नवदिल्ली, 04 जूनमासः (हि.स.)।

वेनेजुएलादेशस्य कार्यवाहकराष्ट्रपतिः डेल्सीरोड्रिग्ज इत्यस्याः भारतयात्रायाः समये उभयदेशाभ्यां ऊर्जाक्षेत्रे दीर्घकालिकसहभागितायाः सुदृढीकरणाय विशेषः बलः दत्तः। प्रधानमन्त्रिणः नरेन्द्रमोदिनः वेनेजुएलादेशस्य प्रतिनिधिमण्डलेन सह सम्पन्नायां वार्तायाम् उभयदेशौ खननक्षेत्रे सम्भाव्यसहयोगस्य तथा संसाधनमूल्याङ्कनस्य विषये अपि चर्चां कृतवन्तौ।

विदेशमन्त्रालयस्य सचिवः पूर्वविभागीयः रुद्रेन्द्रटण्डनः गुरुवासरे पत्रकारसम्मेलने अवदत् यत् वेनेजुएलादेशः विश्वस्य सर्वाधिकतैलभण्डारयुक्तेषु देशेषु अन्यतमः अस्ति, यदा भारतम् अतिवेगेन वर्धमाना अर्थव्यवस्था सन् तैलस्य महदुपभोक्ता अस्ति। अतः उभयदेशयोः मध्ये ऊर्जाक्षेत्रे उत्कृष्टः समन्वयः दृश्यते।

टण्डनः अवदत् यत् भारतस्य त्वरितक्रयेषु अस्मिन् मासे वेनेजुएलादेशः तृतीयः बृहत् तैलापूर्तिकर्ता रूपेण उदितः अस्ति। अस्य कारणात् प्रधानमन्त्रिणः नरेन्द्रमोदिनः तथा वेनेजुएलादेशस्य प्रतिनिधिमण्डलस्य मध्ये सम्पन्नायां वार्तायां ऊर्जासहभागिता प्रमुखविषयः आसीत्। वेनेजुएलादेशस्य ऊर्जाक्षेत्रं व्यापकपरिवर्तनस्य अवस्थां गच्छति तथा च सः भारतं आगामिवर्षेषु स्थिरमाङ्गल्ययुक्तसहभागिरूपेण पश्यति। उभयदेशयोः मध्ये ऊर्जान्वेषणोत्पादनस्तरे तथा परिष्करणवितरणस्तरे अपि सहयोगस्य पर्याप्ताः सम्भावनाः सन्ति।

विदेशमन्त्रालयस्य सचिवः अवदत् यत् वेनेजुएलादेशः केवलम् ऊर्जासंसाधनैः न समृद्धः, अपितु सुवर्णेन, हीरकैः तथा अन्यैः खनिजसम्पद्भिः अपि समृद्धः अस्ति। उभयपक्षयोः मध्ये खननक्षेत्रे सम्भाव्यसहयोगस्य तथा संसाधनमूल्याङ्कनस्य विषये अपि चर्चा अभवत्, यस्मिन् विषये अग्रिमकार्यं भविष्यति।

तेन उक्तं यत् वेनेजुएलादेशः अधुना सततार्थिकविकासस्य दिशि अग्रे गन्तुं संकेतं प्रदर्शयति। अतः ऊर्जाक्षेत्रस्य अतिरिक्तं खननम्, पशुपालनम्, परिवहनम्, कृषियन्त्रनिर्माणम्, वाहनोद्योगः तथा औषधनिर्माणक्षेत्रेषु अपि भारतीयसंस्थानां कृते व्यापकाः अवसराः विद्यमानाः सन्ति। उभयदेशाभ्यां एतेषु क्षेत्रेषु नूतनार्थिकसहयोगस्य तथा भारतीयसंस्थानां सहभागितावृद्धेः विषये विचारविमर्शः कृतः।

टण्डनस्य अनुसारं कार्यवाहकराष्ट्रपतिः रोड्रिग्ज जूनमासस्य तृतीयदिनात् भारतयात्रायाम् अस्ति। तया सह विदेशविभागस्य, सञ्चारसूचनाविभागस्य, अर्थवित्तविभागस्य, विज्ञानप्रौद्योगिकीविभागस्य तथा परिवहनविभागस्य मन्त्रिणः सहितम् एकं उच्चस्तरीयं प्रतिनिधिमण्डलम् अपि आगतम् अस्ति। तया प्रधानमन्त्रिणा मोदिना सह आधिकारिकवार्ता कृता या कार्यकारीभोजनपर्यन्तं प्रवृत्ता। अस्मात् पूर्वं विदेशमन्त्री एसजयशङ्करः तया सह मिलितवान्, यदा च पेट्रोलियममन्त्री अपि तया सह मिलिष्यति।

ब्रिक्सविषये टण्डनः अवदत् यत् वार्तायां तस्य उल्लेखः अभवत्, किन्तु मुख्यतया भारतस्य तथा प्रधानमन्त्रिणः मोदिनः ब्रिक्साध्यक्षतायाः प्रशंसा कृता। तेन उक्तं यत् उभयप्रतिनिधिमण्डलयोः मध्ये सम्पन्ना वार्ता सकारात्मकाऽभवत्, व्यवहारोपयोगिनी तथा सार्थका च आसीत्। वेनेजुएलादेशेन कठिनसमये तथा शुभसमये अपि भारतस्य समर्थनस्य प्रशंसा कृता तथा च भविष्ये भारतः तस्य प्रियसहभागिषु अन्यतमः भविष्यति इति उक्तम्।

रोड्रिग्ज बुधवासरे भारतवेनेजुएलादेशयोः सम्बन्धान् अधिकगभीरान् कर्तुं पञ्चदिवसीययात्रार्थं नूतनदिल्लीनगरम् आगता।

उल्लेखनीयम् अस्ति यत् अमेरिकादेशेन गतवर्षस्य जनवरीमासस्य चतुर्थदिने वेनेजुएलादेशस्य तत्कालीनराष्ट्रपतिः निकोलसमादुरो पदात् अपासारितः। ततः प्रभृति रोड्रिग्ज कार्यवाहकराष्ट्रपतिरूपेण कार्यं करोति। तस्याः एषा यात्रा तस्मिन् काले भवति यदा भारतम् ऊर्जासुरक्षासम्बद्धानां नूतनपरिस्थितीनां समक्षीकरणं करोति। होर्मुजजलडमरूमध्यसंकटस्य कारणात् भारतम् वैकल्पिकापूर्तिकर्तॄणाम् अन्वेषणं करोति।

------------

Hindusthan Samachar / Dheeraj Maithani