कानपुरनगरम्, ०१ जुलाईमासः (हि.स.)। द्वि-इञ्जिन-सर्वकारस्य कार्यकाले सर्वकारीय-स्वास्थ्य-सेवासु जनानां विश्वासः निरन्तरं वर्धितः अस्ति। हैलट-चिकित्सालये रोगिभ्यः उत्तम-चिकित्सा प्रदीयते, शीघ्रमेव च अत्र अष्टशतानि नवीन-शय्यानां सुविधा अपि योजिष्यते। एतानि वचनानि बुधवासरे गोविन्द-नगर-विधानसभा-क्षेत्रस्य भाजपायाः विधायकः सुरेन्द्र-मैथानी उक्तवान्।

विधायकः सुरेन्द्र-मैथानी जीएसवीएम-चिकित्सा-महाविद्यालयेन सम्बद्धस्य हैलट-चिकित्सालयस्य आकस्मिक-निरीक्षणम् अकरोत्। निरीक्षणस्य समये तेन चिकित्सालयस्य बहिरङ्ग-रोगी-विभागः, विविध-वार्ड तथा अन्याः व्यवस्थाः अवलोकिताः। अस्मिन् अवसरे सः सामान्य-रोगिवत् ओपीडी-पङ्क्तौ स्थित्वा वरिष्ठ-नेत्र-रोग-विशेषज्ञया डॉ.शालिनी-मोहन-महोदयया स्वनेत्रयोः नियमित-परीक्षणम् अपि अकारयत्। विधायकं स्वमध्ये दृष्ट्वा रोगिणः तेषां परिवारजनाश्च तेन सह संवादम् अकुर्वन्।

विधायकेन चिकित्सालये प्रविष्ट-रोगिभ्यः तेषां परिचारकेभ्यश्च चिकित्सायाः, औषध-उपलब्धेः, चिकित्सकानां व्यवहारस्य, अन्यासां स्वास्थ्य-सुविधानां च विषये जानकारी गृहीता। तेन चिकित्सालये नियुक्तैः स्वच्छता-कर्मिभिः, सुरक्षा-रक्षकैः, वार्ड-बॉय-कर्मिभिश्च सह अपि संवादः कृतः तथा व्यवस्थायाः प्रतिपुष्टिः गृहीता। सहैव चिकित्सालय-परिसरे स्वच्छता-सुरक्षा-व्यवस्थयोः अधिक-सुदृढीकरणाय सम्बन्धित-अधिकारिभ्यः निर्देशाः प्रदत्ताः।

मैथानी अवदत् यत् २०१७ तम-वर्षात् पूर्वं हैलट-चिकित्सालयस्य ओपीडी-विभागे रोगिणां सङ्ख्या अत्यल्पा आसीत्, किन्तु अधुना प्रतिदिनं सहस्रशः रोगिणः उपचारार्थम् अत्र आगच्छन्ति। तेन उक्तं यत् एतत् सर्वकारीय-स्वास्थ्य-सेवासु जनविश्वासस्य वर्धमानत्वस्य प्रमाणम् अस्ति। तेन एतदपि उक्तं यत् एतादृशे विशाल-चिकित्सालये प्रतिदिनं बहुसंख्यक-रोगिणाम् आगमनात् कदाचित् लघवः व्यवस्थात्मकाः समस्याः सम्भवन्ति, तथापि सर्वकारस्य ध्येयम् प्रत्येकं रोगिणे गुणवत्तायुक्ताम् उत्तमां च चिकित्सां प्रदातुम् अस्ति।

विधायकेन उक्तं यत् हैलट-चिकित्सालये स्वास्थ्य-सुविधानां विस्ताराय शीघ्रमेव सप्तशत-शय्यात्मकस्य ट्रॉमा-केन्द्रस्य विस्तारः तथा शत-शय्यात्मकस्य अत्याधुनिक-गम्भीर-चिकित्सा-खण्डस्य निर्माणम् आरभ्यते। अनेन गम्भीर-आपत्कालीन-रोगिभ्यः महती सहायता भविष्यति। सहैव कर्कट-रोग-चिकित्सालये, उरः-रोग-चिकित्सालये तथा हृदयरोग-संस्थाने आधुनिक-चिकित्सा-यन्त्राणां, आवश्यक-चिकित्सा-कर्मिणां, अन्यासां सुविधाः च वर्धयितुं प्रयत्नाः करिष्यन्ते।

तेन उक्तं यत् कानपुरं प्रदेशस्य प्रमुख-चिकित्सा-केन्द्ररूपेण विकसितुं प्रधानमन्त्री नरेन्द्र-मोदी, मुख्यमन्त्री योगी-आदित्यनाथः तथा कानपुरस्य सांसदः रमेश-अवस्थी इत्येषां सहयोगेन निरन्तरं कार्यं प्रचलति। अग्रिमेषु कालेषु स्वास्थ्य-क्षेत्रे अन्याः अपि महत्त्वपूर्णाः परियोजनाः भूमिस्तरे दृश्यन्ते।

अस्मिन् अवसरे चिकित्सालय-प्रशासनस्य वरिष्ठ-अधिकारिणः, चिकित्सकाः, स्वास्थ्यकर्मिणः तथा अन्ये कर्मचारीणः उपस्थिताः आसन्। विधायकेन अधिकारिभ्यः रोगिणां समस्याः शीघ्रं समाधातुं तथा चिकित्सालयस्य व्यवस्थाः निरन्तरं सुदृढां कर्तुं निर्देशाः प्रदत्ताः।

Hindusthan Samachar / Divya Ranjan