जम्मूनगरम्, ०३ जूनमासः (हि.स.)। मुख्यसचिवः अटल-दुल्लू-महाभागः अद्य उच्चस्तरीय-समीक्षा-सभायाः अध्यक्षतां कृतवान्, यथा जम्मू-कश्मीर-केन्द्रशासित-प्रदेशे विकसित-भारत-ग्रामीण-रोजगार-अभियानस्य (वीबी-जी-राम-जी) सुचारु-कार्यान्वयनं सुनिश्चितं भवेत्।

मुख्यसचिवः महात्मा-गान्धी-राष्ट्रीय-ग्रामीण-रोजगार-गारण्टी-अधिनियमस्य (एमजीएनआरईजीए) संरचनातः नवगठितस्य वीबी-जी-राम-जी-कार्यक्रमस्य दिशि विभागेन प्राप्तस्य प्रगतेः समीक्षां कृतवान्। एषा योजना भारत-सर्वकारेण ११ मे २०२६ दिनाङ्के अधिसूचिता आसीत्।

सः सावधानतापूर्वक-योजनायाः समन्वित-कार्यान्वयनस्य च महत्त्वम् अधोरेखितवान्। तेन अधिकारिणः निर्देशिताः यत् योजनायाः सञ्चालनार्थं निर्धारित-समयसीमायाः कठोरतया पालनं क्रियताम् तथा १ जुलै २०२६ दिनाङ्के योजनायाः प्रारम्भात् पूर्वम् सर्वाः प्रारम्भिक-प्रस्तुतयः सम्पन्नाः स्युः। तेन अधिसूचनासहितानां सर्वेषाम् आवश्यक-औपचारिकतानां शीघ्र-सम्पादनम् आहूतम्। एतेषु विधि-विभागस्य परामर्शेन योजनायाः कार्यान्वयनम्, सर्वेषां पात्र-श्रमिकाणाम् ई-केवाईसी-प्रक्रियायाः सम्पादनम्, नवीन-संरचनायां निर्बाध-सङ्क्रमणाय कार्याणां पूर्व-योजना तथा अनुमोदनं च अन्तर्भवति।

मुख्यसचिवेन जम्मू-कश्मीरस्य ग्रामीण-विकास-निदेशकौ अपि निर्देशितौ यत् योजनायाः कार्यान्वयनसम्बद्धानां सर्वेषां पदाधिकारिणां क्षमता-विकासस्य प्रशिक्षणस्य च व्यक्तिगत-दायित्वं स्वीक्रियताम्। तेन बलं दत्तं यत् योजनायाः कार्यान्वयनात् पूर्वं जनपद-खण्ड-ग्राम-पञ्चायत-स्तरे प्रत्येकं कर्मचारी सम्यक् प्रशिक्षितः भवेत् तथा वीबी-जी-राम-जी-योजनायाः प्रावधानानां, प्रक्रियाणां, तकनीकी-मञ्चानां च पूर्णज्ञानं धारयेत्।

सभायां ग्रामीण-विकास-सचिवः एजाज-असदः अवदत् यत् विशेष-ग्रामसभाभिः, सामुदायिक-सहभागिता-कार्यक्रमैः, सामाजिक-माध्यम-अभियानैः तथा समाचारपत्र-प्रचार-कार्यक्रमैः सर्वेषु जनपदेषु व्यापक-जागरूकता-अभियानं सञ्चालितम्, यस्मिन् सर्वे ४,२९१ ग्राम-पञ्चायता: समाविष्टाः।

युक्तधारा-मञ्चस्य अन्तर्गतं योजना-प्रक्रियायाः समीक्षायां मुख्यसचिवः सूचितः यत् सर्वे २० जनपदाः, २८५ खण्डाः तथा ४,२९१ ग्राम-पञ्चायतः अस्मिन् मञ्चे संयोजिताः सन्ति तथा १०० प्रतिशतं लॉगिन-प्रक्रिया सम्पन्ना अस्ति। ९४ प्रतिशताधिकासु ग्राम-पञ्चायतेषु योजना-गतिविधयः प्रारब्धाः सन्ति, यदा च ९२ प्रतिशताधिकाभिः ग्राम-पञ्चायतै: स्वयोजनाः प्रस्तुताः सन्ति। प्रायः ३,८४९ ग्रामसभाभिः विकास-योजनाः अनुमोदिताः, ६३,००० अधिकानि कार्याणि च चिह्नितानि सन्ति, येन नूतन-कार्यक्रमस्य श्रम-माङ्गल्याः पूर्त्यर्थं सुदृढः परियोजना-भण्डारः उपलब्धः भविष्यति।

सभायां एतदपि निवेदितं यत् जम्मू-कश्मीरः एमजीएनआरईजीए-श्रमिकाणाम् ई-केवाईसी-आवरणे मुख-प्रमाणीकरण-अनुपालने च श्रेष्ठ-प्रदर्शनकर्तृषु राज्येषु केन्द्रशासित-प्रदेशेषु च गणितः जातः अस्ति। सर्वाभिः ग्राम-पञ्चायताभिः पूर्ण-आवरणं प्राप्तम्।

मुख्यसचिवः अवदत् यत् वीबी-जी-राम-जी-योजनायाः अन्तर्गतं मुख-प्रमाणीकरणम्, भू-परिसीमनम् (जियोफेन्सिङ्ग्), कृत्रिम-बुद्धिमत्ता-आधारित-विश्लेषणम् तथा वास्तविक-समय-निरीक्षण-पट्टिकाः इत्यादीनि प्रौद्योगिकी-आधारित-शासन-तन्त्राणि स्वीकृत्य पारदर्शिता, उत्तरदायित्वं तथा सेवा-प्रदायनं अधिकं सुदृढं भविष्यति।

नूतन-योजनायाः परिचालन-प्रस्तुतिविषये सभायै सूचितं यत् ग्राम-पञ्चायत-प्रशासनस्य (वीबी-जी-राम-जी) कार्यान्वयनार्थम् अधिसूचनायाः प्रारूपं सज्जीकृत्य अनुमोदनार्थं प्रेषितम् अस्ति। नियमाः, समर्पित-लेखाः, बजटीय-प्रावधानानि तथा वित्तीय-प्रबन्धन-प्रणालीनां एकीकरणं च ग्रामीण-विकास-मन्त्रालयेन निर्धारित-समयसीमायाः अनुसारं क्रियमाणम् अस्ति। ग्राम-पञ्चायतानां वर्गीकरणं तथा अन्याः प्रस्तुति-सम्बद्ध-गतिविधयः अपि समयानुसारं प्रचलन्ति।

अन्ते मुख्यसचिवः सर्वेषु स्तरेषु निरन्तर-जनसम्पर्कस्य कठोर-निरीक्षणस्य च आवश्यकतां प्रतिपादितवान्, यथा ग्रामीण-रोजगार-विकासयोः अस्याः प्रमुख-योजनायाः उद्देश्यानि जम्मू-कश्मीर-प्रदेशे कार्यान्वयनस्य प्रथम-दिनात् एव प्रभावी-रीत्या साधितुं शक्येरन्।

Hindusthan Samachar / Divya Ranjan