बलियानगरम्, ३० जूनमासः (हि.स.)। उत्तरप्रदेशस्य बलिया-जनपदे विद्यालयीय-वाहनानां सुरक्षामानदण्डानां विषये एआरटीओ अरुणकुमाररायः कठोरं दृष्टिकोणम् स्वीकृतवान्। तेन निर्देशाः प्रदत्ताः यत् प्रत्येकस्मिन् वाहने सीसीटीवी-कैमरा, जीपीएस-अनुसरण-प्रणाली, पैनिक-बटन, वेग-नियन्त्रकः, प्राथमिक-चिकित्सा-पेटिका तथा अग्निशमन-यन्त्रम् सम्यक् कार्यरतं भवेत्।

ग्रीष्मावकाशस्य समाप्तेः अनन्तरं छात्राः पुनः विद्यालयान् गमिष्यन्ति। अग्रिम-शैक्षणिक-सत्रं छात्र-छात्राणां सुरक्षां च दृष्ट्वा एआरटीओ अरुणकुमाररायः जनपदस्य सर्वेषां विद्यालय-सञ्चालकेभ्यः आवश्यकनिर्देशान् प्रदत्तवान्। तेन उक्तं यत् विद्यालयेषु सञ्चालितानां सर्वेषां वाहनानां परमिट्, फिटनेस, बीमा इत्यादयः आवश्यक-अभिलेखाः वैधानिकाः भवेयुः। तथा च सर्वेषां वाहनानां विवरणं यूपी-आईएसवीएनपी-पटले अद्यतनं स्थापनीयम्।

एआरटीओ अवदत् यत् विद्यालयीय-वाहनानां कृते निर्धारितानां सर्वेषां सुरक्षामानदण्डानां पालनम् अनिवार्यम् अस्ति। तेन निर्देशितं यत् सर्वेषां वाहनचालकानां परिचालकानां च चालक-अनुज्ञापत्राणां चरित्रस्य च सत्यापनं क्रियताम्। येषां विद्यालयीय-वाहनानां अभिलेखाः अपूर्णाः सन्ति अथवा ये निर्धारित-सुरक्षामानदण्डान् न पूरयन्ति, तेषां सञ्चालनं कस्यामपि परिस्थितौ न क्रियताम्। सर्वेषां वाहनानां भौतिकस्थितेः परीक्षणं कृत्वा आवश्यक-पुनर्निर्माण-कार्याणि अपि क्रियन्ताम्। यानि वाहनानि सञ्चालनयोग्यानि न सन्ति अथवा पञ्चदशवर्षीयम् आयुः पूर्णवन्तः सन्ति, तेषां नियमानुसारं पञ्जीकरणं निरस्तं क्रियताम्।

तेन विद्यालय-प्रबन्धनाय अपि कठोरनिर्देशाः प्रदत्ताः यत् कस्मिन्नपि वाहने निर्धारित-क्षमतायाः अपेक्षया अधिकाः छात्राः न उपवेशनीयाः। यदि यातायात-नियमानां सुरक्षामानदण्डानां वा उल्लङ्घनं दृश्यते, तर्हि सम्बन्धित-विद्यालयस्य वाहन-सञ्चालकानां च विरुद्धं नियमानुसारं कार्यवाही करिष्यते।

Hindusthan Samachar / Divya Ranjan