-10 दिवसीयस्य प्रशिक्षण शिविरस्याद्य समापनम्

रायपुरम्, 29 जूनमासः (हि.स.)।

छत्तीसगढराज्यस्य अभनपुरे प्रचलति काङ्ग्रेसदलस्य जिलाध्यक्षानां दशदिवसीये प्रशिक्षणशिविरे सहभागितार्थम् आगतः काङ्ग्रेसदलस्य राष्ट्रियमाध्यमप्रचारविभागाध्यक्षः राममन्दिरन्यासस्य विषये प्रश्नान् उत्थापयन् उक्तवान् यत् भगवान् रामस्य नाम्ना भ्रष्टाचारः कदापि स्वीकार्यः न भवति। प्रशिक्षणशिविरस्य समापनम् अद्य एकोनत्रिंशतितमे जून मासे भविष्यति।

काङ्ग्रेसदलस्य राष्ट्रियमाध्यमप्रचारविभागाध्यक्षः पवन खेडा प्रशिक्षणशिविरे सहभागितार्थम् रविवासरे अष्टाविंशतितमे जून मासे रात्रौ रायपुरम् आगतः। सोमवासरे अभनपुरे प्रचलति जिलाकाङ्ग्रेससमित्याः अध्यक्षानां दशदिवसीये संगठनसृजनप्रशिक्षणशिविरस्य समापनसमारोहे सः सहभागी अभवत्। तेन माध्यमप्रतिनिधिभिः सह वार्तालापे राममन्दिरम् सामाजिकमाध्यमानि राजनीतिः निर्वाचनानि च सम्बन्ध्य बहूनि वक्तव्यानि प्रदत्तानि। अयोध्यायां राममन्दिरसम्बद्धदानस्य कथितचौर्यप्रकरणे पवन खेडा मन्दिरन्यासस्य कार्यप्रणाल्याः विषये प्रश्नान् उत्थापितवान्। सः उक्तवान् यत् भगवान् रामस्य नाम्ना भ्रष्टाचारः कदापि स्वीकार्यः न भवति।

खेडा आरोपम् अकरोत् यत् अयोध्यातः उज्जयिनीपर्यन्तं प्रकाशमानाः घटनाः संघस्य कार्यप्रणाल्याः विषये गम्भीरान् प्रश्नान् जनयन्ति। एतादृशैः संस्थानैः देशस्य हिन्दुसमाजस्य च अहितमेव कृतम्। आगामिनां राजनैतिकचुनौत्याः निर्वाचनानां च उल्लेखं कुर्वन् सः उक्तवान् यत् सत्तायाम् आसीनानां जनानाम् अहङ्कारः जातः अस्ति। ते जनतायाः वचनं न शृण्वन्ति अपितु स्वनीतीः जनतायाः उपरि आरोपयन्ति।

सः उक्तवान् यत् राममन्दिरनिर्माणार्थं धनं केवलं बृहत्संस्थानाभ्यः न आगतम् अपितु देशस्य मातृभिः भगिनीभिः स्वमसालापात्रेभ्यः सञ्चितं धनं दत्तम्। बालकैः अपि स्वगुल्लकानि भित्त्वा धनं समर्पितम्। एतादृशे पवित्रधने यदि काचित् अनियमितता भवति तर्हि सरकारः मौनदर्शकरूपेण उपविष्टुं न अर्हति। सः अवदत् यत् यदा वयं मन्दिरस्य चढावे जातचौर्यस्य अनियमिततानां वा विषये प्रश्नान् कुर्मः तदा भारतीयजनतापक्षः तत् आस्थायाः उपरि आक्रमणम् इति कथयति। सः स्पष्टतया उक्तवान् यत् चौर्यस्य विषये प्रश्नोत्तापनम् आस्थायाः उपरि आघातः न अपितु धर्मस्य संरक्षणमेव अस्ति। कार्यकर्तृभ्यः सः उक्तवान् यत् सामाजिकमाध्यमेषु भारतीयजनतापक्षस्य मिथ्याप्रचारस्य नैरेटिवस्य च प्रतिकारः केवलं तथ्यैः सत्येन च कर्तुं शक्यते।

सः सामाजिकमाध्यमप्रधाने अस्मिन् काले अस्य प्रशिक्षणशिविरस्य महत्त्वम् अपि निरूपितवान्। तेन उक्तम् यत् अनेन कार्यकर्तृभ्यः अधिगन्तुं परस्परसंवादं कर्तुं च उत्तमः अवसरः प्राप्तः। प्रशिक्षणशिविरे विभिन्नेषु दिवसेषु काङ्ग्रेसदलस्य राष्ट्रियपदाधिकारीणः सहभागिनः अभवन्। स्वयं राहुल गान्धी गतदिने प्रायः चत्वारि घण्टाः शिविरे स्थित्वा जिलाध्यक्षैः सह प्रत्यक्षसंवादम् अकरोत्।

अस्मात् पूर्वं दलस्य संगठनमहासचिवः के सी वेणुगोपालः छत्तीसगढप्रभारी सचिन पायलटः पी सी सी अध्यक्षः दीपक बैजः प्रतिपक्षनेता डा चरणदास महन्तः पूर्वमुख्यमन्त्री भूपेश बघेलः पूर्वोपमुख्यमन्त्री टी एस सिंहदेवः इत्यादयः वरिष्ठनेतारः अपि प्रशिक्षणसत्रेषु सहभागिनः अभवन्।

उल्लेखनीयम् अस्ति यत् काङ्ग्रेसदलस्य जिलाध्यक्षानां प्रशिक्षणशिविरे संगठनस्य सुदृढीकरणम् निर्वाचनतयारी माध्यमप्रबन्धनम् जनतया सह उत्तमसंवादः इत्यादिषु विषयेषु प्रशिक्षणम् प्रदत्तम्।

________________

Hindusthan Samachar / Dheeraj Maithani