केन्द्रीयमन्त्री अवदत् यत् मोदीसर्वकारस्य द्वादशवर्षाणि सेवा सुशासनं दरिद्रकल्याणं च समर्पितानि सन्ति। सिन्धिया कुलेन पानीपतस्य तृतीययुद्धे षोडश पूर्वजानां बलिदानं दत्तम्। द्वादशवर्षेषु भारते द्वयोः शक्त्योः संगमः दृष्टिगोचरः अभवत्।

रोहतक, ०९ जूनमासः।

केन्द्रीयसञ्चारमन्त्री उत्तरपूर्वक्षेत्रविकासमन्त्री च ज्योतिरादित्य एम सिन्धिया अवदत् यत् प्रधानमन्त्री नरेन्द्रमोदिनः नेतृत्वे गतद्वादशवर्षेषु भारतेन अभूतपूर्वस्थैर्यम् अभूतपूर्वपरिवर्तनं च अनुभूतम्। एतदेव कारणं यत् अद्य भारतं विश्वमञ्चे दृढम् आत्मविश्वाससम्पन्नं तीव्रगत्या विकसितं च शक्तिरूपेण प्रतिष्ठितम् अस्ति। विकसितभारत २०४७ इत्यस्य लक्ष्यस्य प्राप्त्यर्थं देशस्य १४० कोटि नागरिकानां स्वपूर्णाहुतिं दातुं समयः आगतः अस्ति।

मङ्गलवासरे केन्द्रीयमन्त्री वैश्यमहाविद्यालयस्य सभागारे आयोजितं विकसितभारतसंकल्पसम्मेलनं मुख्यातिथिरूपेण सम्बोधयन् आसीत्। तेन दीपप्रज्वलनेन सम्मेलनस्य शुभारम्भः कृतः।

तेन उक्तं यत् राष्ट्रपित्रा महात्मना गान्धिना रोपितः अयं पादपः अद्य वटवृक्षरूपेण विकसितः सन् लक्षशः विद्यार्थिभ्यः शिक्षारूपां छायां प्रददाति। महात्मना गान्धिना देशव्यापिन्यौ द्वे संस्थे प्रतिष्ठापिते, तयोः मध्ये रोहतकस्य वैश्यशिक्षणसंस्था अपि अन्तर्भवति।

ज्योतिरादित्य सिन्धिया अवदत् यत् हरियाणाप्रदेशस्य विशेषतः रोहतकभूमेः देशस्य इतिहासे विशिष्टं स्थानम् अस्ति। पानीपतस्य वीरभूमेः उल्लेखं कुर्वन् तेन उक्तं यत् देशस्य एकताया अखण्डताया रक्षणार्थं मराठवीरैः स्वप्राणानाम् आहुतिर्दत्ता आसीत्। सिन्धिया कुलस्य षोडश पूर्वजाः अस्मिन् युद्धे बलिदानं दत्तवन्तः। भारतस्य इतिहासः सहिष्णुतायाः इतिहासः अस्ति, किन्तु देशस्य सुरक्षायाः सम्मानस्य च विषये कापि सम्झौता कर्तुं न शक्यते।

उरी शल्यप्रहारः, बालाकोट वायुप्रहारः तथा ऑपरेशन सिन्दूर इत्यादिभिः कार्यवाहिभिः विश्वाय स्पष्टः संदेशः दत्तः यत् भारतः स्वस्य एकताम् अखण्डतां च अक्षुण्णां रक्षितुं शिलायाः प्रत्युत्तरं शिलयैव दातुं जानाति।

केन्द्रीयमन्त्री सिन्धिया अवदत् यत् प्रधानमन्त्री नरेन्द्रमोदी २०२४ तमे वर्षे शपथग्रहणानन्तरं प्रधानमन्त्रीकृषकसम्माननिधेः प्रायः २० सहस्रकोटिरूप्यकाणां राशिं ९.२६ कोटि कृषकाणां वित्तकोषेषु प्रापितवान्। प्रधानमन्त्रीनः चिन्तनं विश्वव्यापि अस्ति।

सिन्धिया अवदत् यत् रोहतकस्य उन्नतरैलमार्गपरियोजना अस्य परिवर्तनस्य उत्कृष्टम् उदाहरणम् अस्ति। प्रायः पञ्च किलोमीटरदीर्घः अयं उन्नतरेलमार्गः आधुनिकभारतस्य विकासदृष्टिं प्रदर्शयति। अस्यां परियोजनायाम् उपरि रेलमार्गः अधः च मार्गव्यवस्थायाः विकासः कृतः, येन यातायातव्यवस्था अधिका सुगमा सुव्यवस्था च अभवत्।

केन्द्रीयमन्त्री अवदत् यत् अयं उन्नतरैलमार्गः नवभारतस्य परिचयस्य अस्मितायाश्च प्रतीकः अस्ति।

---

Hindusthan Samachar / Dheeraj Maithani