Enter your Email Address to subscribe to our newsletters
वाशिंगटनम्, 04 जूनमासः (हि.स.)।अमेरिकादेशस्य काङ्ग्रेसस्य अधःसदनम् प्रतिनिधिसभा बुधवासरे २१५ २०८ मतैः समवर्तीप्रस्तावं पारितवती येन राष्ट्रपतिः डोनाल्ड ट्रम्पस्य ईरानदेशेन सह युद्धं कर्तुं अधिकारेषु प्रतिबन्धः स्थापितः।
महत्त्वपूर्णं यत् डेमोक्रेटपक्षस्य अस्य प्रस्तावस्य समर्थनं चत्वारः रिपब्लिकनपक्षीयाः सदस्याः अपि अकुर्वन्। ओहायोप्रदेशस्य प्रतिनिधिः वारेन डेविडसन पेन्सिल्वेनियाप्रदेशस्य ब्रायन फिट्जपैट्रिक मिशिगनप्रदेशस्य टॉम बैरेट तथा केन्टकीप्रदेशस्य थॉमस मैसी इत्येते अस्य प्रस्तावस्य समर्थनं कृतवन्तः।
एबीसी न्यूज इत्यस्य प्रतिवेदनानुसारम् अस्मिन् प्रस्तावे उक्तं यत् राष्ट्रपतिः ट्रम्पः ईरानदेशस्य अथवा तस्य सैन्यस्य अथवा शासनस्य कस्यापि भागस्य विरुद्धं शत्रुतापूर्णक्रियासु अमेरिकीयसशस्त्रबलानाम् उपयोगं तावत् स्थगयेत् यावत् युद्धघोषणां बलप्रयोगस्य अधिकारं वा प्रददाति कश्चित् विधेयकः पारितो न भवति। प्रतिनिधिसभया पारितः अयं प्रस्तावः अधुना सीनेटसदनं गमिष्यति। सीनेटसदनं यदि अस्य समर्थनं कुर्यात् अपि तथापि समवर्तीप्रस्तावस्य विधेयकवत् प्रभावः न भवति तथा च एषः राष्ट्रपतेः समीपं प्रस्तूयते न वा राष्ट्रपतेः वीटो अधिकारः अस्मिन् प्रवर्तते।
मतदानानन्तरं प्रतिनिधिसभायाः विदेशविषयकसमितेः वरिष्ठः डेमोक्रेटपक्षीयः ग्रेगरी मीक्स पत्रकारान् उक्तवान् यत् काङ्ग्रेसेन अद्य संविधानस्य पालनं कृतम्। डेमोक्रेटपक्षीयाः रिपब्लिकनपक्षीयाश्च उभयपक्षीयाः उक्तवन्तः यत् अधुना पर्याप्तम् अभवत्। अधुना अस्य युद्धस्य समाप्तेः समयः आगतः। अधुना राष्ट्रपतिः अमेरिकीयजनतायै वक्तुम् अर्हति यत् वयं कस्मात् अस्मिन् युद्धे सम्मिलिताः अभवाम।
युद्धारम्भात् परम् एषा चतुर्थवारम् अस्ति यदा प्रतिनिधिसभायां डेमोक्रेटनेतृत्वयुक्तस्य ईरानयुद्धाधिकारप्रस्तावस्य विषये मतदानं जातम्। मतदानात् पूर्वं सभाध्यक्षः माइक जॉनसन उक्तवान् यत् मम मते अस्मिन् समये प्रशासनात् तथा सर्वोच्चसैन्यनायकात् वार्तालापाधिकारस्य अपहरणं अत्यन्तं संकटपूर्णं पदम् भविष्यति।
श्वेतभवनस्य एकेन अधिकारिणा उक्तं यत् षण्णां रिपब्लिकनसदस्यानाम् अनुपस्थितेः कारणात् अयं प्रस्तावः पारितः अभवत्।
तेन अधिकारिणा उक्तं यत् राष्ट्रपतिः ट्रम्पः सर्वोच्चसैन्यनायकत्वेन स्वसंवैधानिकाधिकारानाम् उपयोगं कृत्वा अस्माकं राष्ट्रियसुरक्षायाः रक्षणं निरन्तरं करिष्यति तथा च काङ्ग्रेसस्य प्रति पूर्णपारदर्शिताम् अपि धारयिष्यति।
---------------
Hindusthan Samachar / Dheeraj Maithani