रायपुरनगरम्, ०४ जूनमासः (हि.स.)। छत्तीसगढ़-राज्यस्य मुख्यमन्त्री विष्णुदेव-साय-महाभागः अद्य गुरुवासरे सुशासन-तिहारस्य अन्तर्गतं बिलासपुर-जनपदस्य प्रवासे भविष्यति। मुख्यमन्त्री जनैः सह प्रत्यक्ष-संवादं करिष्यति, तेषां समस्याः श्रोष्यति, विकास-परियोजनानाम् उपहारं प्रदास्यति तथा प्रशासनिक-व्यवस्थानां समीक्षामपि करिष्यति।

निर्धारित-कार्यक्रमानुसारं मुख्यमन्त्री सायंकाले प्रायः चतुर्वादने हेलिकॉप्टरयानद्वारा बिलासपुरं प्राप्स्यति। सः हेमूनगर-स्थितस्य बन्धवा-तडागस्य समीपे ईशिका-उद्याने आयोजिते सुशासन-शिविरे सहभागं करिष्यति तथा सामान्य-नागरिकैः सह प्रत्यक्षं संवादं करिष्यति। अस्मिन् अवसरे सः जनसमस्याः तथा विचारान् श्रोष्यति, विविध-विकास-निर्माण-परियोजनानां लोकार्पणं भूमिपूजनं च करिष्यति।

तदनन्तरं मुख्यमन्त्री दयालबन्द-मधुबनं गत्वा प्रस्तावितस्य शिक्षा-केन्द्रस्य (एजुकेशन-हब्) निर्माणकार्यस्य निरीक्षणं करिष्यति। प्रवासस्य समये सः समाहर्तृ-कार्यालयस्य मन्थन-सभाकक्षे प्रशासनिक-अधिकारिणां समीक्षा-सभामपि आयोजयिष्यति।

अस्यां सभायां बिलासपुर-सहित-पञ्च-जनपदानाम् अधिकारिभिः सह सुशासन-तिहारस्य अन्तर्गतं सञ्चालितानां योजनानां प्रगतिः, कार्यान्वयनम् तथा स्थलीय-प्रभावः इत्यादीनां विस्तृता समीक्षा करिष्यते। मुख्यमन्त्री जनहितकारी-योजनानां वास्तविक-स्थितेः प्रतिपुष्टिं ग्रहीष्यति तथा अधिकारिभ्यः आवश्यकान् निर्देशान् दास्यति।

मुख्यमन्त्रिणः अयं प्रवासः सुशासनस्य, उत्तरदायित्वस्य तथा विकास-कार्याणां गतिसमीक्षायाः दृष्ट्या महत्त्वपूर्णः मन्यते। एतेन सामान्यजनानां शासनस्य च मध्ये संवादः अधिकं सुदृढः भविष्यतीति अपेक्षा वर्तते।

Hindusthan Samachar / Divya Ranjan