उदयपुरम्, 29 जूनमासः (हि.स.)। भारतीय साम्यवादी पक्षस्य मार्क्सवादी शाखायाः पूर्वपोलितब्यूरोसदस्या पूर्वसांसदा च Brinda Karat राममन्दिरन्यासस्य विघटनस्य तथा कथितवित्तीयानियमितीनां कृते उत्तरदायिनां पदाधिकरिणां विरुद्धं कार्यवाहीं कर्तुं प्रार्थितवती।

उदयपुरस्य माछलामग्रास्थिते पक्षकार्यालये माध्यमप्रतिनिधिभिः सह संवादं कुर्वन्ती सा आरोपितवती यत् राममन्दिरसम्बद्धेषु कथितद्विशतकोटिरूप्यकधनस्य सुवर्णरजतादिसम्पदां च विषये केवलं अधःस्तरीयकर्मचारिणां विरुद्धं प्राथमिकी अभिलेखिता अस्ति तथा तेनैव विषयस्य प्रच्छादनप्रयत्नः क्रियते। न्यासस्य अध्यक्षस्य सचिवस्य अन्येषां च पदाधिकरिणां उत्तरदायित्वं न निर्धार्यते।

उदयपुरप्रवासे आगता करात राजस्थाने वनाधिकारविधेः प्रभाविकार्यान्वयनस्य विषयमपि उत्थापितवती। तया उक्तं यत् आदिवासिनां भूम्यधिकाराः उपेक्ष्यन्ते। तया दावितं यत् उदयपुरजिले द्वाविंशतिसहस्राधिकेषु दावेषु केवलं त्रिचत्वारिंशत्प्रतिशतमात्रस्य निस्तारणं जातम्। अस्मिन् विषये शीघ्रमेव महान् आन्दोलनः प्रवर्तिष्यते इति अपि सा अवदत्।

तया मनरेगायोजनायाः प्रभाविकार्यान्वयनस्य ग्रामीणपरिवारेभ्यः पञ्चविंशत्यधिकशतदिनानि रोजगारप्रदानस्य तथा सम्पूर्णव्ययस्य केन्द्रसर्वकारेण वहनस्य च मागणी कृता। ग्रामक्षेत्रभ्रमणस्य उल्लेखं कुर्वन्ती सा अवदत् यत् अन्तर्जालव्यवस्था बाधिता आसीत्। तेन श्रमिकाणां उपस्थितिः न अभिलेखिता अभवत् तथा ते वेतनं विना प्रत्यागन्तुं विवशाः अभवन्।

पत्रकारसम्मेलने तया केन्द्रसर्वकारस्य विदेशनीतेः ग्रेट निकोबार परियोजनायाः भ्रष्टाचारस्य जनप्रतिनिधीनां क्रयविक्रयस्य नीट परीक्षासम्बद्धविषयाणां च विषये स्वपक्षस्य मतं प्रस्तुतम्। प्रारम्भे माकपाजिलासचिवः अधिवक्ता राजेशसिंहः अतिथीनां स्वागतं कृतवान्। कार्यक्रमे शमशेरखानः श्रवणः प्रो हेमेन्द्रचण्डालिया अन्ये च उपस्थिताः आसन्।

Hindusthan Samachar / Dheeraj Maithani