गांदरबलम्, 09 जूनमासः (हि.स.)।

केन्द्रीयसडकपरिवहनराजमार्गमन्त्री नितिनगडकरी मङ्गलवासरे जोजिलासुरङ्गस्य निर्माणं भारतस्य अवसंरचनाइतिहासस्य स्वर्णाध्यायः इति वर्णितवान्। तेन उक्तं यत् एषा सुरङ्गा सर्वासु ऋतुषु सम्पर्कसुनिश्चितीकरणेन लद्दाखप्रदेशस्य जम्मूकश्मीरप्रदेशस्य च कृते जीवनरेखारूपेण कार्यं करिष्यति।

समारोहोत्तरायां पत्रकारसम्मेलने गडकरी उक्तवान् यत् चतुर्दशकिलोमीटरदीर्घा एषा सुरङ्गा देशस्य अत्यन्तमहत्त्वपूर्णासु अवसंरचनापरियोजनासु अन्यतमा अस्ति। सा दुर्गमभूप्रदेशस्य प्रतिकूलवातावरणस्य च उपस्थितावपि वैश्विकसुरक्षामानकानुसारं निर्मिता अस्ति। परियोजनायां संलग्नानाम् अभियन्तृणां श्रमिकाणां संस्थानानां च प्रशंसां कुर्वन् सः उक्तवान् यत् निर्माणकार्यं प्रायः त्रिसहस्रमीटरोन्नतौ शून्याङ्कात् न्यूनतापमाने सम्पन्नम्। अस्मिन् कार्ये प्रायः अशीतिप्रतिशतं श्रमिकाः स्थानीयाः आसन्।

तेन उक्तं यत् एषा सुरङ्गा कश्मीरप्रदेशस्य लद्दाखप्रदेशस्य च मध्ये निर्बाधसम्पर्कं सुनिश्चित्य सीमावर्तिक्षेत्रे पर्यटनस्य व्यापारस्य आर्थिकक्रियाकलापस्य रणनीतिकगमनागमनस्य च संवर्धनं करिष्यति। केन्द्रीयमन्त्रिणा लद्दाखप्रदेशस्य कृते अनेकाः नवीनाः आधारभूतसंरचनापरियोजनाः घोषिताः। तासु सहस्रकोटिरूप्यकव्ययेन निर्मीयमाणः लेहदक्षिणपरिहारमार्गः अष्टचत्वारिंशत्किलोमीटरपरिमितः तथा द्विशतकोटिरूप्यकव्ययेन निर्मीयमाणः लेहोत्तरपरिहारमार्गः सप्तदशमांशषट्किलोमीटरपरिमितः च अन्तर्भवतः। एतयोः उद्देश्यं यातायातसङ्कोचस्य न्यूनीकरणं सम्पर्कस्य च उन्नयनम् अस्ति।

तेन उक्तं यत् द्विदशमांशषट्किलोमीटरदीर्घायाः फातुलाद्विनलिकासुरङ्गायाः कार्यं त्रिमासाभ्यन्तरे आरभ्यते। अपरं त्रिसहस्रपञ्चशतकोटिरूप्यकव्यययुक्ता टेलापाससुरङ्गापरियोजना अन्तिमविस्तृतपरियोजनाप्रतिवेदनचरणे वर्तते तथा आगामिवर्षस्य मार्चमासात् पूर्वं तस्याः ठेकानां वितरणस्य सम्भावना वर्तते।

अतिरिक्तरूपेण गडकरी श्रीनगरगुमरीमार्गस्य विस्तारीकरणस्य उन्नयनस्य च घोषणाम् अकरोत्। अनेन सम्पर्कव्यवस्था अधिकं सुदृढा भविष्यति तथा जोजिलासुरङ्गायाः पूरकरूपेण कार्यं करिष्यति। तेन हिमालयप्रदेशे आधारभूतसंरचनाविस्ताराय दूरस्थसीमावर्तिक्षेत्रेषु च वर्षपर्यन्तं गमनागमनसुविधासुनिश्चितीकरणाय केन्द्रशासनस्य प्रतिबद्धता पुनः प्रतिपादिता।

---------------

Hindusthan Samachar / Dheeraj Maithani