रांची, 07 जूनमासः (हि.स.)। झारखण्डप्रवासस्य द्वितीये दिने रविवासरे भारतीयजनतापार्टी (भाजपा) इत्यस्य राष्ट्रीयाध्यक्षः नितिन नवीनः राँचीतः बोकारोनगरं प्रति गच्छन् मार्गे बहुषु स्थानेषु भव्यस्वागतं प्राप्तवान्। अस्मिन् अवसरे रामगढ़ तथा बोकारो जनपदयोः दलकार्यकर्तारः पुष्पवृष्ट्या, जयघोषैः तथा हार्दिकाभिनन्दनेन तस्य स्वागतं कृतवन्तः।

यात्राक्रमे रामगढ़स्य निर्मलमहतोचत्वरे तथा माण्डोः छतरपुरे कार्यकर्तारः राष्ट्रीयाध्यक्षस्य उत्साहपूर्णं स्वागतं कृतवन्तः। अस्मिन् अवसरे सः स्वर्गीयस्य निर्मलमहतोः प्रतिमायाः माल्यार्पणं कृत्वा तस्मै श्रद्धाञ्जलिम् अर्पितवान्।

ततः परं रामगढ़जनपदस्य गोलायां चितरपुरे च तथा बोकारोजनपदस्य पेटरवारे, जैनामोडे, नयामोडे च कार्यकर्तृभिः उत्साहपूर्वकं स्वागतं कृतम्। एतेषु सर्वेषु स्थानेषु वातावरणं सम्पूर्णतया संगठनात्मकउत्साहेन ओजसा च परिपूर्णम् आसीत्।

अस्मिन् काले राष्ट्रीयाध्यक्षः स्वर्गीयस्य छत्रुराममहतोः प्रतिमायाः अपि माल्यार्पणं कृत्वा तस्मै भावपूर्णां श्रद्धाञ्जलिम् अर्पितवान् तथा तस्य संघर्षपूर्णजीवनं योगदानं च स्मृतवान्।

कार्यक्रमस्य अवसरे कार्यकर्तृषु महान् उत्साहः दृष्टः। स्थाने स्थाने सम्पन्नायाः पुष्पवृष्टेः घोषवाक्यानां च मध्ये संगठनस्य प्रति समर्पणभावः स्पष्टतया प्रकटितः। बहुसंख्यकाः कार्यकर्तारः स्वागतसमारोहे सहभागी अभवन्, येन सम्पूर्णे क्षेत्रे जनसमुद्रसदृशं वातावरणं निर्मितम्।

अस्मिन् अवसरे झारखण्डभाजपायाः अनेकाः वरिष्ठनेतारः जनप्रतिनिधयः च उपस्थिताः आसन्, येषु प्रदेशाध्यक्षः आदित्यसाहुः, हजारीबागसांसदः मनीषजायसवालः, धनबादसांसदः ढुल्लूमहतोः, प्रदेशमहामन्त्री गणेशमिश्रः, विधायकः रौशनलालचौधरी तथा पूर्वविधायकः बिरञ्चिनारायणः सहिताः अन्ये पदाधिकारिणः अपि समाविष्टाः आसन्।

----------

Hindusthan Samachar / Dheeraj Maithani