रायपुरम्, २६ जूनमासः (हि.स.)। मुख्यमन्त्रिणः विष्णुदेवसायस्य नेतृत्वे महिलानाम् आत्मनिर्भरता-वर्धनाय कृषिक्षेत्रे आधुनिक-प्रौद्योगिक्याः प्रोत्साहनाय च जशपुर-जनपदस्य स्वसहायता-समूहानां महिलाः नूतनां परिचयं निर्मिमते। ‘नमो ड्रोन-दीदी-योजना’ अन्तर्गतं जनपदस्य चयनिताः महिलाः सम्प्रति रायपुरस्थिते आईटीएम-विश्वविद्यालये ड्रोन-सञ्चालनस्य दूरस्थ-विमानचालक-प्रशिक्षणस्य विशेषप्रशिक्षणं प्राप्नुवन्ति।

एतत् प्रशिक्षणं महिलाः आधुनिक-कृषि-प्रौद्योगिक्या सह संयोजयति तथा च ताभ्यः कृषिक्षेत्रे स्वरोजगारस्य नूतनान् अवसरान् प्रददाति। प्रशिक्षणस्य माध्यमेन महिलाः ड्रोन-आधारित-कृषिसेवाः प्रदातुं दक्षाः भवन्ति।

प्रशिक्षणकाले ड्रोन-भगिनीभ्यः ड्रोनस्य तान्त्रिक-संरचना, सुरक्षित-विमानसञ्चालनम्, दूरस्थ-विमानचालनम्, सस्येषु उर्वरकाणां कीटनाशकानाञ्च वैज्ञानिक-प्रक्षेपणम्, ड्रोन-इत्यस्य अनुरक्षणम्, कृषिक्षेत्रे तस्य व्यावहारिक-प्रयोगश्च विस्तरेण शिक्ष्यते।

प्रशिक्षणस्य सम्पन्नतायाः अनन्तरं एताः ड्रोन-भगिन्य: जशपुर-जनपदस्य कृषकेभ्यः ड्रोनेन नैनो-उर्वरकाणां, कीटनाशकानां तथा अन्येषां कृषिकार्यानां सेवाः प्रदास्यन्ति। अनेन कृषिकार्यम् अल्पकालेन, न्यूनव्ययेन, अधिकप्रभावकारितया च सम्पन्नं भविष्यति। तेन वैज्ञानिक-कृषेः अपि प्रोत्साहनं भविष्यति।

उल्लेखनीयं यत् मुख्यमन्त्री विष्णुदेवसायः अद्यतन-जशपुर-प्रवासकाले प्रशिक्षणार्थं प्रेष्यमाणानां ड्रोन-दीदीनां बसयानस्य हरितध्वज-प्रदर्शनेन प्रस्थानम् अकारयत्। अस्मात् पूर्वं २०२६ तमवर्षस्य एप्रिलमासस्य १७ दिनाङ्के रणजीता-क्रीडाङ्गणे आयोजिते ‘लखपति-दीदी’ कार्यक्रमे ड्रोन-दीदीभ्यः उन्नता मृदा-परीक्षण-यन्त्राणि अपि प्रदत्तानि आसन्।

जशपुर-जनपदस्य कृषि-उपसञ्चालकस्य अनुसारेण प्रशिक्षणोत्तरं ड्रोन-भगिन्य: जनपदस्य विभिन्न-विकासखण्डेषु कृषकेभ्यः प्रौद्योगिकी-आधारिताः कृषिसेवाः प्रदास्यन्ति। अनेन कृषिकर्मणि समयस्य रक्षणं, व्ययस्य न्यूनीकरणम्, उत्पादनक्षमतायाश्च वर्धनं भविष्यति।

मुख्यमन्त्रिणः विष्णुदेवसायस्य इच्छानुरूपं महिलाः आधुनिक-प्रौद्योगिक्या सह संयोज्य ताभ्यः रोजगारस्य स्वरोजगारस्य च नूतनाः अवसराः प्रदीयन्ते। जनपद-प्रशासनस्य कृषि-विभागस्य च विश्वासः अस्ति यत् एषः उपक्रमः जशपुरे प्रौद्योगिकी-आधारित-कृषेः विकासाय, महिला-स्वसहायता-समूहानाम् आर्थिक-सशक्तीकरणाय तथा कृषकाणाम् आय-वृद्धये महत्त्वपूर्णां भूमिकां निर्वहिष्यति।

Hindusthan Samachar / Divya Ranjan