भुवनेश्वरम्, २७ जूनमासः (हि.स.)। विश्व-एमएसएमई-दिवसस्य अवसरे ओडिशायाः मुख्यमन्त्री मोहनचरणमाझी राज्यस्य सर्वेभ्यः उद्यमिभ्यः, शिल्पिभ्यः, नवोद्यमिभ्यः तथा सूक्ष्म-लघु-मध्यम-उद्यम-क्षेत्रे सम्बद्धेभ्यः जनेभ्यः हार्दिकाः शुभकामनाः प्रदत्तवान्। सः राज्यस्य आर्थिक-प्रगतौ तेषां महत्त्वपूर्णस्य योगदानस्य प्रशंसाम् अकरोत्।

मुख्यमन्त्री सामाजिक-माध्यमेषु स्व-सन्देशे उक्तवान् यत् ओडिशा-सर्वकारः राज्ये सशक्तं गतिशीलं च एमएसएमई-पारिस्थितिकी-तन्त्रं विकसितुं कृत-सङ्कल्पः अस्ति। सर्वकारः नवाचारस्य प्रोत्साहने, उद्यमितायाः संवर्धने तथा उद्यमिनः रोजगार-सृजकान् ग्रामीण-समृद्धेः आधारं च निर्मातुं निरन्तरं कार्यं करोति।

सः अवदत् यत् उद्यमिनां, शिल्पिनां, नवोद्यमिनां तथा एमएसएमई-क्षेत्रस्य संयुक्त-प्रयत्नैः रोजगारस्य नूतनावसराः सृज्यन्ते, स्थानीयोद्योगाः सुदृढाः भवन्ति तथा आत्मनिर्भर-समृद्ध-ओडिशा-निर्माणस्य लक्ष्यं साकारं भवति।

Hindusthan Samachar / Divya Ranjan