Enter your Email Address to subscribe to our newsletters
मीरजापुरम्, 05 जूनमासः (हि.स.)।उत्तरप्रदेशस्य मीरजापुरे विश्वपर्यावरणदिवसस्य अवसरे शुक्रवासरे माता विंध्यवासिनी स्वशासिराज्यचिकित्सामहाविद्यालयपरिसरे भव्यकार्यक्रमस्य आयोजनम् अभवत्। अस्मिन् अवसरे जनप्रतिनिधिभिः प्रशासनिकाधिकारिभिश्च वृक्षारोपणं कृत्वा पर्यावरणसंरक्षणस्य सन्देशः प्रदत्तः तथा जनाः अधिकाधिकान् वृक्षान् रोपयितुम् आहूताः।
कार्यक्रमे नगरविधायकः रत्नाकरमिश्रः, मझवाविधायिका सुचिस्मिता मौर्या, छानबेविधायकः रिकी कोलः, मण्डलायुक्तः राजेशप्रकाशः तथा जिलाधिकारी पवनकुमारगङ्गवारः वृक्षारोपणं कृतवन्तः। ततः परं सभागारे आयोजितायां सङ्गोष्ठ्यां पर्यावरणसंरक्षणस्य तस्य महत्त्वस्य च विषये विस्तरेण चर्चा कृता। कार्यक्रमे एकः वृक्षः मातुः नाम्ना इति अभियानस्य सफलतायै विशेषबलं प्रदत्तम्।
नगरविधायकः रत्नाकरमिश्रः उक्तवान् यत् पर्यावरणसंरक्षणं केवलं शासकीयकार्यक्रमः नास्ति, अपितु जनभागीदारीसम्बद्धम् अभियानम् अस्ति। प्रत्येकः जनः यदि स्वजीवने न्यूनातिन्यूनम् एकं वृक्षं रोपयित्वा तस्य संरक्षणस्य सङ्कल्पं कुर्यात्, तर्हि आगामिपीढीभ्यः स्वच्छं सुरक्षितं च पर्यावरणं प्रदातुं शक्यते। एकः वृक्षः मातुः नाम्ना इति अभियानम् अस्माकं संस्कृतेः मातृसम्मानस्य प्रकृतिसंरक्षणस्य च सुन्दरः समन्वयः अस्ति।
मण्डलायुक्तः राजेशप्रकाशः स्वसम्बोधने उक्तवान् यत् वर्तमानकाले पर्यावरणसंरक्षणं वैश्विकी आवश्यकता जाता अस्ति। वर्धमानप्रदूषणस्य जलवायुपरिवर्तनस्य च चुनौत्यः निराकर्तुं वृक्षारोपणं सर्वाधिकप्रभाविषु उपायेषु अन्यतमम् अस्ति। अस्माभिः केवलं वृक्षारोपणपर्यन्तं सीमितं न भवितव्यम्, अपितु तेषां संरक्षणसंवर्धनयोः उत्तरदायित्वमपि निर्वहणीयम्। तेन उक्तं यत् प्रत्येकेन नागरिकेन पर्यावरणस्य प्रति स्वकर्तव्यं ज्ञात्वा अधिकाधिकाः वृक्षाः रोपणीयाः तथा प्राकृतिकसंसाधनानां संरक्षणे सक्रियभूमिका निर्वहणीया।
कार्यक्रमे मुख्यविकासाधिकारी विशालकुमारः, प्रभागीयवनाधिकारी राकेशकुमारः, माता विंध्यवासिनी चिकित्सामहाविद्यालयस्य प्राचार्यः डॉ. संजीवकुमारः तथा अन्ये अधिकारिणः कर्मचारिणः गणमान्यनागरिकाश्च उपस्थिताः आसन्।
---------------
Hindusthan Samachar / Dheeraj Maithani