Enter your Email Address to subscribe to our newsletters
कोलकाता/नवदेहली, ०८ जूनमासः (हि.स.)। तृणमूल-काङ्ग्रेस-दलस्य राज्यसभा-सांसदः सुखेन्दु-शेखर-रायः दलस्य प्राथमिक-सदस्यतायाः त्यागपत्रम् अर्पयित्वा राज्यसभा-सदस्यत्वात् अपि त्यागपत्रम् अर्पितवान्। सोमवासरे प्रातःकाले देहल्याः सः दलत्यागस्य घोषणां कृतवान् तथा च आर.जी.-कर-चिकित्सालयस्य चर्चित-प्रकरणे भ्रष्टाचार-विषये च दल-नेतृत्वस्य विरुद्धं स्वीयाम् असन्तुष्टिं स्पष्टतया प्रकटितवान्।
सुखेन्दु-शेखर-रायः उक्तवान् यत् आर.जी.-कर-प्रकरणस्य अनन्तरमेव सः दलत्यागस्य निर्णयं कृतवान् आसीत्, यस्य कार्यान्वयनम् अधुना कृतम् अस्ति। तेन उक्तं यत् शिक्षाक्षेत्रे, स्वास्थ्य-क्षेत्रे अन्येषु क्षेत्रेषु च वर्धमानः भ्रष्टाचारः जनसामान्यस्य मध्ये वर्धमानम् असन्तोषं च तृणमूल-दलस्य पतनम् अनिवार्यं कृतवन्तौ।
देहल्यां पत्रकारैः सह संवादे सः अवदत् यत् भविष्ये सक्रिय-राजनीतेः अपि संन्यासं स्वीकर्तुं सः विचारं कर्तुं शक्नोति। तेन आरोपः कृतः यत् दलस्य अन्तः भ्रष्टाचारः पराकाष्ठां प्राप्तवान् आसीत् तथा च ईमानदार-नेतारः उपेक्षिताः क्रियन्ते स्म। तथापि तेन एतदपि उक्तं यत् तृणमूल-दलस्य सर्वे नेतारः भ्रष्टाः न सन्ति।
सुखेन्दु-शेखर-रायः दलस्य राष्ट्रिय-स्तरीय-नेतृणां आय-सम्पत्त्योः अन्वेषणस्य अपि याचनां कृतवान्। आर.जी.कर-प्रकरणस्य उल्लेखं कुर्वन् सः अवदत् यत् तेन सार्वजनिकरूपेण आरक्षक-अधिकारिणां विरुद्धम् आन्तरिक-अन्वेषणस्य मागः कृतः आसीत्, यतः तस्य मतानुसारं प्रमाण-नाशने तेषां भूमिकायाः अन्वेषणम् अद्यापि अपेक्षितम् अस्ति। तस्य अनुसारं तस्मिन् प्रकरणे दोषिणां रक्षणस्य प्रयासः क्रियमाणः आसीत्, ततः एव सः निश्चयं कृतवान् यत् सः अधिककालं दलस्य अन्तर्गतः न स्थास्यति।
उल्लेखनीयम् अस्ति यत् सोमवासरे ‘इण्डिया’-गठबन्धनस्य सभायाः कृते तृणमूल-काङ्ग्रेस-दलस्य अध्यक्षा पूर्व-मुख्यमन्त्री ममता-बनर्जी तथा दलस्य महासचिवः लोकसभा-सांसदः अभिषेक-बनर्जी च देहलीम् आगतवन्तौ। अस्याः सभायाः पूर्वमेव सुखेन्दु-शेखर-रायस्य त्यागपत्रेण तृणमूल-दले नूतन-राजनीतिक-सङ्कटस्य चर्चा तीव्रा अभवत्।
विधानसभा-निर्वाचने तृणमूल-दलस्य दुर्बल-प्रदर्शनस्य अनन्तरमेव सुखेन्दु-शेखर-रायः दलस्य कार्यप्रणाली-विषये मुखरः आसीत्। आर.जी.कर-प्रकरणस्य समयेऽपि तेन भ्रष्टाचारस्य कथित-अनियमिततानां च विरुद्धं स्वरः उत्थापितः आसीत्। तथापि तस्मिन् समये तेन दलं न त्यक्तम्। सत्तापरिवर्तनस्य अनन्तरं तेन मुक्तकण्ठेन विरोधं प्रकट्य ममता-बनर्जी-महोदयाय स्वीयं त्यागपत्रं प्रेषितम्।
Hindusthan Samachar / Divya Ranjan