Enter your Email Address to subscribe to our newsletters
16 जनवरी 2027यावत् आवेदनं कर्तुं शक्नुवन्ति विंशतिवर्षेभ्यः पुरातनं स्वामित्वम्
चंडीगढ़-मनाली, 09 जूनमासः (हि.स.)। हरियाणाराज्यस्य मुख्यमन्त्री नायब सिंह सैनी इत्यनेन ग्रामीणजनानां कृते महतीं राहतं प्रदाय घोषणा कृता यत् ये कुटुम्बाः ग्रामस्य शामलात भूमौ विगतविंशतिवर्षेभ्यः गृहाणि निर्माय निवसन्ति, तादृशाः कुटुम्बाः स्वामित्वाधिकारप्राप्त्यर्थं नियमानुसारं अधुना १६ जनवरी २०२७ पर्यन्तं स्वान्यावेदनानि समर्पयितुं शक्नुवन्ति। तेन उक्तं यत् तादृशेभ्यः कुटुम्बेभ्यः २००४ वर्षस्य कलेक्टरदरेण निर्धारितमूल्यस्य सार्धगुणानुसारं भूमिक्रयधनराशिः संगृह्यते। अभिलेखसम्बद्धकठिनताभिः कारणीभूताभिः बहवः पात्रजनाः आवेदनं कर्तुं न अशक्नुवन्, अतः सर्वकारेण तेषां कृते राहतः प्रदत्ता।
एतेन सह तेन घोषणा अपि कृता यत् ग्रामीणक्षेत्रेषु कूर्प्रबन्धनं सुदृढीकर्तुं ट्रैक्टर ट्रॉली, चालकाः तथा कूर्संग्रहणकर्मकराः उपलब्धाः कारयिष्यन्ते। एते ट्रैक्टराः विद्युत्चालिताः भविष्यन्ति। तदतिरिक्तं वेस्ट टू एनर्जी परियोजनासु अपि सर्वकारः कार्यं कुर्वन् अस्ति।
मुख्यमन्त्री नायब सिंह सैनी मङ्गलवासरे पञ्चकूलानगरस्य इन्द्रधनुष आडिटोरियम इत्यत्र आयोजिते राज्यस्तरीये सशक्त पञ्चायत समारोह इत्यस्मिन् सभां सम्बोधयन् आसीत्। अस्मिन् अवसरे तेन १७ जनपदानां १७९ ग्रामाणां फिरनी मार्गेषु स्थापितानां एल ई डी मार्गदीपानां उद्घाटनं कृतम्, येषां कृते २३ कोटि २१ लक्षरूप्यकाणां व्ययः अभवत्। तेन सह १७ जनपदेषु ४४ कोटिरूप्यकव्ययेन निर्मितानां ३५० अटल ग्रन्थालयानामपि लोकार्पणं कृतम्। तेन ग्रामविकासार्थं पञ्चायतीराजसंस्थाभ्यः विकासकार्याणां कृते १०५६ कोटि ७५ लक्षरूप्यकाणि प्रत्यक्षतया तासां खातेषु स्थानान्तरितानि।
अस्मिन् अवसरे मुख्यमन्त्री नायब सिंह सैनी जागृत ग्राम पुरस्कारयोजनायाः अन्तर्गतं प्रदेशस्य षट् ग्रामपञ्चायताः विकासे, स्वच्छतायां, सुशासने च नवीनमानदण्डस्थापनार्थं सम्मानितवान् तथा ताभ्यः १ कोटि ६६ लक्षरूप्यकाणां पुरस्कारधनराशिं प्रदत्तवान्।
मुख्यमन्त्री नायब सिंह सैनी उक्तवान् यत् भारतस्य वास्तविकशक्तिः सदा ग्रामेषु पञ्चायतिषु च वर्तते तथा पञ्चपरमेश्वरपरम्परया देशे लोकतन्त्रं जीवितं धारितम्। तेन उक्तं यत् हरियाणाराज्ये ग्रामान् विकासस्य सहभागिनः कर्तुं दिशि निरन्तरं ऐतिहासिकपदानि स्वीकृतानि सन्ति तथा अद्य अस्यैव श्रृङ्खलायाः अन्तर्गतं विविधयोजनानां माध्यमेन कुलं २६९७ कोटिरूप्यकेभ्यः अधिका धनराशिः विमोचिता।
मुख्यमन्त्री दीनदयाल लाडो लक्ष्मी योजना अन्तर्गतं मातृभ्यः भगिनीभ्यश्च अष्टमराशिरूपेण ७५ लक्षोततर२०७कोटिरूप्यकाणि प्रदत्तवान्। तथैव हर घर हर गृहिणी योजना अन्तर्गतं १९ कोटि ७५ लक्षरूप्यकाणि स्थानान्तरितानि। सामाजिकसुरक्षापेन्शनयोजनायाः लाभार्थिभ्यः ११५१ कोटि ५१ लक्षरूप्यकाणि प्रत्यक्षतया तेषां खातेषु स्थानान्तरितानि। तदतिरिक्तं ओ बी सी तथा डी एन टी वर्गयोः विद्यार्थिभ्यः २३ कोटि १७ लक्षरूप्यकाणां छात्रवृत्तयः प्रदत्ताः। दयालु योजना अन्तर्गतं १६९ कोटि ५० लक्षरूप्यकाणां वित्तीयसहायता प्रदत्ता।
समारोहे सम्बोधनं कुर्वन् विकास तथा पञ्चायतमन्त्री कृष्ण लाल पंवार उक्तवान् यत् मुख्यमन्त्रिणा प्रदेशस्य ६२२५ ग्रामपञ्चायतेषु अन्तःक्रीडाव्यायामशाला, आधुनिकग्रन्थालयः तथा महिला संस्कृतिकेन्द्रं स्थापयितुं योजना निर्मिता अस्ति।
समारोहे मन्त्रिमण्डलमन्त्री राव नरबीर सिंह, शिक्षामन्त्री महिपाल ढांडा, सहकारितामन्त्री डॉ अरविंद शर्मा, सामाजिकन्याय तथा अधिकारिता मन्त्री कृष्ण कुमार बेदी, महिला तथा बालविकास मन्त्री श्रुति चौधरी, राज्यसभासांसद श्रीमती रेखा शर्मा तथा अन्ये बहवः गण्यमान्याः उपस्थिताः आसन्।
---------------
Hindusthan Samachar / Dheeraj Maithani