भोपालम्, 07 जूनमासः (हि.स.)।

विश्वसाइकिलदिवसस्य अवसरे रविवासरे प्रातःकाले राजधानीभोपालस्य मार्गेषु स्वास्थ्यतन्दुरुस्ततायाः प्रति जागरूकतायाः अद्वितीयं दृश्यं दृष्टम्। टीटीनगरक्रीडाङ्गणात् प्रारब्धे सण्डे ऑन साइकिल अभियाने सहस्रशः युवानः, क्रीडकाः, महिलाः, सामान्यनागरिकाश्च उत्साहपूर्वकं सहभागितां कृतवन्तः। साइकिलयानानां दीर्घपङ्क्तयः नगरवासिनः स्वस्थजीवनशैल्याः स्वीकरणाय तथा पर्यावरणसंरक्षणस्य सन्देशं प्रदत्तवन्त्यः।

कार्यक्रमस्य शुभारम्भः प्रदेशस्य क्रीडायुवकल्याणमन्त्री विश्वाससारङ्गेन हरितध्वजप्रदर्शनेन कृतः। भारतीयक्रीडाप्राधिकरणेन तथा क्रीडायुवकल्याणविभागेन संयुक्ततत्त्वावधाने आयोजितस्य अस्य अभियानस्य अस्मिन् वर्षे पूर्वापेक्षया अधिकं व्यापकं स्वरूपं प्रदत्तम्। मन्त्री विश्वाससारङ्गः स्वयमपि साइकिलयानं चालयन् अभियाने सम्मिलितः अभवत्। तेन टीटीनगरक्रीडाङ्गणात् लिङ्कमार्गं रोशनपुरामार्गं च अतिक्रम्य सहभागिभिः सह साइकिलयानसञ्चालनं कृतम्। अस्मिन् अवसरे तेन युवभ्यः नियमितव्यायामं तन्दुरुस्ततां च स्वदैनिकचर्यायाः अङ्गरूपेण स्वीकर्तुं प्रार्थना कृता।

सारङ्गः उक्तवान् यत् प्रधानमन्त्री नरेन्द्रमोदिनः फिट् इण्डिया अभियानस्य उद्देश्यं देशं स्वस्थं सक्रियं च कर्तुम् अस्ति। सण्डे ऑन साइकिल इत्यादृशाः पहलाः जनान् स्वास्थ्यस्य प्रति जागरूकान् कर्तुं तथा तन्दुरुस्ततायाः जनान्दोलनरूपप्रदाने महत्त्वपूर्णां भूमिकां निर्वहन्ति। प्रातःकालीनताजवायोः उत्साहपूर्णवातावरणस्य च मध्ये सहभागिनः साइकिलयानसञ्चालनं कृत्वा न केवलं तन्दुरुस्ततायाः सन्देशं प्रदत्तवन्तः, अपितु पर्यावरणसंरक्षणस्य स्वच्छपरिवहनस्य च संवर्धनाय स्वसङ्कल्पम् अपि पुनरुक्तवन्तः।

अभियाने सम्मिलितैः जनैः एषा स्वास्थ्यजागरूकतावर्धिनी सकारात्मकपहलारूपेण वर्णिता तथा नियमितरूपेण एतादृशानाम् आयोजनानां समर्थनस्य आवश्यकता अपि प्रतिपादिता।

---------------

Hindusthan Samachar / Dheeraj Maithani