नवदिल्ली, 28 जूनमासः (हि.स.)।प्रधानमन्त्रिणा नरेन्द्रमोदिना रविवासरे स्वस्य मासिके रेडियोकार्यक्रमे मन की बात इत्यस्मिन् उक्तं यत् जूनमासः भारतस्य कृते अनेकाभिः उपलब्धिभिः प्रेरणादायकाभिः च पहलाभिः साक्षी अभवत्। तेन स्वदेशीयरक्षासामर्थ्यस्य विमाननक्षेत्रस्य प्रगतेः योगस्य वैश्विकलोकप्रियतायाः असमराज्ये हरगिलासंरक्षणाभियानस्य नागालैण्डराज्ये क्रीडाप्रोत्साहनपहलानां सामाजिकसुरक्षायोजनानां च उल्लेखः कृतः। तेन उक्तं यत् देशस्य विभिन्नेषु क्षेत्रेषु भवन्तः सकारात्मकपरिवर्तनाः आत्मनिर्भरभारतस्य दिशि नवीनां ऊर्जां ददति।

प्रधानमन्त्री मन की बात इत्यस्य पञ्चत्रिंशदधिकशततमसंस्करणे संवादं कुर्वन् उक्तवान् यत् वर्षस्य २०२६ तमस्य अर्धः प्रायेण समाप्तिं गच्छति। अतीतेषु षट्सु मासेषु देशेन अनेकेषु क्षेत्रेषु उल्लेखनीया प्रगतिः प्राप्ता। जूनमासः विशेषरूपेण अनेकाभिः महत्त्वपूर्णाभिः उपलब्धिभिः प्रेरणादायकैः घटनाचक्रैः च परिपूर्णः आसीत्। एताभिः सफलताभिः न केवलं देशस्य सामर्थ्यं प्रदर्शितम् अपितु नागरिकेषु आत्मविश्वासस्य सञ्चारोऽपि जातः।

तेन उक्तं यत् अद्यतनकाले भारतीयनौसेनायाः बेडे त्रयः नूतनाः युद्धपोताः समावेशिताः। एतेषां युद्धपोतानां रूपकल्पना निर्माणं तकनीकिविकासश्च भारते एव सम्पन्नः। एतत् आत्मनिर्भरभारताभियानस्य सफलतायाः प्रमाणम् अस्ति। तेन उक्तं यत् देशः इदानीं रक्षाउत्पादनक्षेत्रे निरन्तरं नवीनाः उन्नतिशिखराः स्पृशति। स्वदेशीयतन्त्रज्ञानाधारिताः प्रणालीयः राष्ट्रियसुरक्षां अधिकं सुदृढां कुर्वन्ति।

प्रधानमन्त्री उक्तवान् यत् अस्मिन्नेव मासे भारतनिर्मितः सी २९५ सैनिकपरिवहनविमानः स्वस्य प्रथमां सफलां उड्डयनयात्रां सम्पन्नवान्। एषा केवलं विमानस्य उड्डयनयात्रा नास्ति अपितु भारतस्य विमाननरक्षाविनिर्माणक्षेत्रयोः नूतना उड्डयनयात्रा अस्ति। देशे एतादृशानां चत्वारिंशत् विमानानां निर्माणं भविष्यति। अनेन एयरोस्पेसक्षेत्रं सुदृढं भविष्यति युवभ्यः नूतनाः रोजगारावसराः च उत्पत्स्यन्ते। अस्य लाभः बहुसंख्याभ्यः एम एस एम ई संस्थाभ्यः भारतीयोद्योगेभ्यः च भविष्यति। प्रधानमन्त्री रक्षानुसन्धानविकाससङ्घटनस्य वैज्ञानिकानामपि प्रशंसामकरोत्। तेन उक्तं यत् अद्यतनकाले स्वदेशीयदीर्घपरासभूमिआक्रमणक्रूजप्रक्षेपास्त्रस्य सफलपरीक्षणं सम्पन्नम्। एषा उपलब्धिः भारतस्य रक्षासामर्थ्यं अधिकं सुदृढं करोति तथा च देशः अत्याधुनिकसैन्यतन्त्रज्ञानविकासे तीव्रगत्या अग्रे गच्छतीति दर्शयति।

तेन अन्तरराष्ट्रीययोगदिवसस्य सफलतायाः उल्लेखः कृतः। तेन उक्तं यत् अस्मिन् वर्षे योगदिवसः समग्रे विश्वे अभूतपूर्वोत्साहेन आचरितः। विश्वस्य द्विसहस्रपञ्चशताधिकेषु महत्त्वपूर्णस्थानेषु योगसम्बद्धकार्यक्रमाः आयोजिताः। भारतसहितेषु अनेकेषु देशेषु कोटिशः जनाः योगं स्वीकृत्य स्वस्थजीवनस्य प्रति स्वप्रतिबद्धतां प्रदर्शितवन्तः। प्रधानमन्त्री अहमदाबादनगरे आयोजितायाः विश्वयोगासनचैम्पियनशिप् २०२६ इत्यस्यापि उल्लेखमकरोत्। तेन उक्तं यत् भारतीयक्रीडकाः अस्मिन् स्पर्धायां उत्कृष्टं प्रदर्शनं कृत्वा कुलम् ११४ पदकानि प्राप्तवन्तः। तेषु १०२ स्वर्णपदकानि आसन्। एषा उपलब्धिः विश्वमञ्चे भारतस्य योगपरम्परायाः क्रीडाप्रतिभायाश्च परिचायिका अस्ति।

प्रधानमन्त्री मोदी असमराज्ये प्रवर्तमानस्य हरगिलासंरक्षणाभियानस्य विषये उक्तवान् यत् कदाचित् हरगिलापक्षिणः विषये समाजे अनेके भ्रमाः अन्धविश्वासाश्च प्रचलिताः आसन्। जनाः एनं अशुभम् अमन्यन्त तथा तस्य नीडयुक्तान् वृक्षानपि छिन्दन्ति स्म। प्रसिद्धजीववैज्ञानिकी पूर्णिमादेवीबर्मन तथा स्थानीयमहिलानां प्रयत्नैः एषा स्थितिः परिवर्तिता। प्रधानमन्त्री उक्तवान् यत् सहस्रशः महिलाः मिलित्वा हरगिलासेना इति समूहं निर्माय अस्य दुर्लभपक्षिणः संरक्षणाभियानम् आरब्धवन्त्यः। अद्य एषः पक्षी स्थानीयसमुदायस्य गौरवविषयः अभवत्। एषः अभियानः दर्शयति यत् जनभागीदाऱ्या जागरूकतया च सामाजिकचिन्तनस्य परिवर्तनं शक्यते।

तेन नागालैण्डराज्ये क्रीडाप्रोत्साहनपहलानामपि प्रशंसा कृता। नागालैण्ड बेबी लीग इत्यस्य विषये तेन उक्तं यत् एषा पञ्चवर्षात् द्वादशवर्षपर्यन्तवयस्कबालकबालिकानां कृते विशेषा फुटबॉल् लीग अस्ति। एषा पहल केवलं बालकान् क्रीडया संयोजयितुं न सीमिता अस्ति अपितु तेषां प्रतिभायाः आत्मविश्वासस्य व्यक्तित्वविकासस्य च महत्त्वपूर्णां भूमिकां निर्वहति।

अस्याः लीगस्य आरम्भः नागालैण्डस्य अधिकाधिकबालकान् फुटबॉलक्रीडया संयोजयितुम् अभवत्। अधुना एषा लीग त्रिवर्षाणि पूर्णवती अस्ति। अस्याम् बालकाः बालिकाश्च समानरूपेण भागं गृह्णन्ति। अस्याः पहलायाः बालकेषु सकारात्मकः प्रभावः अभवत् तथा च राज्ये क्रीडासंस्कृतिः अधिकं सुदृढा अभवत्।

प्रधानमन्त्री मोदी नागालैण्ड वूमेन फुटसल लीग इत्यस्यापि उल्लेखमकरोत्। तेन उक्तं यत् फुटसल इति द्रुतगत्यात्मकः क्रीडाविशेषः अस्ति यस्मिन् लघुक्षेत्रे पञ्चक्रीडकयुक्ता टीम क्रीडति। अस्मिन् क्रीडायां क्रीडकैः शीघ्रनिर्णयाः करणीयाः भवन्ति तथा च स्वकीयतान्त्रिकक्षमतायाः उत्तमः उपयोगः करणीयः भवति। एषा लीग नागालैण्डस्य कन्याभ्यः स्वप्रतिभाप्रदर्शनस्य महत्त्वपूर्णं मञ्चं प्रददाति तथा च महिलानां क्रीडासु सहभागितां प्रोत्साहयति।

तेन उक्तं यत् प्रधानमन्त्री सुरक्षा बीमा योजना देशस्य दरिद्राणां न्यूनायवर्गीयजनानां च सुरक्षाप्रदानस्य प्रभावी माध्यमम् अभवत्। केवलं विंशतिरूप्यकाणां वार्षिकप्रीमियमेन द्विलक्षरूप्यकाणां दुर्घटनाबीमासुविधा प्रदायमानायां अस्यां योजनायाम् अद्यावधि अष्टपञ्चाशत्कोट्यधिकाः जनाः सम्बद्धाः सन्ति। तेन प्रधानमन्त्री जीवनज्योति बीमा योजना इत्यस्यापि उल्लेखः कृतः। तेन उक्तं यत् एषा योजनापि कोटिशः परिवारान् सुरक्षा प्रददाति। केवलं चतुःशतषट्त्रिंशदरूप्यकाणां वार्षिकप्रीमियमेन द्विलक्षरूप्यकाणां जीवनबीमासुरक्षा प्रदायमानायामस्यां योजनायाम् अद्यावधि सप्तविंशतिकोट्यधिकाः जनाः लाभान्विताः अभवन्। प्रधानमन्त्री जनान् आह्वानम् अकरोत् यत् एतासां योजनानां सूचना अधिकाधिकेषु जनसमूहेषु प्रसारणीया।

प्रधानमन्त्री मोदी महाराष्ट्रस्य नान्देडमण्डलस्य बहादुरपुरग्रामस्य पेठकरपरिवारस्य उदाहरणमपि समवेदयत्। तेन उक्तं यत् एतत् परिवारं विवाहसमारोहे पारम्परिकोपहारप्रदानस्य स्थाने ग्रामस्य प्रायेण सार्धत्रिसहस्रजनानां कृते दुर्घटनाबीमां कर्तुं निश्चयम् अकरोत्। अस्याः पहलायाः अन्तर्गतं प्रत्येकस्मै जनाय एकलक्षरूप्यकाणां बीमासुरक्षा प्रदत्ता। प्रधानमन्त्री उक्तवान् यत् एषा पहल समाजस्य प्रति उत्तरदायित्वस्य संवेदनशीलतायाश्च उत्कृष्टम् उदाहरणम् अस्ति। तेन जनान् आह्वानम् अकरोत् यत् ते स्वजीवनस्य विशेषावसरेषु समाजहितं सम्बद्धयितुं प्रयतन्ताम् तथा च आवश्यकतावन्तां जनानां साहाय्यार्थम् अग्रे आगच्छन्तु।

---------------

/ Dheeraj Maithani