लखनऊ, २८ जूनमासः (हि.स.)। आम-आदमी-पक्षस्य छात्र-एककस्य एसोसिएशन-ऑफ-स्टूडेण्ट्स-फॉर-अल्टरनेटिव-पॉलिटिक्स इत्यस्य उत्तरप्रदेशस्य महत्त्वपूर्णा सङ्गठनात्मक-सभा रविवासरे लखनऊ-स्थिते प्रदेश-कार्यालये सम्पन्ना। सभायाः अध्यक्षतां पक्षस्य मुख्य-प्रदेश-प्रवक्ता तथा छात्र-प्रकोष्ठस्य उत्तरप्रदेश-प्रभारी वंशराज-दुबे अकरोत्। अस्यां सभायां प्रदेशस्य विभिन्न-जनपदेभ्यः आगताः वरिष्ठ-पदाधिकारीणः सक्रिय-कार्यकर्तारश्च सहभागिन: अभवन्।

सभायां छात्राणां, यूनां तथा शिक्षा-व्यवस्थया सम्बद्धानां गम्भीर-विषयाणां विषये विस्तृतः विचार-विमर्शः अभवत्। सर्वसम्मत्या निर्णयः कृतः यत् प्रदेशे छात्राणां स्वरं सुदृढतया उत्थापयितुं शीघ्रमेव एएसएपी-सङ्घटनस्य नूतना जुझारू-सक्रिया च प्रदेश-कार्यकारिणी गठिता भविष्यति, या यूनां अधिकाराणां संरक्षणार्थं ग्रामात् आरभ्य राजधानीपर्यन्तं सुदृढं संघर्षं करिष्यति।

सभां सम्बोधयन् छात्र-प्रकोष्ठस्य प्रदेश-प्रभारी वंशराज-दुबेः अवदत् यत् उत्तरप्रदेशस्य छात्रवर्गः युवा-वर्गश्च अद्य अभूतपूर्वसङ्कटस्य सामना करोति। सर्वकारः यूनां भविष्यस्य विषये पूर्णतया असंवेदनशीलः अभवत्। लक्षशः छात्राः स्वभविष्यस्य विषये सन्दिग्धावस्थायां सन्ति, किन्तु सर्वकारः तेषां समस्याः समाधातुं न प्रयतते, प्रत्युत निरन्तरं ताः उपेक्षते। सः अवदत् यत् इदानीम् आम-आदमी-पक्षस्य छात्र-प्रकोष्ठः सम्पूर्णे प्रदेशे छात्रहितसम्बद्धेषु विषयेषु सङ्गठितस्य निर्णायकस्य च संघर्षस्य नेतृत्वं करिष्यति।

सभायाः अन्ते सर्वसम्मत्या निर्णयः कृतः यत् प्रदेशे शीघ्रमेव एएसएपी-सङ्घटनस्य नूतना प्रदेश-कार्यकारिणी गठिता भविष्यति। सङ्गठनं छात्राणां यूनां च समस्याः अधिष्ठाय चरणबद्धम् आन्दोलनं सञ्चालयिष्यति तथा शिक्षा-रोजगारयोः अधिकारौ सुनिश्चितौ कर्तुं सर्वकारं बाध्यं करिष्यति।

अस्मिन्नवसरे अरुण-वर्मा, अनीत-रावतः, अंशुल-यादवः, कुलदीप-यादवः, रघुकुल-यथार्थः, आशीष-कुमारः, अङ्कुश-उपाध्यायः, राकेश-यादवः, आशीष-मौर्यः, निलेश-चतुर्वेदी, आकाश-सिंहः, मो. जाबिर-रज़ा इत्यादयः शतशः छात्र-नेतारश्च उपस्थिताः आसन्।

Hindusthan Samachar / Divya Ranjan