मुम्बईनगरम्, ०९ जूनमासः (हि.स.)। राजस्थानं यद्यपि अन्येषां विशाल-राज्यानां इव अधिकं चर्चायां न तिष्ठति, तथापि भारते नूतन-निवेशकानां सङ्ख्यावृद्धौ तस्य महत्त्वपूर्णं योगदानं वर्तते।

राष्ट्रीय-प्रतिभूति-विनिमय-संस्था मङ्गलवासरे प्रकाशितैः विवरणै: सूचितवती यत् उत्तरप्रदेशः राजस्थानं च सह प्रमुख-राज्याः नूतन-निवेशक-पञ्जीकरणेषु प्रायः ४९ प्रतिशत-योगदानं ददति। एतत् भारतस्य पूञ्जी-विपण्याः विस्तार-कथायां राजस्थानस्य वर्धमानं महत्त्वं प्रकाशयति।

राजस्थाने वित्तीय-विपण्यां निवेशकानां सङ्ख्यायाः एषा वृद्धिः जयपुर, जोधपुर तथा कोटा इत्यादिषु अर्ध-नगरीय-जनपदेषु वर्धमानस्य वित्तीय-समावेशनस्य परिणामः अस्ति। प्रथमवारं निवेशं कुर्वतां जनानां बहुसङ्ख्या व्यवस्थित-निवेश-योजनाभिः (एसआईपी), विनिमय-व्यापारित-निधिभिः (ईटीएफ) तथा प्रत्यक्ष-शेयर-निवेशेन समभाग-विपण्यां प्रवेशं करोति।

एनएसई-संस्थायाः विवरणानुसारं परम्परागत-प्रमुख-विपण्येभ्यः भिन्नाः प्रदेशाः अधुना प्रायः २७ प्रतिशत-निवेशक-सहभागितां धारयन्ति, यत् निवेशक-सहभागितायाः विस्तृतं क्षेत्रं सूचयति। एषः प्रवृत्तिः दर्शयति यत् भारतस्य समभाग-निवेश-संस्कृतिः अधुना केवलं महानगरेषु सीमिता नास्ति, अपितु सा सम्पूर्ण-भारते प्रसृता, महत्त्वाकाङ्क्षिणी तथा डिजिटल-प्रौद्योगिकी-सक्षमिता च जाता अस्ति।

Hindusthan Samachar / Divya Ranjan