पूर्वी-सिंहभूम, २९ जूनमासः (हि.स.)। झारखण्ड-भाजपायाः प्रदेश-उपाध्यक्षः तथा पूर्व-विधायकः भानु-प्रताप-शाही द्विदिवसीय-साङ्गठनिक-प्रवासस्य अन्तर्गतं सोमवासरे जमशेदपुरम् आगतः। स्वप्रवासस्य प्रथमदिने सः भाजपा-जमशेदपुर-महानगर-विभागस्य विभिन्नासु सभासु सहभागित्वा सङ्गठनस्य बूथ-स्तरपर्यन्तं सुदृढीकरणं, कार्यकर्तॄणां सहभागितायाः वर्धनं तथा अग्रिम-कार्यक्रमाणां सिद्धतायाः विषये विस्तरेण चर्चाम् अकरोत्।

बिष्टुपुरस्थिते परमहंस-लक्ष्मीनाथ-गोस्वामी-मन्दिरे भाजपा-महानगराध्यक्षस्य संजीव-सिन्हाया: अध्यक्षतायाम् आयोजितायां सभायाम् जनपद-पदाधिकारिणः, मण्डलाध्यक्षाः, मण्डल-प्रभारिणः तथा विभिन्न-मोर्चानां जनपदाध्यक्षाः सहभागिनः अभवन्। सभायाम् सङ्गठनस्य विस्तारः, अग्रिम-अभियानानि तथा कार्यकर्तॄणां भूमिका इत्यादिषु विषये विचार-विमर्शः अभवत्। अस्मिन् अवसरे जनपद-प्रभारी बबन-गुप्तः अपि उपस्थितः आसीत्।

सभां सम्बोधयन् भानु-प्रताप-शाही अवदत् यत् भाजपायाः महत्तमा शक्तिः तस्याः समर्पिताः कार्यकर्तारः सन्ति। सः अवदत् यत् भूमिस्तरे कार्यरतानां कार्यकर्तॄणां विचारा:, अनुभवा: तथा समस्याः गम्भीरतया प्रदेश-नेतृत्वस्य पुरतः स्थापयिष्यन्ते, येन सङ्गठनम् अधिकं प्रभावी जनोन्मुखं च भवेत्। सः आश्वासनम् अददात् यत् साङ्गठनिक-संरचनायाः सुदृढीकरणाय कार्यकर्तॄणाम् अपेक्षानुरूपं सर्वसम्भवं पदक्षेपं स्वीकर्तुं प्रयत्नः भविष्यति।

स्वप्रवासस्य अवधौ भानु-प्रताप-शाही पूर्व-जनपदाध्यक्षैः, पूर्व-प्रदेश-पदाधिकारिभिः, पूर्व-जनपद-पदाधिकारिभिः तथा निवर्तमान-मण्डलाध्यक्षैः सह पृथक् सभाम् अकरोत्। अस्मिन् अवसरे सः सङ्गठनस्य वर्तमान-स्थितेः, भूमिस्तरीय-अनुभवानां तथा भावि-रणनीतेः विषये वरिष्ठ-नेतृभ्यः विचारान् अलभत। सः अवदत् यत् वरिष्ठ-कार्यकर्तॄणाम् अनुभवः सङ्गठनस्य महत्त्वपूर्णा निधिरस्ति तथा तेषां मार्गदर्शनेन भाजपायाः जनसम्पर्क-अभियानम् अधिकं सुदृढं भविष्यति।

सभायाम् महानगराध्यक्षः संजीव-सिन्हा गतैकमासस्य अवधौ आयोजितानां साङ्गठनिक-कार्यक्रमाणां विवरणं प्रस्तुत्य आगामि-गतिविधीनां रूपरेखाम् अपि प्रस्तुतवान्। सः अवदत् यत् कार्यकर्तॄणां सहयोगेन समर्पणेन च महानगर-विभाग: निरन्तरं सङ्गठनस्य जनहितस्य च विषयेषु सक्रियतया कार्यं करोति।

जनपद-प्रभारी बबन-गुप्तः नवीन-साङ्गठनिक-कार्यक्रमाणां प्रशंसां कृत्वा एस.आई.आर.-सम्बद्ध-विषयेषु विस्तरेण सूचनाम् अयच्छत्। सः आगामि-कार्यक्रमाणां सफल-सञ्चालनार्थम् आवश्यक-सिद्धतायाः तथा रणनीतेः विषये स्वविचारान् अपि न्यवेदयत्।

सायङ्काले भानु-प्रताप-शाही मानगो-स्थिते अतिथिगृहे विभिन्न-सामाजिक-सङ्गठनानां प्रतिनिधिभिः सह मिलित्वा सामाजिक-सरोकार-सम्बद्ध-विषयेषु चर्चाम् अकरोत् तथा तेषां विचारान् अशृणोत्।

स्वस्य प्रवासस्य द्वितीयदिने मङ्गलवासरे सः विचार-परिवारस्य वरिष्ठजनैः सह मिलिष्यति। ततः परं सीतारामडेरा तथा गोलमुरी-मण्डलयोः बूथ-स्तरीय-कार्यकर्तृभिः सह सभां कृत्वा साङ्गठनिक-गतिविधीनां तथा जनसम्पर्क-अभियानानां समीक्षां करिष्यति।

Hindusthan Samachar / Divya Ranjan