इन्दौरनगरम्, ०८ जूनमासः (हि.स.)। मध्यप्रदेशस्य इन्दौरनगरे ०९ जूनमासतः १३ जूनमासपर्यन्तम् आयोज्यमाने ब्रिक्स-देशानां महत्त्वपूर्णे कृषि-सम्मेलने सहभागितार्थं विदेशी-अतिथयः सोमवासरे इन्दौरम् आगतवन्तः। राज्य-सर्वकारेण तेषां स्वागतं पुष्पवृष्ट्या कृतम्। सायंकाले ते इन्दौरस्य प्रसिद्धे ‘५६-दुकान’-स्थले मालवा-प्रदेशस्य स्वादिष्ट-व्यञ्जनानाम् आस्वादम् अकुर्वन्।

सायंकाले ब्राजील, इथियोपिया, इण्डोनेशिया, दक्षिण-अफ्रिका इत्यादि-देशेभ्यः आगताः अतिथयः ‘५६-दुकान’-स्थले मालवीय-व्यञ्जनानि यथा शिंकजी, दधि-बडा, शाही-पोहा, कचौरी, पेटिस, साबूदान-खिचडी इत्यादीनाम् आस्वादम् अकुर्वन्। व्यञ्जन-निर्माणे स्वच्छतायाः विशेषं ध्यानं धृतम्। तेषां स्वागतार्थं शास्त्रीय-सङ्गीतस्य कार्यक्रमोऽपि आयोजितः।

इतिहासकारः जफर-अन्सारी-महोदयः तथा श्रवण-जोशी-महोदयः विदेशी-अतिथिभ्यः मालवीय-भोजन-परम्परायाः विषये विस्तृतां सूचनाम् अयच्छताम्। ताभ्यां देवी-अहिल्यायाः नगरी इन्दौरस्य इतिहासः अपि परिचितीकृतः तथा इन्दौरं देशस्य स्वच्छतमं नगरम् इति कथितम्।

‘५६-दुकान’-सङ्घस्य पदाधिकारिणः आतिथ्य-परम्पराम् अनुसृत्य सर्वेषाम् अतिथीनाम् आत्मीयतया स्वागतं कृत्वा मालवीय-व्यञ्जनानि परोक्षितवन्तः। अतिथीनां स्वागतार्थं ‘५६-दुकान’-परिसरः विशेषरूपेण अलङ्कृतः आसीत्। विदेशी-अतिथयः मालवीय-व्यञ्जनानाम् आस्वादेन सह ‘५६-दुकान’-स्थलस्य इतिहासस्य विषये अपि जानकारीं प्राप्तवन्तः। भाषायाः सुगमतार्थं प्रशासनद्वारा बहुभाषी-अनुवादकानाम् अपि व्यवस्था कृता। अस्मिन्नवसरे नगर-निगम-आयुक्तः क्षितिज-सिंघल-महोदयः, स्मार्ट-सिटी-परियोजनायाः मुख्य-कार्यकारी-अधिकारी अर्थ-जैन-महोदयः तथा अन्ये बहवः अधिकारिणः उपस्थिताः आसन्।

Hindusthan Samachar / Divya Ranjan