बरेलीनगरम्, ०९ जूनमासः (हि.स.)। राष्ट्रीय-स्वयंसेवक-संघस्य ब्रज-प्रान्तीय-संघ-शिक्षा-वर्गस्य सामान्य-शालेय-विद्यार्थी-प्रशिक्षणस्य अन्तर्गतं मङ्गलवासरे सायंकाले भव्यं पथ-सञ्चलनम् आयोजितम्। सञ्चलने सहभागिनः स्वयंसेवकाः अनुशासनस्य, संगठन-शक्तेः तथा राष्ट्रभक्तेः प्रदर्शनम् अकुर्वन्। मार्गे अनेकेषु स्थानेषु स्थानीय-नागरिकैः पुष्पवृष्ट्या स्वयंसेवकानां स्वागतं कृतम्।

संघ-शिक्षा-वर्गः गत-३० मे-मासात् आरभ्य जय-नारायण-सरस्वती-विद्या-मन्दिर-इण्टर-महाविद्यालये सञ्चाल्यते। अस्मिन् ब्रज-प्रान्तस्य २९ जनपदेभ्यः आगताः २११ शिक्षार्थिनः प्रशिक्षणं प्राप्नुवन्ति। अधिक-ज्येष्ठ-मासस्य कृष्णपक्षीय-नवमी-तिथौ, विक्रम-संवत् २०८३ इत्यस्य अवसरे सायं षड्वादने पथ-सञ्चलनं वर्ग-स्थलात् प्रारब्धम्।

सञ्चलनं जय-नारायण-सरस्वती-विद्या-मन्दिरात् निर्गत्य सुरेश-शर्मा-नगर-चतुष्पथम्, बजरंग-ढाबा, संजय-नगरम्, तुलाशेरपुर-षष्टि-फिट्-मार्गम्, मिहिरभोज-गुर्जर-प्रतिहार-चतुष्पथ:, शत-फुटीय-मार्ग:, अशर्फी-बरयात्रा-गृहम् तथा देव-प्राइमस्-चिकित्सालयस्य पुरतः गत्वा पुनः वर्ग-स्थलं प्राप्य सम्पन्नम् अभवत्।

घोष-वाद्यस्य मधुर-ध्वनिभिः सह पद-सञ्चालनं कुर्वन्तः स्वयंसेवकाः मार्गे जनानां विशेषम् आकर्षणम् अभवन्। तान् द्रष्टुं मार्गे बहवः जनाः समागताः। विभाग-प्रचार-प्रमुखः धर्मेन्द्र-सचान-महोदयः अवदत् यत् पथ-सञ्चलनस्य अवसरे प्रान्त-संघचालकः शशांक-भाटिया-महोदयः, प्रान्त-प्रचारकः धर्मेन्द्र-महोदयः, सह-प्रान्त-प्रचारकः विनोद-महोदयः, वर्गस्य सर्वाधिकारी दीपराज-महोदयः, वर्ग-कार्यवाहः संजीव-पाण्डेय-महोदयः तथा ब्रज-प्रान्तस्य बरेली-महानगरस्य च अनेके पदाधिकारिण: उपस्थिताः आसन्।

Hindusthan Samachar / Divya Ranjan