बेंगलुरुः, 07 जूनमासः (हि.स.)।राष्ट्रीयस्वयंसेवकसंघस्य संस्थापकस्य डॉ. केशवबलिरामहेडगेवारस्य जीवनम्, विचाराः, राष्ट्रनिर्माणे तस्य योगदानं च आधारीकृत्य निर्मितस्य हिन्दीनाटकस्य ‘युगप्रवर्तक डॉ. हेडगेवार’ इत्यस्य शनिवासरसायं बेङ्गलूरुनगरस्य येलहङ्कास्थिते डॉ. बी. आर. अम्बेडकरभवने सफलं मञ्चनम् अभवत्। कार्यक्रमे बहुसंख्यकाः दर्शकाः सहभागिनः अभवन् तथा नाटकस्य सम्यक् प्रशंसा अपि अभवत्।

महाराष्ट्रस्य नागपुरनगरात् आगतस्य नादब्रह्मनाट्यदलस्य वरिष्ठरङ्गकर्मिणः रवीन्द्रसहस्रबुद्धेः नेतृत्वे अस्य नाटकस्य प्रभावशालिनी प्रस्तुति कृता। नाटकेन डॉ. हेडगेवारस्य जीवनस्य विविधपक्षाः, तस्य राष्ट्रवादीचिन्तनम्, संगठननिर्माणविषयिणी दृष्टिः तथा समाजस्य प्रति तस्य समर्पणभावः सजीवरूपेण प्रस्तुतः।

नाटके वरिष्ठरङ्गकर्मी सतीशकेखाले डॉ. हेडगेवारस्य भूमिकां निर्वाहितवान्। तस्य सशक्तः प्रभावशाली च अभिनयः दर्शकान् विशेषरूपेण प्रभावितवान्। मञ्चनस्य समये कलाकाराणां संवादाः, भावाभिव्यक्तिः, प्रस्तुतीकरणशैली च दर्शकान् सम्पूर्णकालं यावत् आकृष्टवती।

कार्यक्रमे पञ्चशताधिकानां जनानाम् उपस्थितिः अभवत्। दर्शकाः न केवलं नाटकस्य आनन्दम् अनुभूतवन्तः, अपितु कलाकाराणाम् उत्कृष्टाभिनयस्य प्रस्तुतेः च मुक्तकण्ठेन प्रशंसाम् अकुर्वन्। आयोजनस्थले राष्ट्रभक्तेः सांस्कृतिकचेतनायाः च वातावरणं दृष्टिगोचरम् अभवत्।

आयोजकानां मते नाटकस्य अपरं मञ्चनं रविवासरसायं बेङ्गलूरुनगरस्य कडुबीसनहल्लीस्थिते न्यू होराइजन अभियांत्रिकीमहाविद्यालयपरिसरे भविष्यति। अस्मिन् कार्यक्रमे संघकार्यकर्तारः, विद्यार्थिनः तथा बहुसंख्यकाः नागरिकाः सहभागीभविष्यन्ति इति सम्भावना वर्तते।

युवसन्ततेः समीपं डॉ. हेडगेवारस्य जीवनदर्शनम्, संगठनात्मकमूल्यानि तथा राष्ट्रसेवायाः सन्देशं प्रापयितुं निर्मितम् एतन्नाटकं देशस्य विभिन्नेषु नगरेषु पूर्वमपि सफलतया मञ्चितम्। बेङ्गलूरुनगरे अपि अस्य नाटकस्य प्रति दर्शकैः उत्साहपूर्णः समर्थनभावः सकारात्मकः प्रतिसादः च प्रदीयते, येन आयोजकानां कलाकाराणां च उत्साहः वर्धितः अस्ति। एतन्नाटकं केवलं सांस्कृतिकप्रस्तुतिः न, अपितु राष्ट्रनिर्माणस्य मूल्यानि सामाजिकचेतनां च नवसन्ततेः समीपं प्रापयितुं समर्थं माध्यमं रूपेण उद्भूतम् अस्ति।

------------

Hindusthan Samachar / Dheeraj Maithani