हैदराबादः, २८ जूनमासः (हि.स.)। रिलायन्स-इण्डस्ट्रीज-इत्यस्य कार्यकारी-निर्देशकः अनन्त-अम्बानी रविवासरे आन्ध्रप्रदेशस्थितं विश्वप्रसिद्धं तिरुमला-श्रीवेङ्कटेश्वरस्वामि-मन्दिरं प्राप्य दर्शन-पूजनम् अकरोत्। अस्मिन् अवसरे सः स्वीयां श्रद्धां प्रकटयन् परम्परानुसारं मुण्डन-संस्कारं कारयित्वा भगवत: श्रीवेङ्कटेश्वरस्वामिनः चरणयोः स्वकेशान् समर्पितवान्।

मन्दिरं प्राप्य अनन्त-अम्बानी प्रथमं मुण्डन-संस्कारं सम्पन्नवान्। ततः पश्चात् विधिविधानपूर्वकं भगवत: श्रीवेङ्कटेश्वर-स्वामिनः दर्शनं कृत्वा विशेष-पूजार्चनां च अकरोत्। दर्शनस्य समये सः देशस्य समाजस्य च सुख-समृद्ध्यै कल्याणाय च प्रार्थनाम् अकरोत्।

उल्लेखनीयं यत् अम्बानी-परिवारः भगवत: श्रीवेङ्कटेश्वरस्वामिनः प्रति स्वस्य श्रद्धया प्रसिद्धः अस्ति। परिवारस्य सदस्याः समये समये तिरुमला-मन्दिरं गत्वा दर्शन-पूजनं कुर्वन्ति। गतवर्षे अनन्त-अम्बानी-इत्यस्य विवाहात् पूर्वम् अपि विवाहानन्तरम् अपि अम्बानी-परिवारेण तिरुमला-मन्दिरं गत्वा भगवत: श्रीवेङ्कटेश्वरस्वामिनः दर्शनं कृतम्।

तिरुमला-मन्दिरं देशस्य प्रमुखेषु तीर्थस्थलेषु अन्यतमम् अस्ति, यत्र प्रतिदिनं लक्षशः श्रद्धालवः भगवत: श्रीवेङ्कटेश्वर-स्वामिनः दर्शनार्थम् आगच्छन्ति। केश-समर्पणम् अत्र प्रमुखासु धार्मिक-परम्परासु अन्यतमा परम्परा अस्ति, यां श्रद्धालवः स्वश्रद्धाया: समर्पणस्य च प्रतीकरूपेण पालयन्ति।

हिन्दुस्थानसमाचारः

Hindusthan Samachar / Divya Ranjan