देहरादूननगरम्, ०४ जूनमासः (हि.स.)। लोकसभायां विपक्ष-नेता राहुलगांधी उक्तवान् यत् उत्तराखण्ड-राज्यस्य निर्माण-काले जनानां दृष्टिः आसीत् यत् राज्यस्य भविष्यं सुरक्षितं भविष्यति, किन्तु दुःखस्य विषयः अस्ति यत् राज्य-निर्माणानन्तरं उत्तराखण्डस्य प्राकृतिक-संसाधनानि बाह्यजनैः उपयुज्यन्ते तथा राज्य-सरकारः दिल्ली-नगरात् रिमोट-कण्ट्रोल-माध्यमेन सञ्चाल्यते।

सः गुरुवासरे अल्मोड़ा-जनसभां दूरभाष-माध्यमेन सम्बोधितवान्। तस्य कार्यक्रमः अल्मोड़ा-नगरस्य सिमकनी-स्थिते एसएसजे विश्वविद्यालय इत्यस्य क्रीडांगणे ‘परिवर्तनस्य शंखनादः’ इति कार्यक्रमान्तर्गतः आसीत्।

ऋतु-वैषम्येन पन्तनगरात् तस्य हेलिकॉप्टरविमानं न उड्डीयमानम्, तथा सः पन्तनगर-विमानपत्तनात् एव दूरभाषेण जनसभां सम्बोधितवान्। हेलिकॉप्टरविमानम् अल्मोड़ा-दिशि उड्डीयमानम् अपि पुनः प्रत्यावर्तितम् इति सूचितम्।

तस्य भाषणे सः देशस्य आर्थिक-स्थितिं, पेपर-लीक-सम्बद्धान् विषयान् च उल्लेखितवान् तथा जनान् प्रति आश्वासनं दत्तवान् यत् सः शीघ्रमेव पुनः अल्मोड़ा-नगरं गत्वा प्रत्यक्ष-जनसभां करिष्यति। तेन अल्मोड़ा-नागरिकेभ्यः अनुपस्थितेः कृते क्षमायाचना अपि कृता।

कार्यक्रमे पूर्व-मुख्यमन्त्री हरीश-रावतः, कांग्रेस-प्रभारी कुमारी-शैलजा, पूर्व-मन्त्री प्रीतम-सिंहः, विधायकाः मनोज-तिवारी, मदन-बिष्टः, सुमित-हृदयेशः, भुवन-कापड़ी, राजकुमार-ठकरालः, हेमेश-खर्कवालः, आदेश-चौहानः इत्यादयः नेतारः सम्बोधितवन्तः।

Hindusthan Samachar / Divya Ranjan