शिमलानगरम्, २७ जूनमासः (हि.स.)। हिमाचलप्रदेशस्य मुख्यमन्त्री सुखविन्द्रसिंह-सुक्खू-महोदयः अद्य शनिवासरे काङ्गड़ा-जनपदस्य दुर्गमे जनजातीयक्षेत्रे बृहत्-भङ्गाल-प्रदेशे प्रवासं करिष्यति। अर्वाचीन-आपदया प्रभावितस्य अस्य क्षेत्रस्य स्थितेः निरीक्षणेन सह मुख्यमन्त्री स्थानीयजनैः सह प्रत्यक्षसंवादं करिष्यति तथा तेषां समस्याः श्रोष्यति। गतचतुर्दशवर्षेषु प्रथमवारं प्रदेशस्य कश्चित् मुख्यमन्त्री अस्मिन् दुर्गमक्षेत्रे गमिष्यति। अस्मात् पूर्वं पूर्वमुख्यमन्त्री प्रेमकुमार-धूमलः २०११ तमवर्षस्य सेप्टेम्बरमासस्य २३ दिनाङ्के बृहत्-भङ्गाल-प्रदेशस्य भ्रमणं कृतवान् आसीत्। प्रायः पञ्चशतजनसंख्यायुक्तः बृहत्-भङ्गालः अत्यन्तदुर्गमः प्रदेशः अस्ति। अत्र आयुर्वेदिक-औषधालयः, राजकीय-उच्चविद्यालयः, राशन-वितरणकेन्द्रम्, पटवारकार्यालयश्च सन्ति, किन्तु तेषु कर्मचारीणां न्यूनता वर्तते।

निर्धारितकार्यक्रमानुसारं मुख्यमन्त्री सुक्खू-महोदयः बृहत्-भङ्गालं प्राप्य हेलिपदात् पदयात्रया वन-विश्रामगृहं गमिष्यति। ततः परं सः आपदाप्रभावित-क्षेत्राणां निरीक्षणं करिष्यति तथा प्रभावितपरिवारैः सह मिलिष्यति। भ्रमणस्य अवधौ सः क्षतेः परिमाणस्य आकलनं करिष्यति, राहत-पुनर्वास-कार्याणां प्रगतिविषये च जानकारीं प्राप्स्यति। अस्मिन् अवसरे स्थानीयजनाः मार्गव्यवस्था, सञ्चारसुविधा, स्वास्थ्यसेवा तथा अन्यासां मूलभूतसुविधानां सम्बन्धिनः विषयान् तस्य पुरतः स्थापयितुं शक्नुवन्ति।

अपराह्णे मुख्यमन्त्री अपर-बृहत्-भङ्गाल-ग्रामस्थितायाः सूक्ष्म-जलविद्युत्-परियोजनायाः निरीक्षणं करिष्यति। तत्र सः परियोजनायाः कार्यप्रणालीं तथा क्षेत्रे तस्याः उपयोगितां परीक्षिष्यति। अनन्तरं वन-विश्रामगृहस्य समीपे आयोजितायां जनसभायां सहभागी भूत्वा जनान् सम्बोधयिष्यति तथा जनसमस्याः श्रोष्यति। मुख्यमन्त्री बृहत्-भङ्गाले एव रात्रिविश्रामं करिष्यति। अनन्तरदिने, २८ जूनमासे, सः हेलिकॉप्टरमार्गेण गग्गल-नगरं मार्गीकृत्य शिमलानगरं प्रत्यागमिष्यति।

भ्रमणात् पूर्वं पत्रकारैः सह वार्तालापे मुख्यमन्त्री सुक्खू-महोदयः अवदत् यत्, मुख्यमन्त्रिरूपेण एषः तस्य बृहत्-भङ्गाल-प्रदेशस्य प्रथमः प्रवासः अस्ति। तेन उक्तं यत्, गतचतुर्दशवर्षेषु कश्चिदपि मुख्यमन्त्री अस्य दुर्गमस्य पश्चाद्वर्तिनः क्षेत्रस्य भ्रमणं न कृतवान्। सः अवदत् यत्, तस्य उद्देश्यं तत्रत्यजनानां समस्याः समीपतः अवगन्तुं तथा क्षेत्रस्य विकासाय नूतनकार्याणां सम्भावनाः ज्ञातुम् अस्ति। तेन पुनरुक्तं यत्, शासकीययोजनानां लाभः अन्तिमजनपर्यन्तं प्रापयितुं क्षेत्रस्य वास्तविकपरिस्थितीनां प्रत्यक्षज्ञानम् आवश्यकम्, तथा बृहत्-भङ्गालस्य समस्यानां सम्यगवबोधः अपि तत्र गत्वैव भवितुमर्हति।

Hindusthan Samachar / Divya Ranjan