पूर्वीसिंहभूमः, 05 जूनमासः (हि.स.)।विश्वपर्यावरणदिवसस्य अवसरे शुक्रवासरे जमशेदपुरवनप्रमण्डलस्य पक्षतः सोनारीस्थे वनभवनपरिसरे ग्रीनाथॉन पर्यावरणार्थं पदयात्रा इति कार्यक्रमस्य आयोजनम् अभवत्।

पर्यावरणसंरक्षणस्य हरितजीवनशैल्याः च प्रोत्साहनार्थम् आयोजिते अस्मिन् कार्यक्रमे प्रायः ४०० जनाः उत्साहपूर्वकं भागं गृहीतवन्तः। अस्मिन् वनविभागस्य अधिकारिणः कर्मचारीणः, छात्राः, सामाजिकसङ्गठनानां प्रतिनिधयः, पर्यावरणप्रेमिणः, महिलाः तथा युवानः बहुसंख्यया समाविष्टाः।

कार्यक्रमस्य आरम्भः क्षेत्रीयमुख्यवनसंरक्षिकायाः स्मिता पङ्कजस्याः तथा प्रभागीयवनाधिकारिणः सबा आलम अन्सारेः उपस्थितौ अभवत्। उभाभ्याम् अधिकारिभ्याम् सहभागिभ्यः पर्यावरणसंरक्षणस्य शपथः प्रदत्ता तथा प्रकृतेः प्रति स्वदायित्वपालनाय आह्वानं कृतम्। अनन्तरं प्रायः पञ्चकिलोमीटरदीर्घायाः जनजागरूकतापदयात्रायाः हरितध्वजप्रदर्शनेन शुभारम्भः कृतः।

पदयात्रायां सम्मिलिताः जनाः पर्यावरणसंरक्षणेन, वृक्षारोपणेन, प्लास्टिकमुक्तजीवनेन च सम्बद्धसन्देशयुक्ताः तख्तिकाः हस्तेषु धारयन्तः आसन्। सम्पूर्णमार्गे हरितावरणवृद्धये, जलसंरक्षणाय, स्वच्छपर्यावरणस्य परिपालनाय च घोषवाक्यानि निरन्तरं श्रूयमाणानि आसन्। कार्यक्रमस्य समये पर्यावरणजागरूकतासम्बद्धानां विविधक्रियाकलापानामपि आयोजनम् अभवत्।

क्षेत्रीयमुख्यवनसंरक्षिका स्मिता पङ्कजा उक्तवती यत् पर्यावरणसंरक्षणं केवलं शासकीयप्रयत्नैः सम्भवं नास्ति, अपितु समाजस्य प्रत्येकं वर्गस्य सक्रियभागीदारी अत्यावश्यकी अस्ति।

प्रभागीयवनाधिकारिणी सबा आलम अन्सारी उक्तवती यत् जलवायुपरिवर्तनस्य वर्धमानप्रदूषणस्य च परिस्थितीः निराकर्तुं जनजागरूकता सर्वाधिकप्रभावी माध्यमम् अस्ति। तया उक्तं यत् वनविभागः निरन्तरं वृक्षारोपणसंरक्षणसम्बद्धान् कार्यक्रमान् सञ्चालयति।

---------------

Hindusthan Samachar / Dheeraj Maithani