नवदेहली, २८ जूनमासः (हि.स.)। प्रधानमन्त्री नरेन्द्रमोदी रविवासरे आयोजिते विशेष-समारोहे सेशेल्स-देशस्य राष्ट्रपतिना डॉ. पैट्रिक-हर्मिनी इत्यनेन प्रतिष्ठितेन ‘गार्डियन ऑफ द ब्लू होराइज़न’ इति सर्वोच्च-सम्मानेन सम्मानितः।

एतत् सम्मानं हरित-नेतृत्वस्य, विकास-शीलदेशानां हितसंवर्धनाय तस्य निरन्तर-प्रयत्नानाम्, ‘ब्लू-इकोनॉमी’, जलवायु-परिवर्तन-निवारणम्, सामुद्रिक-सम्पदां धारणीय-प्रबन्धनम् तथा लघु-द्वीपीय-विकासशील-राष्ट्राणां विकासाकाङ्क्षाणां संवर्धने दीर्घकालिक-प्रतिबद्धतायाः मान्यतार्थं प्रदत्तम्। विशेषतया एतत् सम्मानं प्रथमवारमेव प्रदत्तम्।

विदेश-मन्त्रालयस्य अनुसारं प्रधानमन्त्री एतत् सम्मानं तेषां सर्वेषां राष्ट्राणां नाम समर्पितवान् ये पर्यावरण-संरक्षणाय तथा जलवायु-परिवर्तनस्य आव्हानस्य समक्षं कर्तुं प्रतिबद्धाः सन्ति। तेन उक्तं यत् भारत-सेशेल्सयोः राजनयिक-सम्बन्धानां पञ्चाशद्वर्ष-पूर्त्याः अवसरे प्राप्तम् एतत् सम्मानम् उभयदेशयोः विशेष-मैत्रीं अधिकं सुदृढां करिष्यति।

मन्त्रालयेन उक्तं यत् एतत् सम्मानं हरित-भूगोलं प्रति प्रधानमन्त्रिणः दीर्घकालिक-प्रतिबद्धतायाः मान्यता अस्ति। अस्य अन्तर्गतं अन्ताराष्ट्रिय-सौर-सन्धिः, मिशन-लाइफ, ‘एकः पादपः मातुः नाम्ना’ अभियानम् तथा अन्ताराष्ट्रिय-बिग-कैट-सन्धिः इत्यादय: उपक्रमा: समाविष्टा:। एतत् सम्मानं धारणीय-विकासस्य प्रोत्साहनार्थं प्रधानमन्त्रिणः प्राप्तेषु अन्ताराष्ट्रिय-सम्मानेषु नवीनतमः अस्ति। अस्मात् पूर्वं तेन एफ.ए.ओ.-संस्थायाः एग्रीकोला-पदकम्, सियोल-शान्ति-पुरस्कारः तथा संयुक्त-राष्ट्र-सङ्घस्य ‘चैम्पियन् ऑफ द अर्थ’ पुरस्कारः अपि प्राप्तः।

विदेश-मन्त्रालयस्य मते एतत् सम्मानम् अस्य तथ्यस्य द्योतकम् अस्ति यत् सेशेल्स-देशः क्षमता-निर्माणे, पर्यावरण-संरक्षणे, धारणीय-विकास-प्रयत्नेषु तथा हिन्द-महासागर-प्रदेशस्य साझा-प्राथमिकतासु भारतस्य वर्धमानां भूमिकां विश्वसनीय-सहभागिरूपेण महत्त्वं ददाति।

उल्लेखनीयं यत् प्रधानमन्त्री नरेन्द्रमोदी अद्यावधि विश्वस्य ३४ देशैः तेषां सर्वोच्च-नागरिक-सम्मानेन सम्मानितः अस्ति।

Hindusthan Samachar / Divya Ranjan