हैदराबादनगरम्, ०८ जूनमासः (हि.स.)। आन्ध्रप्रदेशस्य पूर्व-मुख्यमन्त्री तथा वाईएसआर-काङ्ग्रेस-दलस्य अध्यक्षः जगन्मोहन-रेड्डी-महोदयः विशाखापत्तनम्-इस्पात-निर्माण्यां सोमवासरे जातायां भीषण-दुर्घटनायां गहनं शोकं व्यक्तवान्। तेन घटनायाः व्यापक-अन्वेषणस्य याचना कृता तथा दोषिणां विरुद्धं कठोर-कार्यवाह्याः अपेक्षा व्यक्ता।

जगन्मोहन-रेड्डी-महोदयः उक्तवान् यत् औद्योगिक-प्रतिष्ठानेषु श्रमिकाणां सुरक्षा सर्वोच्च-प्राथमिकता भवितुमर्हति। तेन बलं दत्तं यत् भविष्ये एतादृशानां दुःखद-घटनानां निवारणार्थं सुरक्षा-मानकानां सावधानी-उपायानां च कार्यान्वयने कदापि सन्धि: न कर्तव्या।

वाईएसआर-काङ्ग्रेस-दलस्य अध्यक्षेन विशाखापत्तनमे दलस्य नेतृभ्यः कार्यकर्तृभ्यश्च निर्देशाः दत्ताः यत् ते प्रभावित-परिवारान् सम्प्राप्य तेषां सर्वथा साहाय्यं कुर्वन्तु। तेन आहतानां चिकित्सायाः निरीक्षणं कर्तुं तथा पीडित-परिवारान् सान्त्वयितुं अपि निर्देशः प्रदत्तः।

उल्लेखनीयम् अस्ति यत् भारत-सर्वकारस्य सार्वजनिक-उपक्रमेण राष्ट्रीय-इस्पात-निगम-लिमिटेड-संस्थया सञ्चालिते विशाखापत्तनम्-इस्पात-निर्माण्य: सोमवासरे जातायां दुर्घटनायां न्यूनातिन्यूनम् अष्ट श्रमिकाः मृताः, षट्भ्यः अधिकाः च गम्भीरतया दग्धाः अभवन्।

औद्योगिक-क्षेत्रे एषा प्रथमा महती त्रासदी नास्ति। जून-मासे २०१२ तमे वर्षे अपि समाना भीषण-दुर्घटना अभवत्, यस्यां षोडश श्रमिकाः प्राणान् अत्यजन्। तदा इस्पात-द्रावण-शाला-सङ्ख्या-३ मध्ये नवीन-प्राणवायु-संयन्त्रस्य परीक्षण-सञ्चालनं प्रचलति स्म, यस्मिन् अकस्मात् भीषणः विस्फोटः अभवत्।

Hindusthan Samachar / Divya Ranjan