Enter your Email Address to subscribe to our newsletters
नोएडानगरम्, २९ जूनमासः। उत्तरप्रदेश-राज्यस्य अन्यस्मिन् जनपदे स्थितानां बहूनां ग्रामाणां अत्याधुनिक-नगररूपेण विकासस्य योजना प्रचलति। एतत् क्षेत्रं शीघ्रमेव औद्योगिक-विनिर्माण-केन्द्रत्वेन विकसितं भविष्यति तथा लक्षशः रोजगार-अवसरान् सृजन् प्रमुख-औद्योगिक-गन्तव्यरूपेण प्रतिष्ठां प्राप्स्यति।
अस्मिन् क्रमे उत्तरप्रदेशे औद्योगिक-विकासस्य गतिं अधिकां तीव्रां कर्तुं यमुना-एक्सप्रेसवे-औद्योगिक-विकास-प्राधिकरणम् एकस्य महत्त्वाकाङ्क्षिणः ग्रीनफील्ड-परियोजनायाः कार्यं प्रारब्धवान्। यमुना-एक्सप्रेसवे-द्वितीय-विकास-चरणस्य अन्तर्गतं ‘महायोजना २०४१’ इत्यस्याधारेण ‘हाथरस अर्बन सेन्टर’ इति क्षेत्रं अत्याधुनिक-औद्योगिक-आवासीय-उपनगररूपेण विकसितं भविष्यति।
यीडा-संस्थया विकसितेषु चतुर्षु प्रमुखेषु अर्बन-नोडेषु—अलीगढ़-मथुरा-आगरा-हाथरसं विशेषतया प्रमुख-औद्योगिक-विनिर्माण-केन्द्रत्वेन चयनितम् अस्ति।अस्य विशाल-परियोजनायाः कृते हाथरस-सासनी-तहसीलयोः पञ्चाशदधिक-ग्रामाः अधिसूचिताः सन्ति। एषां समग्र-क्षेत्रफलं प्रायः ४००० हेक्टेयर (प्रायः १०,००० एकर) भविष्यति। अस्य अत्याधुनिक-नगरस्य सुव्यवस्थित-योजनार्थं ‘आरवी इंजीनियरिंग कन्सल्टेन्ट्स लिमिटेड्’ इति परामर्श-संस्था नियुक्ता अस्ति, या भौगोलिक-सूचना-प्रणाली आधारित-मानचित्रस्य साहाय्येन नियोजित-विकासं सुनिश्चितं करोति।
महायोजना-२०४१ अन्तर्गतं एतत् अर्बन-सेन्टर इति चतुर्षु विभागेषु विभक्तं भविष्यति—1. औद्योगिक-क्षेत्रम् – अत्र निर्माणीनां तथा महद्विनिर्माण-उद्योगानां स्थापनायाः व्यवस्था भविष्यति।2. आवासीय-क्षेत्रम् – अत्र कार्यरत-जनानां कृते आधुनिक-आवास-समूहाः, बहुमञ्जिली-गृहाणि तथा सुलभ-मूल्य-निवासाः निर्मास्यन्ते।3. वाणिज्य-तथा-रसद्-केन्द्रम् – व्यापारिक-क्रियाकलापानां कृते विपणि-प्रासादाः, वाणिज्य-भवनानि, आतिथ्य-गृहाणि तथा विशाल-भण्डारगृहाणि निर्मास्यन्ते।4. हरित-क्षेत्रम् – पर्यावरण-सन्तुलनस्य रक्षणार्थं समग्र-योजनाक्षेत्रस्य १५ प्रतिशताधिकः भागः हरित-मुक्त-प्रदेशरूपेण संरक्षितः भविष्यति।
प्रस्तावितस्य हाथरस-अर्बन-केन्द्रस्य भौगोलिक-स्थितिरेव अस्य प्रमुखं बलम् अस्ति। एतत् नगरं प्रत्यक्षतया नोएडा-अन्ताराष्ट्रिय-विमानस्थानकस्य प्रभाव-क्षेत्रे स्थितम् अस्ति, यस्य सम्पर्कार्थं यीडा संस्थया द्रुतमार्ग-जालस्य विकासः क्रियते। एतत् क्षेत्रं यमुना-एक्सप्रेसवे-समीपे वर्तते तथा राष्ट्रीय-राजमार्ग-९३ (आगरा–अलीगढ़), बरेली–मथुरा-मार्गः तथा राज्य-राजमार्ग-३३ इत्यादिभिः उत्तमरूपेण सम्बद्धम् अस्ति। एतत् आगरा-नगरस्य उपनगररूपेण विकसितं भविष्यति, येन ताजनगर्याः औद्योगिक-भारः अपि न्यूनीभविष्यति।
वर्तमाने हाथरसे पञ्जीकृताः १०,००० अधिकाः लघु-मध्यम-उद्योग-एककाः सन्ति। एतेभ्यः अस्मिन् केन्द्रे विश्वस्तरीय-आधारभूत-सुविधाः प्रदास्यन्ते। एक-जनपद-एक-उत्पाद योजनायाः अन्तर्गतं हाथरसस्य विश्वविख्यात-हींग-गुलाल-उद्योगयोः अन्ताराष्ट्रिय-मानकानुरूप-पैकेजिङ्ग् तथा निर्यात-केन्द्र-सुविधाः उपलब्धाः भविष्यन्ति।
कृषि-तथा-खाद्य-प्रसंस्करण-क्षेत्रमपि अस्य लाभं प्राप्स्यति। ब्रज-प्रदेशस्य कृषिप्रधानतां दृष्ट्वा अत्र विशाल-शीत-भण्डारगृहाणि, खाद्य-प्रसंस्करण-केन्द्राणि तथा दुग्ध-प्रसंस्करण-संयन्त्राणि प्राथमिकतया स्थापयिष्यन्ते।
तदतिरिक्तं रेडीमेड-वस्त्र-उद्योगः (होजरी), काचनिर्मित-मणयः (ग्लास-बीड्स), पीतल-आभरणानि (पायल), यन्त्र-उपकरणानि तथा विद्युत्-वाहनानां कलपुर्जानां निर्माणार्थं विशेष-औद्योगिक-खण्डाः निर्मास्यन्ते। अग्रिम-चरणे चिकित्सोपकरण-निर्माणम्, शल्यचिकित्सा-उपकरणानि तथा विद्युत्-जाल-यन्त्राणि उत्पादयन्त्यः वैश्विक-उद्योग-संस्थाः अपि आमन्त्रिताः भविष्यन्ति।यमुना-औद्योगिक-विकास-प्राधिकरणस्य मुख्य-कार्यपालक-अधिकारी आर.के.सिंहः अवदत् यत् अस्याः महायोजनायाः विस्तृत-परियोजना-प्रतिवेदनस्य निर्माणम् तथा भूम्यधिग्रहण-प्रक्रिया तीव्रगत्या प्रवर्तते। अस्य परियोजनायाः कार्यान्वयनेन न केवलं क्षेत्रस्य आर्थिक-परिदृश्ये महत्त्वपूर्णं परिवर्तनं भविष्यति, अपितु स्थानीय-युवभ्यः लक्षशः प्रत्यक्ष-अप्रत्यक्ष-रोजगार-अवसराः अपि सृज्यन्ते।
Hindusthan Samachar / Divya Ranjan