Enter your Email Address to subscribe to our newsletters
रायपुरनगरम्, जूनमासस्य ३० दिनाङ्कः (हि.स.)। रथयात्रायाः अवसरे पुरीं प्रति गच्छतां श्रद्धालूनां वर्धमानं सम्मर्दं दृष्ट्वा दक्षिण-पूर्व-मध्य-रेलवेमण्डलेन गोंदिया–पुरी–गोंदिया-मध्ये विशेष-रेलयानस्य सञ्चालनस्य निर्णयः कृतः। ०८८०१/०८८०२ सङ्ख्याकं रथयात्रा-विशेष-रेलयानम् उभयदिशि चतुर्भिः-चतुर्भिः आवृत्तिभिः सञ्चालितं भविष्यति। अनेन छत्तीसगढप्रदेशस्य मध्यभारतस्य च यात्रिणां महती सुविधा भविष्यति।
दक्षिण-पूर्व-मध्य-रेलमण्डलस्य सूचनानुसारं ०८८०१ सङ्ख्याकं गोंदिया–पुरी-रथयात्रा-विशेष-रेलयानम् २०२६ तमवर्षस्य जुलाई-मासस्य २, ९, १६ तथा २९ दिनाङ्केषु सञ्चालितं भविष्यति। एतत् रेलयानं गोंदियानगरात् मध्याह्ने १:३० वादने प्रस्थाय दुर्गस्थानकं ३:५८ वादने, रायपुरस्थानकं च सायं ५:१० वादने प्राप्स्यति। अनन्तरदिने प्रातः १०:०० वादने पुरीं प्राप्स्यति।
तथैव ०८८०२ सङ्ख्याकं पुरी–गोंदिया-रथयात्रा-विशेष-रेलयानम् २०२६ तमवर्षस्य जुलाई-मासस्य ३, १०, १७ तथा ३० दिनाङ्केषु पुरीतः मध्याह्ने १:०० वादने प्रस्थास्यति। एतत् रेलयानम् अनन्तरदिने प्रातः ३:१० वादने रायपुरं, ४:२८ वादने दुर्गस्थानकं प्राप्य प्रातः ७:०० वादने गोंदियां प्राप्स्यति।
एतत् विशेष-रेलयानम् उभयदिशि डोंगरगढ-राजनांदगांव-दुर्ग-रायपुर-महासमुन्द-खरियार-रोड-कांटाबांजी-टिटलागढ-बलांगीर-बरगढ़-रोड-सम्बलपुर-अङ्गुल-तालचेर-रोड-ढेंकानाल-कटक-भुवनेश्वर-खुर्दा-रोड-इत्यादिषु प्रमुख-रेलस्थानकेषु निर्धारित-समयानुसारं स्थास्यति।
रेलवे-मण्डलेन उक्तं यत् यात्रिकाणां सुविधार्थम् अस्मिन् विशेष-रेलयाने विंशतिः (२०) आईसीएफ-यानकोष्ठाः योजिताः भविष्यन्ति। तेषु दश शयनयान-कोष्ठाः, त्रयः तृतीय-श्रेणी-वातानुकूलित-कोष्ठाः, द्वौ द्वितीय-श्रेणी-वातानुकूलित-कोष्ठौ, तथा द्वौ दिव्याङ्गानुकूलौ रक्षक-कोष्ठ-सहितौ यानकोष्ठौ भविष्यतः।
दक्षिण-पूर्व-मध्य-रेलवेमण्डलेन यात्रिकेभ्यः आह्वानं कृतम् यत् रथयात्रायाः अवसरे सम्भाव्यमानम् अतिरिक्त-सम्मर्दं दृष्ट्वा ते समयपूर्वमेव अधिकृतमाध्यमैः आरक्षणं कृत्वैव यात्रां कुर्वन्तु।
Hindusthan Samachar / Divya Ranjan