जयपुरम्, 29 जूनमासः (हि.स.)।शिक्षाक्षेत्रे जनसहभागितायाः सामाजिकयोगदानस्य च सम्मानपरम्परां प्रवर्धयन्ती ३०तमः राज्यस्तरीयः भामाशाहसम्मानसमारोहः २०२६ सोमवासरे जयपुरनगरे स्थिते बिडला सभागारे आयोजितः। अस्मिन् कार्यक्रमे २७६ अधिकाः भामाशाहाः प्रेरकाः अनिवासीभारतीयदानदातारः च शिक्षा विभूषण शिक्षा भूषण प्रेरकसम्मानैः सम्मानिताः। एतेषां भामाशाहानां वित्तवर्षे २०२५ २६ मध्ये ३१८ कोटिरूप्यकाणां सहयोगः प्रदत्तः। अस्मिन् अवसरे भामाशाह प्रशस्ति नाम पुस्तिकायाः विमोचनमपि कृतम्।

समारोहे उपमुख्यमन्त्री डा प्रेमचन्द बैरवा अवदत् यत् भामाशाहसम्मानसमारोहस्य अयं दिवसः केवलं सम्मानस्य दिवसः नास्ति अपितु आत्मनः उत्सवः संस्कृतेः उत्सवश्च अस्ति। तेन उक्तं यत् सम्पत्तेः परमं सौन्दर्यं समाजहिताय तस्याः समर्पणम् अस्ति। राजस्थानप्रदेशः केवलं वीराणां भूमिः नास्ति अपितु दानवीराणामपि भूमिः अस्ति। अत्र खड्गस्य सह त्यागस्य अपि दर्शनं भवति। मञ्चस्य पुरतः उपविष्टाः सर्वे जनाः भामाशाहपरम्परायाः प्रतिनिधयः सन्ति। धनार्जनं योग्यता भवितुमर्हति किन्तु तस्य समाजहिताय उपयोगः महानतायाः प्रतीकः अस्ति। अधुना राजस्थानस्य परिचयः केवलं दुर्गैः न भविष्यति अपितु विद्यालयैः बालिकानां प्रगत्या च भविष्यति।

शिक्षामन्त्री मदन दिलावर अवदत् यत् मेवाडप्रदेशस्य शौर्यगाथा महाराणा प्रतापस्य भामाशाहस्य च विना अपूर्णा अस्ति। तेन भामाशाह पूनमचन्द राठी इत्यस्य आभारः व्यक्तः यस्य साहाय्येन बीकानेरस्य जयमलसरग्रामे राजकीयबालिकासैन्यविद्यालयस्य निर्माणं भवति। तेन उक्तं यत् विद्यालयाः अधुना अधिकसुरक्षिताः तकनीकीदृष्ट्या च सुसम्पन्नाः भवन्ति। अधुना श्यामपट्टस्य स्थाने स्मार्टबोर्डाः स्थापिताः सन्ति। भामाशाहानां काचिदपि असुविधा मा भवेत् इति हेतोः विशेषप्रकोष्ठस्य गठनं क्रियमाणम् अस्ति यः पारदर्शिरूपेण कार्यं करिष्यति। विद्यालयस्य प्रबन्धनसमितौ भामाशाहानां द्वौ प्रतिनिधी अपि भविष्यतः। विभागेन एतेषां प्रकाराणां बहवः प्रयत्नाः क्रियन्ते। तेन भामाशाहेभ्यः आश्वासनं दत्तं यत् तैः प्रदत्तं धनं सम्पूर्णतया शिक्षाविकासाय एव सदुपयुज्यते।

शिक्षाविभागस्य अतिरिक्तमुख्यसचिवः राजेश यादव महाराणा प्रतापस्य भामाशाहस्य च त्यागस्य स्मरणं कृत्वा प्रदेशे शिक्षोन्नत्यर्थम् अग्रे आगच्छद्भ्यः भामाशाहेभ्यः धन्यवादं ज्ञापितवान्। तेन विभागस्य प्रयत्नानां विषये अपि सूचना प्रदत्ता। तेन मुख्यमन्त्री विद्यादानकोषस्य ज्ञानसंकल्पपोर्टलस्य च उल्लेखं कृत्वा उक्तं यत् विभागेन भामाशाहानां कृते सम्पूर्णा प्रक्रिया सरला पारदर्शिनी च कृता अस्ति।

समारोहे मध्याह्नभोजनायुक्तः विश्वमोहन शर्मा राज्यपरियोजनानिदेशिका समग्रशिक्षाराजस्थानायुक्ता डा रश्मि शर्मा माध्यमिकशिक्षानिदेशकः सीताराम जाट राजस्थान राज्यमुक्तविद्यालयस्य निदेशकः महेन्द्र खींची सम्मानिताः भामाशाहाः विशिष्टभामाशाहाः प्रेरकाः विभागस्य समस्ताः उपायुक्ताः विद्यालयशिक्षाविभागस्य अन्ये अधिकारिणः कर्मचारीणश्च उपस्थिताः आसन्। समारोहे राजकीयविद्यालयानां नवनिर्माणे अतिरिक्तनिर्माणकार्येषु निर्मितभवनानां विकासे भूमिदाने तथा अन्यैः भौतिकसंसाधनैः शिक्षाव्यवस्थां सुदृढां कर्तुं महत्त्वपूर्णं योगदानं दत्तवन्तः २७६ अधिकाः भामाशाहाः प्रेरकाः अनिवासीभारतीयदानदातारश्च सम्मानिताः।

४९ भामाशाहाः शिक्षा विभूषणसम्मानेन तथा १०५ भामाशाहाः शिक्षा भूषणसम्मानेन सम्मानिताः। ९९ प्रेरकाः अपि सम्मानिताः। सम्मानितेषु २३ अनिवासीभारतीयदानदातारः अपि समाविष्टाः आसन्।

---------------

Hindusthan Samachar / Dheeraj Maithani