नव दिल्ली, 25 जूनमासः (हि.स.)।दिल्लीनगरस्य उपराज्यपालः तरनजीतसिंहसन्धू गुरुवासरे पूर्वदिल्लीस्थितां संजयझीलाम् आगत्य तत्र प्रचलमानानां जीर्णोद्धारकायाकल्पकार्याणां निरीक्षणम् अकरोत्। स्थले निरीक्षणकाले दिल्लीविकासप्राधिकरणस्य अधिकारिणः अपि उपस्थिताः आसन्। अधिकारिभिः उपराज्यपालाय द्विपञ्चाशदधिकैकपञ्चाशत् एकडपरिमितायाः झीलायाः तथा तस्याः परितः स्थितस्य पञ्चषष्ट्यधिकशतैकडपरिमितस्य संरक्षितवनप्रदेशस्य पुनर्जीवनार्थं चरणबद्धकार्ययोजनायाः विषये विस्तृतसूचना प्रदत्ता।

उपराज्यपालः सामाजिकमाध्यमे प्रकाशिते स्वसन्देशे उक्तवान् यत् अस्य महत्त्वपूर्णस्य जलहरितक्षेत्रस्य सर्वासु ऋतुषु उपयोगयोग्यं स्वच्छं मनोरञ्जनयोग्यं च स्थलं निर्मातुं अनेकानि महत्त्वपूर्णानि कार्याणि क्रियमाणानि सन्ति। तेन डल्लूपुरास्थितस्य मलजलशोधनकेन्द्रात् शुद्धजलस्य निरन्तरापूर्तिः सुनिश्चितुं दिल्लीजलमण्डलाय सञ्चाल्यमानस्य जलनलिकामार्गस्य मरम्मतकार्यं शीघ्रतया सम्पन्नं कर्तुम् निर्देशाः प्रदत्ताः।

तेन उक्तं यत् झीलायाः संरक्षणार्थं पुनर्जीवनार्थं च निरन्तरं तृणनिर्मूलनम् शैवालनिर्मार्जनम् जियोटेक्सटाइलप्रविधेः उपयोगेन तटबन्धानां ढलानानां सुदृढीकरणं च पूर्वमेव प्रचलति। आगामिषु चरणेषु जलप्रवाहस्य सुचारुकरणम् भूजलपुनर्भरणवृद्ध्यर्थं बायोस्वेल्सस्थापनम् बायोरेमेडिएशनोपायानां कार्यान्वयनम् जले विलीनप्राणवायोः मात्रावृद्ध्यर्थम् एरेटरयन्त्राणां फव्वाराणां च स्थापनम् इत्यादिषु विशेषः बलः प्रदास्यते।

उपराज्यपालः अवदत् यत् एतदतिरिक्तं पञ्चसहस्रसंख्याकाः देशीयवृक्षाः रोपयित्वा अस्य प्रदेशस्य पारिस्थितिकी जैवविविधता समृद्धा करिष्यते। वयं संजयझीलायाः पूर्ववैभवं पुनः स्थापयितुं तस्याः दीर्घकालिकसंरक्षणं सुनिश्चितं कर्तुं च दृढसङ्कल्पाः स्मः।

---------------

Hindusthan Samachar / Dheeraj Maithani