कोलकाता, 06 जूनमासः (हि.स.)।केन्द्रीयरेलमन्त्री अश्विनी वैष्णव शनिवासरे कोलकातानगरम् आगत्य नगरे मेट्रोरेलयानस्य उपयोगं कृतवान् तथा सामान्ययात्रिभिः सह संवादमकरोत्। अस्मिन् अवसरे राज्यसर्वकारस्य मन्त्री जगन्नाथ चटर्जी तथा सांसदः ज्योतिर्मय सिंह महतो अपि तेन सह उपस्थितौ आस्ताम्। रेलमन्त्रिणः एषा यात्रा न केवलम् औपचारिकी आसीत् अपितु तेन भूमिस्तरे मेट्रोसेवानां अनुभवः अपि प्राप्तः।

संसूचनानुसारं कोलकाताविमानस्थानके अवतरणानन्तरं रेलमन्त्री प्रत्यक्षरूपेण विमानस्थानकसमीपस्थितं जय हिन्द मेट्रोस्थानकं गतवान् तथा तस्मात् मेट्रोरेलयाने समारूढवान्। अस्मिन् काले तेन यात्रिभिः सह संवादः कृतः तथा मेट्रोसेवाविषये तेषां मतमपि ज्ञातम्। यात्रिभिः मेट्रोसेवायाः प्रशंसा कृता।

ततः परम् अश्विनी वैष्णव मेट्रोमाध्यमेन नोआपाडा स्थानं प्राप्तवान्। तस्मात् अग्रिमयात्रार्थं तेन प्रामोदनगर क्षेत्रे वाहनं परिवर्तितम्। जनानाम् असुविधा न भवेत् इति हेतोः सुरक्षायातायातव्यवस्थयोः अन्तर्गतं वाहनं नोआपाडाक्षेत्रे प्रवेशितं न कृतम्।

ततः परं रेलमन्त्री प्रामोदनगरात् आरभ्य आटोरिक्षायानेन अग्रे गतवान् तथा अनन्तरं नबान्न स्थानं प्राप्तवान् यत्र राज्यसर्वकारेण सह तस्य महत्त्वपूर्णम् उपवेशनम् आयोजितम् आसीत्। नबान्न स्थानं प्रति गच्छन् सः सामान्यजनवत् अल्पसुरक्षया यातायातनियमानां पालनं कुर्वन् यात्रामकरोत् यत् चर्चायाः विषयः अभवत्।

उपवेशनस्य समये रेलमन्त्री उक्तवान् यत् कोलकातामेट्रोविस्तारस्य आधुनिकीकरणस्य च कृते केन्द्रीयसर्वकारः अनेकासु योजनासु कार्यं करोति। तेन उक्तं यत् आगामिषु चतुः पञ्चवर्षेषु प्रायः षष्टिः नवीनसंततेः मेट्रोरेलयानानि समावेशयितुं योजना अस्ति येन नगरस्य परिवहनव्यवस्थायै नवीनगतिः प्राप्स्यते।

तेन एतदपि उक्तं यत् चिङ्गडीघाटाक्षेत्रे कार्यस्य समापनानन्तरं कोलकातानगरे आवागमनं अधिकं सुगमं भविष्यति। केन्द्रीयसर्वकारः अस्यां दिशि अनेकासु परियोजनासु तीव्रगत्या कार्यं करोति येन नगरस्य यातायातव्यवस्थायां सम्पर्कसुविधायां च महत् सुधारः भविष्यति।

----------------

Hindusthan Samachar / Dheeraj Maithani