Enter your Email Address to subscribe to our newsletters
गुवाहाटी, 08 जूनमासः, (हि.स.)।
असमराज्यस्य राज्यपालः लक्ष्मणप्रसादाचार्यः सोमवासरे असमराज्ययुद्धस्मारके दिगलीपुखुरीस्थले तथा डॉन बॉस्को उच्चविद्यालये पानबाजारस्थले सैनिककल्याणनिदेशालयेन असमराज्ये आयोजिते “अमरशहीदश्रद्धाञ्जलि” कार्यक्रमे सहभागित्वम् अकरोत्। अस्मिन् अवसरे सः राष्ट्रसेवायां सर्वोच्चबलिदानं कृतवन्तः असमराज्यस्य वीरसैनिकान् श्रद्धाञ्जलिं समर्पितवान्।
शहीदान् प्रणम्य राज्यपालः उक्तवान् यत् राष्ट्रं तेषां वीरपुत्राणां वीरपुत्रीणां च प्रति सदा ऋणी भविष्यति, ये राष्ट्रस्य सार्वभौमत्वस्य अखण्डतायाश्च रक्षणं कुर्वन्तः स्वप्राणान् समर्पितवन्तः। सः उक्तवान् यत् भारतीयसशस्त्रसेनाः कठिनासु विविधासु च परिस्थितिषु अपि साहसस्य अनुशासनस्य समर्पणस्य च सर्वोच्चपरम्पराः पालनं कुर्वन्त्यः राष्ट्रस्य सुरक्षां निर्वहन्ति।
प्रधानमन्त्रिणः नरेन्द्रमोदिनः तस्य विचारस्य उल्लेखं कुर्वन् यत् सशस्त्रसेनाः केवलं सीम्नां रक्षणमेव न कुर्वन्ति अपितु देशवासिनाम् आकाङ्क्षाणां भविष्यस्य च संरक्षणं कुर्वन्ति, राज्यपालः उक्तवान् यत् भारतीयसैनिकाः राष्ट्रस्य शक्तेः चरित्रस्य अखण्डसंकल्पस्य च प्रतीकाः सन्ति।
कार्यक्रमस्य समये षट् वीरनार्यः स्वशहीदपतीन् पुष्पाञ्जलिं समर्पितवत्यः। राज्यपालः ताभिः सह संवादं कृत्वा तासां साहसस्य धैर्यस्य त्यागस्य च प्रति राष्ट्रस्य कृतज्ञतां व्यक्तवान्। सः उक्तवान् यत् वीरनारीणां समर्पणं दृढता च समाजस्य कृते प्रेरणास्रोतः अस्ति।
अस्मिन् कार्यक्रमे पूर्वसैनिकाः सेवारताः रक्षकर्मचारिणः एनसीसी कैडेटाः विद्यार्थिनः च सहभागित्वं कृत्वा असमराज्यस्य वीरशहीदेभ्यः श्रद्धाञ्जलिं समर्पितवन्तः। राज्यपालः नागरिकान् राष्ट्रियैक्यस्य सुदृढीकरणाय तथा शहीदपरिवाराणां सम्मानस्य कल्याणस्य च प्रति प्रतिबद्धतां धारयितुम् आहूतवान्। सः उक्तवान् यत् एषा एव राष्ट्रस्य अमरवीरेभ्यः सत्या श्रद्धाञ्जलिः भविष्यति।
कार्यक्रमे पूर्वपूर्वीयसेनाकमानस्य जनरल ऑफिसर कमाण्डिङ इन चीफ लेफ्टिनेन्ट जनरल राणाप्रतापकलीता सेवानिवृत्तः, मेजर जनरल अजयकुमारशर्मा वीएसएम, जीओसी मुख्यालय ५१ सब एरिया, सैनिककल्याणनिदेशकः ब्रिगेडियर पलाशचौधरी, डॉन बॉस्को उच्चविद्यालयस्य प्राचार्यः फादर एलेक्स मैथ्यू इत्यादयः अनेकाः गणमान्यव्यक्तयः उपस्थिताः आसन्।
अनन्तरं राज्यपालः डॉन बॉस्को उच्चविद्यालयस्य विद्यार्थिभिः सह संवादं कृत्वा तान् देशभक्तेः अनुशासनस्य राष्ट्रसेवायाश्च मूल्यानि स्वजीवने स्वीकर्तुं प्रेरितवान्।
-----------
Hindusthan Samachar / Dheeraj Maithani