देवघरः, २८ जूनमासः (हि.स.)। इस्कॉन-देवघरेण आयोज्यमानस्य वार्षिक-रथयात्रा-महोत्सवस्य सज्जताः तीव्रगत्या प्रचलन्ति। महोत्सवस्य शुभारम्भः २९ जूनमासे २०२६ तमे वर्षे स्नानयात्रया सह भविष्यति। ज्येष्ठपूर्णिमायाः अवसरे आयोज्यमाने अस्मिन् उत्सवे भगवान् जगन्नाथः, माता सुभद्रा तथा भगवान् बलरामः वैदिकमन्त्रोच्चारणस्य मध्ये विशेष-महाभिषेकेन अभिषेचिताः भविष्यन्ति।

इस्कॉन-देवघर-परिसरे प्रातः ११:०० वादनतः स्नानयात्रा-कार्यक्रमः आरभ्यते। अस्य कार्यक्रमस्य अन्तर्गतं कीर्तनम्, स्नानयात्रा-कथा, अभिषेकः तथा विशेष-पूजार्चनायाः आयोजनं भविष्यति। धार्मिक-परम्परानुसारम् अनुष्ठानपूर्वकं शुद्धीकृतानां १०८ कलशानां जलेन भगवत: दिव्य-स्नानम् कारयिष्यते। कार्यक्रमस्य समापनम् अपराह्णे ४:०० वादने महाप्रसाद-वितरणेन सह भविष्यति।

स्नानयात्रायाः अनन्तरं परम्परानुसारं भगवान् जगन्नाथः, बलरामः तथा सुभद्रा पञ्चदशदिनानि अनासरा (विश्रामकालः) इति अवधौ तिष्ठन्ति। अस्मिन् काले भगवान् भक्तेभ्यः दर्शनं न ददाति। ततः परं नवयौवनोत्सवस्य अवसरे भगवतः पुनः दर्शनं भवति। स्नानयात्रायाः अनन्तरं भगवान् जगन्नाथः तथा बलभद्रः गजानन-वेषे अपि विशेषरूपेण अलङ्क्रियन्ते।

इस्कॉन-प्रबन्धनस्य अनुसारम् अस्मिन् वर्षे भव्य-रथयात्रा १६ जुलैमासे २०२६ अपराह्णे ३:०० वादने गौशाला-प्राङ्गणात्, झौंसागढ़ीतः प्रारभ्य भविष्यति। रथयात्रा मन्दिर-मोडः, पानी-टङ्की, फव्वारा-चतुष्पथः, बजरङ्गी-चतुष्पथः, राय-कम्पनी-चतुष्पथः, टावर-चतुष्पथः, वी.आइ.पी.चतुष्पथः, सत्सङ्ग-चतुष्पथः, बेला-बगानः, डेरवा-नदी तथा चान्दपुरम् मार्गेण गत्वा जसीडीहस्य रोहिणी-मोडस्थितम् इस्कॉन-प्राङ्गणं प्राप्स्यति।

तत्र महाआरत्या महाप्रसाद-वितरणेन च सह रथयात्रा-महोत्सवस्य समापनं भविष्यति। इस्कॉन-देवघरेण सर्वेभ्यः श्रद्धालुभ्यः स्नानयात्रायां रथयात्रा-महोत्सवे च सहभागित्वा भगवानः जगन्नाथस्य आशीर्वादं प्राप्तुम् आह्वानं कृतम्।

Hindusthan Samachar / Divya Ranjan