं विरोध-प्रदर्शनं जन-जागरण-कार्यक्रमश्च आयोजितः।

महाबीरी-पथस्थितात् भाजपायाः पूर्व-जनपदाध्यक्षस्य प्रोफेसर-अभिमन्यु-सिंहस्य निवासात् आरब्धं एतत् प्रदर्शनं जेपी-चत्वरे समाप्य सभारूपेण परिणतम्। अस्मिन् कार्यक्रमे भाजपायाः वरिष्ठ-पदाधिकारीणः, जनप्रतिनिधयः, शताधिकाः कार्यकर्तारश्च सहभागीभूत्वा लोकतन्त्ररक्षणाय संघर्षं कृतवन्तः लोकतन्त्र-सेनानिनः श्रद्धया स्मृतवन्तः।

सभां सम्बोधयन् भाजपायाः जनपदाध्यक्षः राहुल-तिवारी अवदत् यत् १९७५ तमवर्षस्य जूनमासस्य २५ दिनाङ्के तत्कालीन-काङ्ग्रेस-सर्वकारेण देशे आरोपितः आपत्कालः भारतीय-लोकतन्त्रस्य इतिहासे कृष्णाध्यायः आसीत्। तेन आरोपितं यत् तस्मिन् काले संविधानस्य मूलभावना, लोकतान्त्रिक-अधिकाराः तथा अभिव्यक्ति-स्वातन्त्र्यं निर्दयतया दमनं प्राप्तम्।

तेन उक्तं यत् आपत्कालेन न केवलं भारतस्य लोकतान्त्रिक-परम्पराः आहताः, अपितु समाजस्य विविधवर्गीयाः जनाः अपि दमनं प्रताडनां च अनुभूतवन्तः। अद्यतनस्य कार्यक्रमस्य उद्देश्यं नववंशं तस्य कालस्य यथार्थस्थितिभिः परिचाययितुम् इति सः अवदत्।

जनपद-उपाध्यक्षः धनञ्जय-सिंहः अवदत् यत् जूनमासस्य २५ दिनाङ्कः भारतीय-लोकतान्त्रिक-इतिहासस्य कृष्णदिवसः अस्ति। तेन उक्तं यत् तत्कालीन-प्रधानमन्त्रिणा इन्दिरा-गान्धिना आरोपिते आपत्काले सामान्यजनानां स्वरः निवारितः तथा लोकतान्त्रिक-अधिकाराणां हननम् अभवत्। लोकतन्त्रस्य संरक्षणाय समाजः सर्वदा जागरूकः सतर्कश्च भवेत्, नववंशेन च ज्ञातव्या यत् लोकतान्त्रिक-मूल्यानां संरक्षणं महता संघर्षेण बलिदानेन च साध्यते।

भाजपानेता राजेश-श्रीवास्तवः अवदत् यत् अद्यापि आपत्कालस्य तं कालं स्मृत्वा मनः व्यथितं भवति। तस्मिन् समये राजनीतिज्ञाः, पत्रकाराः, लेखकाः, कवयः, सामाजिक-कार्यकर्तारश्च बह्वीः प्रताडनाः अनुभूतवन्तः। समाचारपत्रेषु पूर्व-सेंसर-व्यवस्था प्रवर्तिता तथा विरोधस्वराः दमनाय प्रयत्नः कृतः। अत एव आपत्कालः भारतीय-लोकतन्त्रस्य इतिहासे अत्यन्तं कठिनतमेषु पीडादायकतमेषु च कालेषु परिगण्यते।

कार्यक्रमे कार्यकर्तारः कृष्णपट्टिकाः बद्ध्वा लोकतन्त्रस्य रक्षणाय संकल्पं कृतवन्तः तथा आपत्कालस्य घटनाः जनं जनं प्रति प्रसारयितुम् आह्वानम् अकुर्वन्।

भाजपानेतारः अवदन् यत् लोकतन्त्रस्य, संविधानस्य तथा नागरिक-अधिकाराणां संरक्षणार्थं समाजः सर्वदा जागरूकः सतर्कश्च भवितुमर्हति।

अस्मिन्नवसरे भाजपानेतारः हरेंद्र-कुशवाहा, देवेन्द्र-गुप्तः, सत्यम्-सिंहः, अम्बालाल-शर्मा, आदित्य-पाठकः इत्यादयः उपस्थिताः आसन्।

Hindusthan Samachar / Divya Ranjan