Enter your Email Address to subscribe to our newsletters
गुवाहाटीनगरम्, ३० जूनमासः (हि.स.)। असमस्य मुख्यमन्त्री डॉ.हिमन्तबिस्वसरमा बलिदान-दिवसस्य अवसरे मातृभूमेः कृते सर्वोच्चं बलिदानं कृतवन्तं वीरसैनिकं कैप्टन-जिंटू-गोगोय-महोदयं भावपूर्णां श्रद्धाञ्जलिम् अर्पितवान्।
मुख्यमन्त्री सामाजिक-माध्यमे प्रकाशिते स्वसन्देशे अवदत् यत् राष्ट्रस्य सुरक्षायै मातृभूमेः गौरवरक्षणाय च कैप्टन-जिंटू-गोगोय-महोदयस्य सर्वोच्चं बलिदानम् अदम्य-साहसस्य, कर्तव्यनिष्ठायाः, देशभक्तेश्च अनुपमम् उदाहरणम् अस्ति।
सः अवदत् यत् असमस्य भारतमातुः च अस्य पराक्रमिणः वीरसुतस्य त्यागः सदैव असमवासिनां समग्रदेशवासिनां च प्रेरणास्रोतः भविष्यति। मुख्यमन्त्री शहीद-दिवसस्य अवसरे कैप्टन-जिंटू-गोगोय-महोदयाय विनम्रां श्रद्धाञ्जलिम् अर्पितवान्।
उल्लेखनीयम् अस्ति यत् जिंटू-गोगोयः (२१ नवम्बर् १९७०—३० जून १९९९) भारतीय-सेनायाः १७-तम-गढ़वाल-राइफल्स-दलस्य अधिकारी आसीत्। सः १९९९ तमे वर्षे कार्गिल-युद्धकाले सञ्चालिते अभियाने प्रदर्शितस्य असाधारण-साहसस्य शौर्यस्य च कृते मरणोत्तररूपेण 'वीरचक्र'-सम्मानेन विभूषितः अभवत्। एतत् युद्धकाले प्रदीयमानं भारतस्य तृतीयं सर्वोच्चं सैन्यसम्मानम् अस्ति।
Hindusthan Samachar / Divya Ranjan