हुगलीनगरम्, ०९ जूनमासः (हि.स.)। राज्य-सर्वकारस्य अन्नपूर्णा-भण्डार-योजनायाः अन्तर्गतं आवेदन-पत्राणां पूरण-समर्पण-प्रक्रियायाः विषये जनानां मध्ये भ्रमः सन्देहश्च निरन्तरं वर्धते। विविधेषु वार्ड-इत्येतेषु दल-कार्यकर्तृभिः, नगरपालिकाकर्मिभिः तथा आशा-कर्मिभिः जनानां आवेदन-पत्राणि पूर्यन्ते, किन्तु अधिकांश-प्रकरणेषु आवेदन-पत्र-समर्पणानन्तरं लाभार्थिभ्यः किमपि प्राप्ति-पत्रं रसीद् वा न दीयते। अतः भविष्ये योजनायाः लाभ-प्राप्तेः विषये जनानां चिन्ता वर्धिता अस्ति।

अस्य सम्पूर्णस्य विषयस्य विषये प्रतिक्रियां दत्त्वा राज्यस्य मन्त्री भास्कर-भट्टाचार्य-महोदयः जनान् कार्यकर्तॄंश्च सावधानतां वोढुं परामर्शम् अयच्छत्। तेन उक्तं यत् बहुसंख्यकानि आवेदन-पत्राणि एककालमेव नगरपालिका-कार्यालयेषु समर्प्यन्ते। तादृशे सति यदि कस्यचित् आवेदन-पत्रस्य अभिलेखः नश्यति अथवा तथ्यानि इतस्तत: प्रेष्यन्ते, तर्हि तस्य उत्तरदायित्व-निर्धारणं कठिनं भविष्यति।

मन्त्रिणा आशङ्का व्यक्तीकृता यत् भविष्ये यदि कस्यचित् लाभार्थिनः नाम सूचीमध्ये न आगच्छेत् अथवा आवेदन-पत्रस्य अभिलेखः न लभ्येत, तर्हि जनाः प्रत्यक्षतया तान् कार्यकर्तॄन् प्रतिनिधींश्च उत्तरदायिनः मन्येरन्, ये आवेदन-पत्र-पूरणस्य समर्पणस्य च उत्तरदायित्वं स्वीकृतवन्तः।

तेन स्पष्टतया उक्तं यत् ये केऽपि दल-कार्यकर्तारः, सामाजिक-संस्थाः अथवा अन्ये जनाः आवेदन-पत्राणि समर्पयन्ति, ते प्रत्येकस्मिन् आवेदन-पत्रे वार्ड-इत्यनुसारं क्रमाङ्कं लिखन्तु। सहैव एकं प्रेषण-पत्रम् अपि सज्जीकुर्वन्तु, यस्मिन् लाभार्थिनां नामानि, दूरभाष-सङ्ख्याः तथा समर्पितानां आवेदन-पत्राणां संख्या स्पष्टतया उल्लिखिता भवेत्।

भास्कर-भट्टाचार्य-महोदयः बलपूर्वकम् अवदत् यत् आवेदन-पत्र-समर्पणानन्तरं नगरपालिका अथवा सम्बन्धित-कार्यालयात् तस्य प्राप्ति-पत्रं रसीद् वा अवश्यमेव ग्राह्या। एतेन भविष्ये कस्यापि विवादस्य अभिलेख-सम्बद्ध-समस्यायाः वा उत्पत्तौ उत्तरदायित्व-निर्धारणं सुकरं भविष्यति।

तेन उक्तं यत् कस्मिन्नपि सर्वकारीये अर्ध-सर्वकारीये वा विभागे कर्गद-समर्पणस्य अनन्तरं प्राप्ति-रसीद्-प्रदानं सामान्यः आवश्यकश्च प्रक्रिया अस्ति। एतेन पारदर्शिता वर्तते तथा सामान्य-जनाः अनावश्यक-क्लेशानां समक्षं कर्तुं न बाध्यन्ते।

मन्त्रिणः अस्य वक्तव्यस्य अनन्तरं अन्नपूर्णा-भण्डार-योजनायाः प्रक्रियाविषये चर्चा अधिका तीव्रा जाता। सामान्य-जनानां मध्ये अधुना एषा याचना उद्भूता यत् सर्वकारेण आवेदन-पत्र-समर्पणस्य कृते स्पष्टा पारदर्शिनी च व्यवस्था प्रवर्तनीया, येन लाभार्थिनः भविष्ये कस्यापि प्रकारस्य समस्यायाः समक्षं न कुर्युः।

Hindusthan Samachar / Divya Ranjan