Enter your Email Address to subscribe to our newsletters
लखनऊ, 05 जूनमासः (हि.स.)।जनभवने लखनऊनगरे स्थिते गान्धीसभागारे उत्तरप्रदेशसंगीतनाटकअकादम्या लखनऊद्वारा आयोजिते अकादमीसम्मानसमारोहे २०२६ इत्यस्मिन् शुक्रवासरे प्रदेशस्य उपमुख्यमन्त्री ब्रजेशपाठकः वर्षेषु २०२१, २०२२, २०२३ तथा २०२४ कृते चयनितान् एकपञ्चाशत् विशिष्टकलाकारान् संगीतनृत्यनाटकलोककलाक्षेत्रेषु तेषां उल्लेखनीययोगदानस्य कृते अकादमीसम्मानेन सम्मानितवान्।
समारोहे प्रदेशस्य समृद्धानां सांस्कृतिकपरम्पराणां लोककलानां भारतीयकलात्मकमूल्यानां च संरक्षणसंवर्धनयोः कलाकाराणाम् अमूल्ययोगदानं विशेषरूपेण रेखाङ्कितम्।
अस्मिन् अवसरे प्रदेशस्य उपमुख्यमन्त्री ब्रजेशपाठकः राज्यपालस्य सन्देशं उपस्थितजनानां समक्षं पठित्वा श्रावितवान्। राज्यपालः स्वसन्देशे सर्वान् सम्मानितकलाकारान् हार्दिकाभिः शुभकामनाभिः अभिनन्द्य तेषां उज्ज्वलस्य सृजनशीलस्य सफलस्य च भविष्यस्य कामनाम् अकरोत्। सः अवदत् यत् सम्मानितकलाकाराणां प्रयत्नैः अस्माकं सांस्कृतिकविरासत् न केवलं संरक्षिता अस्ति, अपितु कालेन सह अधिका सशक्ता समृद्धा च अभवत्।
राज्यपालः स्वसन्देशे उक्तवान् यत् कला अतीतस्य धरोहररूपा भवति, भविष्यात् प्रेरणास्रोतश्च अस्ति। कला सा सुरभिः अस्ति या कालस्य सीमाः उल्लङ्घ्य युगानुयुगं स्वसुगन्धं प्रसारयति। लोकगायने स्वराः सरस्वत्याः आवाहनं कुर्वन्ति, वादने तु लयतालौ जीवनस्य गतिम् अभिव्यञ्जयतः। रङ्गमञ्चे कलाकाराः जीवनस्य यथार्थं साकारयन्ति, नाट्यलेखनं च समाजस्य संवेदनाभ्यः शब्दरूपं ददाति। अभिनयः साहित्यं च उभयमपि समाजाय दिशां प्रददाति। एतासु सर्वासु विधासु विशिष्टयोगदानं ददतः कलाकाराः अस्माकं सांस्कृतिकविरासतायाः वास्तविकसंरक्षकाः सन्ति।
तेन उक्तं यत् कला केवलं मनोरञ्जनस्य साधनं नास्ति, अपितु समाजस्य नैतिकसांस्कृतिकाध्यात्मिकोन्नतेः सशक्तं माध्यमम् अस्ति। अद्यतनः अयं अवसरः अस्मान् कलायाः महत्त्वं ज्ञातुं, तस्याः संरक्षणं कर्तुं तथा आगामिपीढीभ्यः तस्याः गौरवं अक्षुण्णं स्थापयितुं प्रेरयति। कस्याश्चित् सभ्यतायाः आत्मानं ज्ञातुम् इच्छामः चेत् तस्याः लोकगीतानि लोकनाट्यानि च अवश्यम् अवगन्तव्यानि, यतः लोकसंस्कृतिः सा जीवन्तधारा अस्ति या पीढ्यानुपीढ्याः अस्माकं परिचयं वहन्ती आगता अस्ति।
राज्यपालः अवदत् यत् कस्यापि राष्ट्रस्य महत्तमा शक्तिः तस्य संस्कृतेः जीवन्तता भवति। भारते लोकसंगीतस्य, लोकनृत्यस्य, लोकगायनस्य च परम्पराः शताब्दीभ्यः अस्माकं सांस्कृतिकचेतनां स्पन्दयन्त्यः आगताः। अद्य भजनक्लबिंग इत्यादयः नूतनाः सांस्कृतिकस्वरूपाः एतस्य प्रमाणं यत् अस्माकं लोकपरम्पराः कालेन सह स्वान् नूतनरूपेण अभिव्यक्तुं समर्थाः सन्ति। भक्तेः स्वराः यदि नूतनेषु मञ्चेषु प्रतिध्वनन्ति, तथापि तेषां आत्मा अद्यापि तावदेव पवित्रा समर्पिता च अस्ति।