सिलीगुडीनगरम्, २७ जूनमासः (हि.स.)। उच्च-माध्यमिक-परीक्षायाः परिणाम-घोषणानन्तरं विद्यार्थिनां पालकानां च मनसि उच्च-शिक्षां भविष्यत्-जीवनवृत्तिं च प्रति चिन्ता वर्धिता अस्ति। कस्मिन् विषये अध्ययनं करणीयम्, केन विश्वविद्यालयेन चयनं करणीयम् इत्यादीनां प्रश्नानाम् उत्तराणि प्रदातुं सिलीगुडीनगरे एकदिवसीयस्य ‘प्री-काउन्सेलिङ्ग् एण्ड् एजुकेशन-फेयर-२०२६’ इत्यस्य आयोजनम् अभवत्। शनिवासरे सिलीगुडी-नगरस्य कोर्टयार्ड् बाय् मैरियट्-होटेल-इत्यत्र आयोजितस्य अस्य शिक्षा-मेलापकस्य आयोजनं पश्चिमबङ्ग-व्यावसायिक-शैक्षणिक-संस्थानानां सङ्घेन कृतम्।

अस्मिन् शिक्षा-मेलापके देशस्य विभिन्न-प्रदेशेभ्यः आगताः पञ्चाशदधिकाः प्रतिष्ठित-विश्वविद्यालयाः, महाविद्यालयाः तथा शैक्षणिक-संस्थाः सहभागिनः अभवन्। अत्र विद्यार्थिभ्यः विविध-पाठ्यक्रमाणां, प्रवेश-प्रक्रियायाः, छात्रवृत्तेः, नियुक्त्यवसराणां च विषये एकस्मिन्नेव स्थले विस्तृता सूचना प्राप्तुं अवसरः प्राप्तः। कार्यक्रमस्य उद्घाटनावसरे राज्यस्य पर्यटनमन्त्री शङ्करघोषेण सह अनेके प्रशासनिक-अधिकारिणः शिक्षाविदश्च उपस्थिताः आसन्।

पर्यटनमन्त्री शङ्करघोषः विद्यार्थिनः सम्बोधयन् अवदत् यत् राज्यसर्वकारस्य प्रयत्नः अस्ति यत् विद्यार्थिभ्यः उच्च-शिक्षायै अन्येषु राज्येषु विदेशेषु वा गन्तुं आवश्यकता न भवेत्। राज्ये एव अन्ताराष्ट्रिय-स्तरस्य शिक्षा उपलब्धा भवेत् इति उद्दिश्य आधारभूत-संरचनायाः सुदृढीकरणं क्रियते, येन समयस्य धनस्य च उभयोः संरक्षणं भविष्यति।

शिक्षा-मेलापके उपस्थितैः विशेषज्ञैः विद्यार्थिभ्यः स्व-रुचि-योग्यता-भविष्यत्-योजनानुसारं उपयुक्तस्य पाठ्यक्रमस्य चयनार्थं मार्गदर्शनं प्रदत्तम्। तथा च विभिन्न-शैक्षणिक-संस्थानानां प्रति-निधिभिः सह प्रत्यक्ष-संवादेन पालकैः विद्यार्थिभिश्च प्रवेश-प्रक्रियासम्बद्धानां अनेकानां जटिल-प्रश्नानां समाधानम् अपि प्राप्तम्।

शिक्षाविदां मते एतादृशानि आयोजनानि विद्यार्थिनां उज्ज्वल-भविष्य-निर्माणे महत्त्वपूर्णां भूमिकां निर्वहिष्यन्ति।

Hindusthan Samachar / Divya Ranjan